Atıldı dağlardan Zəfər topları…
Şəkilin sözü – şəkil sözü
Bəşəriyyət müharibəni həmişə lənətləyib. Bütün müharibələrimi? Yox, ədalətli müharibəyə belə münasibət olmur; bəşəri dövlətlər dövlət müstəqilliyinin nəticəsi kimi dövlət sərhədlərini pozan, torpaqları işğal edən işğalçıya qarşı aparılan müharibəni haqlı sayır, hətta dəstəkləyir də.
Siyasətin silahlı davamı olan müharibə faciələrdi, torpaq işğalıdı, evlərin, kəndlərin, şəhərlərin dağıdılmasıdı, ölümlərdi. Belə dövlətlər işğalçı dövlət kimi tanınır. Bəşəri dövlətlər belə dövlətlərin siyasətini pisləyir, onu işğalçılıqdan çəkinməyə çağırır. Bu çağırışlara məhəl qoymayan dövlət bəşəriliyə düşmənçilik edir; bəşəriliyə düşmənçiliyin aqibəti bəşəri nifrətdi. Ermənistan bəşəri nifrətin tünlüyündə sıxılır…
ATƏT-in Minsk qrupuna daxil olan dövlətlərin, BMT Təhlükəsizlik Şurasının on illərlə həll edə bilmədiyi problemi Azərbaycan Respublikasının Prezidenti İlham Əliyevin döyüş əmriylə Azərbaycan Ordusu həll etdi, 2020-ci ilin sentyabrın 27-də başlayan əks-hücum əməliyyatı Vətən müharibəsi kimi davam etdi.
Döyüşlər başlayanda düşmən ciddi müqavimət göstərə bilirdi, ordumuz düşmənin müdafiə sistemini darmadağın etdi. Azərbaycan Respublikasının Prezidenti İlham Əliyev xalqa müraciətində işğalçı dövlətlərin havadarlarına xitabən dedi: “Biz haqlıyıq, biz öz torpağımızda vuruşuruq, öz torpağımızda şəhidlər veririk. Bizim savaşımız müqəddəs savaşdır!”. Bu müqəddəs savaş ərəfəsində xalqın ruhu, xalqın sərkərdəsinə, ordusuna inamı kükrəməkdəydi. Hərbi nizamnamələrin tələblərini, Ali Baş Komandanın əmr və göstərişlərini məsuliyyətlə yerinə yetirən Azərbaycan əsgəri döyüş əmri gözləyirdi. Bu döyüşlər döyüş əzminin, qələbə ruhunun zəfəri ilə nəticələnəcəkdi – torpaqlarımız işğaldan azad ediləcəkdi, işğal sonlanacaqdı…
Ermənistanın işğalı 28 il çəkdi. 28 il işğal olunmuş kəndlərimizdə bulaqlar səsini içinə çəkib axırdı, yellər özünü dağlara-daşlara çırpırdı, ağacların yarpaqları düz-əməlli yaşıllaşmamış saralmağa meyillənirdi, evlərin doğma təmasa tamarzı divarlarını ermənilik uçurub-dağıtmışdı, ocaq yerlərində ocaq daşları çat-çat olmuşdu, … Azərbaycan əsgərinin döyüş əzmi, qələbə ruhu işğalçıya da, onun niyyətini yedəkləyənlərə də bir atalar sözümüzü xatırladırdı: Gec edər, güc edər. İşğalçı da, onun havadarları da bu kəlamın qətiyyətinin kəsərinin nə ilə nəticələnəcəyini güman etmək istəmirdi (yadıma xalq yazışısı İsmayıl Şıxlıdan eşitdiyimiz bir kəlam düşür: “Allah insana cəza verəndə əvvəlcə ağlını alır…) …
Azərbaycan Respublikası Prezidenti İlham Əliyevin xalqa müraciətində dünyanı heyrətləndirən xitabı təkcə işğalçı Ermənistanın deyil, ümumən işğalçılığın məğlubiyyətə məhkumluğunu xatırladan kəlam kimi dinlənilmişdi.
Azərbaycan Ordusu döyüş-döyüş qələbəyə yaxınlaşırdı. Digər qoşun növləri kimi artilleriyamız da düşmənin dayaq məntəqələrini dağıdır, döyüş texnikalarını, canlı qüvvəsini məhv edirdi. Döyüşlər gedən vaxtlarda rəmzi yüksəklik bildiyimiz ərazilərdən atılan top mərmiləri düşmənin olan-qalan qüvvəsini də qaçmağa məcbur etdi; Azərbaycan əsgəri də, Azərbaycan ictimaiyyəti də Əhməd Cavadın bir şeirinin bir misrasını təkrarladı: Atıldı dağlardan Zəfər topları! Toplar gündüz də atılırdı, gecə də. Bu topların mərmilərinin atəşindən yaranan işıq gecənin qaranlığını da əridirdi, qara niyyətlilərin niyyətini də parçalayırdı.
Vətən müharibəsində döyüşlərə ezam edilmişdim. Murovdağ istiqamətində gedən döyüşlərdə iştirak edən artilleriyaçılarla söhbərləşirdik. Şər qarışırdı. Bu anlarda o qədər də uzaq olmayan yerdən mərmi atəşlərinin səsi gəlmişdi, göy üzü mərmilərin təsir sahəsi boyunca işıqlanmışdı. O işıq döyüşçülərin də, bizim də gözümüzün nuruna qarışmışdı. Bu gözəlim şəkil mənə o anları xatırlatdı. Bu şəkil yüzlərə belə anların könül xoşluğunu ictimaiyyətə də yaşadacaq…
Bu şəkilin sözü ruhumuzun sözüdü…
Rəşid Faxralı
