Bu gün Vətən müharibəsi şəhidi Romir Əliyevin doğum günüdür.
AzTV şəhidin doğum günü ilə bağlı süjet hazırlayıb.
Şəhidin atası Rəşadət Əliyev bildirib ki, oğlu bir dəfə də olsun onu görmək üçün gəlmələrini istəməyib:
“Sentyabrın 28-də oğluma çağırış gəldi. Qapıdan çıxanda mənə baxdı, dedi ki, “mən gedirəm, evimizdən mənim üçün bayrağımızı asarsan”. Oğlum Aprel döyüşlərində də iştirak edib. Hərbiyə uşaqlıqdan marağı olub, vətən sevgisini üstün tutub”.
Şəhidin anası Miraslava Əliyeva isə deyir ki, oğlu müharibəyə gülə-gülə gedib:
“Zəng edib danışanda “biz qələbə qazanacağıq” deyirdi. Həmişə deyirdim ki, sənin qazandığın qələbə, məni qürurlandırır. İndi şəklinə baxıram, ürəyim partlayır. Elə bilirəm o da şəkildən mənə baxır və deyir ki, “ana, ağlama, sən mənimlə fəxr etməlisən”. Övladımla fəxr edirəm”.
Cəsur kəşfiyyatçı Füzuli, Cəbrayıl, Zəngilan uğrunda gedən döyüşlərdə qəhrəmanlıq göstərib. Oktyabrın 21-də Qubadlı istiqamətində gedən döyüşlərdə şəhid olub.
Şəhid Romin Əliyev ölümündən sonra Ali Baş Komandan İlham Əliyevin sərəncamına əsasən, göstərdiyi qəhrəmanlıqlara görə, “Vətən uğrunda” və “Cəbrayılın azad olunmasına görə” medalları ilə təltif olunub.
