Bərdə rayon Xanərəb kənd sakinləri həyətyanı sahələrini suvara bilmirlər.
Bu barədə Oxu.Az–a sakinlər məlumat verib.
Bildiriblər ki, Xanərəb kəndində 22-yə yaxın keçmiş məcburi köçkün ailəsi yaşayır. Həm içməli su, həm də həyətyanı sahələrin suvarılması üçün istifadə etdiyi artezian işləmədiyi üçün həmin ailələr çətin vəziyyətdədirlər.
Məsələ barədə Azərbaycan Meliorasiya və Su Təsərrüfatı Açıq Səhmdar Cəmiyyəti ilə əlaqə saxladıq.
Bərdə Suvarma Sistemləri İdarəsinin rəisi Sərdar Əhmədov bildirib ki, artıq məsələ öz həllini tapıb:
“Ərazidə 908 nömrəli subartizan quyusu işləyir. Əslində ASC-nin balansında olan quyulardan həyətyanı sahələrin suvarma üçün istifadə olunur. Xanərəb kəndində yaşayan keçmiş məcburi köçkünlər isə oradan həm də içməli su üçün istifadə edirlər.
Bildiyiniz kimi hazırda suvarma mövsümüdür, nasoslar daimi işləyir və təmirə ehtiyac olur. Sözügedən nasos da 12 gün işləmədi, amma hazırda təmir olunub və quyu işə salınıb”.
