Jirinovskinin hərdəmxəyallıq mərəzinin sərsəmlik təzahürləri

Əsrlərin sınağından çıxmış Türkiyə- Azərbaycan qardaşlığının sarsılmazlığından narahat olan qüvvələr çox olsa da, bəzilərinə bu yaxınlıq daha çox ağrı, acı verir. İkinci Qarabağ müharibəsində özünü daha bariz şəkildə göstərən hər iki dövlətin eyni məqsəd naminə güclənən birlik və həmrəyliyi qardaş ölkədə baş verən meşə yanğınları ilə birgə mübarizədə daha da möhkəmləndi. Qardaşlığın simvolu olan Şuşa Bəyannaməsi ilə rəsmi olaraq təsdiqlənən və yeni istiqamətlər üzrə inkişaf etdirilən Türkiyə-Azərbaycan birliyini Cənubi Qafqazda mövqelərinin itirilməsi hesab edən qərəzli qüvvələr bu həmrəyliyin regionda yaratdığı reallıqlara kölgə salmaq üçün müxtəlif gedişlər edir, ürəkbulandıran bəyanatlar səsləndirir, məğlub Ermənistanın simasında «qüdrətli ölkə» formalaşdırmağa , Azərbaycan –Türkiyə dostluğuna kölgə salmağa çalışırlar. Bu sahədə Kremlin qeyri-rəsmi sözçüsü, təxribat ruporu, Rusiya Federasiyası Dövlət Dumasının deputatı, Liberal Demokrat Partiyasının sədri Vladimir Jirinovskiyə çatan olmaz. Kremlin əlində alət olan, postsovet ölkələrinə çatdırılması lazım gələn mesajları, təhdidləri sərsəm düşüncəsi, kəm ağlı ilə dilə gətirən Jirinovskinin öz ölkəsində, həmkarları arasında ciddi fiqur kimi tanınmaması da təbiidir. «Rus əsgərinin ayaqlarını Hind okeanının sularında yuyacağı», sovetlərin bərpa olunacağı, keçmiş müttəfiq respublikaların quberniya kimi Rusiyanın tərkibinə qatılacağı ilə bağlı sərsəm xəyalları ilə ictimai rəyi öyrənməyə çalışan bu hərdəmxəyalın artıq həddi aşaraq başından böyük danışması şizofreniya xəstəliyinin əlamətidir.

Məsələn, bu zatı, südü xarabın «Komsomolskaya Pravda»” radiosunun «İtoqi s Jirinovskim”» proqramında (30 iyul 2021-ci il) Azərbaycanın dövlətçiliyi və ölkə rəhbərliyi ilə bağlı qərəzli , təhqiramiz açıqlamasında İkinci Qarabağ müharibəsində Zəfər qazanan ölkəmizin müdafiə qüdrətinin şəxsən onun özünə vurduğu yaranın göynərtisi hiss olunurdu. Ermənistanın məğlubiyyətinə ermənilərdən betər üzülən siyasi oyunbazın qeyri-etik davranışları qonşu dövlətlə strateji tərəfdaşlıq münasibətlərinin ruhuna uyğun olmadığı kimi, əməkdaşlığa zərər vuran məsuliyyətsiz və təxribat xarakterli açıqlamadır. Dumada təmsil olunan bir şəxsin beynəlxalq hüquq normalarını aşaraq müstəqil dövlət haqqında etikadan kənar ifadələr işlətməsi ən azından Azərbaycanın strateji tərəfdaşı edən Rusiyanın Xarici İşlər Nazirliyini düşündürməlidir. Xatırladaq ki, sözügedən xoşagəlməz hal ilə bağlı qarşı tərəfə Azərbaycan Xarici İşlər Nazirliyinin notası təqdim olunub.

