İkinci Qarabağ müharibəsi başa çatdıqdan sonra Azərbaycan sərhədçiləri işğaldan azad edilən ərazilərdə- İran və Ermənistanla mövcud olan sərhədlərimizin keşiyindədir. Artıq sərhədlərimiz boyunca lazımi yerlərdə sərhəd zastavaları da tikilərək sərhədçilərin istifadəsinə verilir. Prezident İlham Əliyev onların bir neçəsinin açılışında iştirak edib.
“Bu gün müzəffər Azərbaycan Silahlı Qüvvələri qarşıda duran bütün vəzifələri icra edir. Eyni zamanda, sərhədçilərimiz hazırda işğaldan azad edilən ərazilərdə Azərbaycan-Ermənistan sərhədini də qoruyur.”
Bunu aprelin 26-da Azərbaycan Prezidenti İlham Əliyev Cəbrayıl və Zəngilan rayonlarına səfəri zamanı Dövlət Sərhəd Xidmətinin hərbi qulluqçuları ilə görüşdə deyib.
“Bu sərhəd də bərpa edilib və sərhəd boyunca bütün lazımi infrastruktur işləri aparılır, bütün texnika səfərbər edilib. Bu sərhədin uzunluğu 500 kilometrə yaxındır. Bu sərhəd 30 ilə yaxın müddət ərzində işğalçı qüvvələrin əlində idi. Biz Vətən müharibəsində Qələbə qazanaraq bu sərhədi də tam bərpa etdik, Zəngilan və Qubadlı rayonlarını, Laçın rayonunun bir hissəsini döyüşərək azad etdik. Laçın rayonunun böyük hissəsini və Kəlbəcər rayonunu düşmən artıq məcbur olub kapitulyasiya aktını imzalayaraq bizə qaytarıb. Hazırda o ərazilərdə lazımi işlər aparılır.”
Ancaq təəssüf ki, Ermənistanda baş qaldıran revanşist qüvvələr yenə də Azərbaycana qarşı ittihamlarla çıxış edərək ərazi iddiası irəli sürürlər. Ona görə də üçtərəfli Rusiya-Azərbaycan-Ermənistan birgə Bəyanatının müddəalarını pozmağa çalışırlar. 44 gün müddətində “Dəmir yumruq” düşmənin başını əzsə də, görünür, onların bəziləri bundan lazımi dərs götürməyiblər. Xocavəndə soxulan və hərbçilərimiz tərəfindən əsir alınan diversiya qrupunun arxasında həmin revanşistlər durur. Onlar zombiləşdirdikləri erməniləri qızışdırıb qisas almağa göndərirlər. Bu yaxınlarda Azərbaycan-Ermənistan sərhədinin Zəngilan istiqamətində bizim sərhədçilərimizə qarşı edilən hərbi təxribat da bundan xəbər verirdi. Ancaq rəhbərliyimiz təmkin göstərərək bu təxribata cavab verməməyi lazım bildi. Amma xəbərdarlıq edildi ki, əgər bir daha buna oxşar cəhd göstərilərsə, həmin pozucular yerindəcə məhv ediləcək. Biz öz sərhədimizi qoruyuruq və bundan sonra da qoruyacağıq. Azərbaycan sərhədçiləri sərhədlərimizin keşiyində sayıq dayanıblar. Artıq altı aydır ki, onlar öz şərəfli vəzifələrini layiqincə yerinə yetirirlər.
Hər bir ölkənin sərhədi onun dövlət rəmzlərindən biridir. “Azərbaycan öz sərhədlərini, ərazi bütövlüyünü tam bərpa edib. Bizim Silahlı Qüvvələrimiz rəşadət, qəhrəmanlıq göstərərək Vətən müharibəsində Zəfər çaldılar. Sərhədçilərin ümumi zəfərimizdə rolu çox böyükdür. Mən bunu qiymətləndirirəm. Təsadüfi deyil ki, bir çox hərbçilər dövlətimizin yüksək orden və medalları ilə təltif edilmişlər”, – dövlət başçısı bildirib.
Bəli, digər qoşun növləri ilə bərabər sərhədçilərimiz də qəhrəmanlıqla döyüşüblər, Ermənistan silahlı qüvvələrinin darmadağın edilməsində şücaət göstəriblər. İgid sərhədçilərimizin döyüş xidmətləri Vətənin yüksək mükafatlarına layiq görülüb.
Çox keçməz ki, əsassız torpaq iddiaçıları başa düşərlər ki, xam xəyalları elə xəyal olaraq qalacaq. Çünki müstəqil Azərbaycan öz torpağının bir qarışını da kimsəyə güzəştə getməz. Sərhədlərimizin təhlükəzsizliyin qarantı isə Ermənistan silahlı qüvvələrini darmadağın etmiş qüdrətli Azərbaycan Ordusudur.