Türkə nifrət hissi bitməyən, daim alovlanan rus təlxəyinin Türkiyənin Prezidenti Rəcəb Tayyib Ərdoğanla bağlı söylədikləri o deməkdir ki, Jirinovski Osmanlı dəyənəyi üçün darıxıb. «Ərdoğan Liviya, Suriya, Azərbaycan və Ukraynada Rusiyanın «fırlanan çarxını»” dayandırır. O, Ukrayna, Liviya və Qarabağda bizə mane olur”» söyləyən Jirinovskinin bu sözləri beynəlxalq terrora dəstəkdir. Rəsmi Moskva Ukrayna və Liviya münaqişəsi ilə əlaqəsinin olmadığını açıqlasa da Türkiyənin qonşu ölkələrdə terrorçulara qarşı mübarizəsini «tənqid edən» bu başabəla deputat görünür öz ölkəsinin xarici siyasətindən də bixəbərdir. Özünü guya ağıllı hesab edən Jirinovskiyə xatırladaq ki, müxtəlif ölkələrə silah satan Rusiyanın himayə etdiyi Ermənistana təmənnasız verdiyi və dəyəri milyard dollarla ölçülən silahlardan istifadə edən erməni terrorçuları tərəfindən 30 ildə uşaq, qadın, ahıl daxil olmaqla minlərlə azərbaycanlı qətlə yetirilmişdir.

Bu sərsəmin avqustun 8-də «Rossiya-1»” telekanalında yayımlanan «Solovyovla bazar axşamı»” proqramının canlı efirində Türkiyə Prezidenti Rəcəb Tayyib Ərdoğanı yenidən hədəfə alması köpəyin aya baxıb hürməsidir. Dünyada baş verən hadisələri kəm ağlı ilə «təhlil edən», guya Rusiyaya qarşı ciddi əks-təbliğat aparıldığını bildirən Jirinovskinin İngiltərəyə və Türkiyəyə yönəlik ittihamlarla çıxış etməsi bir budaqda oturub min budağı silkələmək anlamında başa düşülür. « Qarabağdakı İkinci müharibəni də Türkiyə İngiltərənin dəstəyi ilə edib» kimi sərsəm açıqlama verən liberalların sədrinin
«Turan ordusu” ideyasını da İngiltərə kəşfiyyatı hazırlayıb ortaya atıb və özünü sultan hesab edən” Ərdoğan da bu siyasəti aparır», «Ərdoğan hələ də gerçəkliyi qəbul edə bilmir və özünü Osmanlı imperiyasının sultanı kimi görür» sözləri bu rus təlxəyinin başçılıq etdiyi partiyanın hansı məqsədlərə, kimlərə nökərlik etdiyini bildirir. Jirinovski unutmamalıdır ki, dünya siyasətçiləri, həmkarları arasında böyük nüfuza malik və həmişə sülh tərəfdarı olan Türikyənin Prezidenti Rəcəb Tayyib Ərdoğanın Cənubi Qafqazda sabitliyin bərpası və qorunması üçün göstərdiyi fədakarlıq bütünlükdə dünyada sülhün təminatına yönələn tarixi xidmətlərdir. Bu sarsaq onu da qulağında sırğa etməlidir ki, I Pyotrun saqqal vergisi tətbiq etdiyi keçmiş dönəmlərdə alaçıqlarda yaşayanlardan fərqli olaraq türk xaqanları qızıl taxtlarda əyləşiblər. Zəngin tarixi ənənələrə malik Türkiyə-Azərbaycan dostluğu da belə zəmin üzərində formalaşıb, inkişaf edir, qardaşlıqdan artıq səmimi münasibətlər səviyyəsində möhkəmlənir. Jirinovskilər istəsələr də, istəməsələr də bu qardaşlıq belə səmimi duyğular əsasında davam edəcək. Vətən müharibəsində qardaş Azərbaycanın harayına çatan Türkiyədə törədilən meşə yanğınlarının söndürülməsində ilk olaraq azərbaycanlı mütəxəssislərin iştirakı da türk birliyinin sarsılmazlığından qaynaqlanır. Hazırda qardaş ölkədə meşə yanğınlarının söndürülməsində türklərlə birgə çalışan azərbaycanlı yanğın söndürənin alovlanan evdə türk bayrağını xilas etməsi, qoruması bütünlükdə türkçülüyün qələbəsidir. Bu baxımdan Jirinovskiyə məsləhətimiz odur ki, danışıqlarına , açıqlamalarına korrektə etsin, deputat mandatının məsuliyyəti barədə düşünsün. Yoxsa…