Bərdə rayon Kələntərli kənd tam orta məktəbinin idman meydançasında “Şahin” hərbi-idman oyunları üzrə respublika birinciliyinin zona yarışı keçirilib. Yarışda Ağcabədi, Ağdam, Füzuli, Xocalı, Xocavənd, Laçın, Tərtər, Yevlax və Şuşanı təmsil edən komandalar mübarizə aparıb.
ARANTV.AZ xəbər verir ki, əvvəlcə respublikamızın müstəqilliyi və ərazi bütövlüyü uğrunda şəhid olmuş Vətən övladlarının xatirəsi bir dəqiqəlik sükutla yad edilib. Yarışın açılışında Bərdə rayon gənclər və idman idarəsinin rəisi Hikmət Ələkbərli, Gənclər və İdman Nazirliyinin sektor müdiri Əli Məmmədov, Təhsil Nazirliyinin nümayəndəsi Səbuhi İsmayılov, Bərdə Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Samir Səfərov çıxış edərək, “Şahin” hərbi-idman oyunlarının gənclərin hərbi-vətənpərvərlik ruhunda tərbiyə olunmasında əhəmiyyətindən, dövlətimizin gənclərə göstərdiyi diqqət və qayğıdan danışıb, komandalara uğurlar arzulayıblar.
Sonra Dövlət Himninin sədaları altında Azərbaycanın dövlət bayrağı qaldırılıb, yarışa start verilib. Məktəblilər müxtəlif mərhələlərdə qüvvə və bacarıqlarını sınayıblar.
Daha yaxşı nəticə göstərən Yevlax, Ağdam, Füzuli komandaları müvafiq olaraq birinci, ikinci və üçüncü yerlərə layiq görülüblər. Qaliblərə Gənclər və İdman Nazirliyinin müvafiq dərəcəli diplomları təqdim edilib. Yevlax və Ağdam komandaları may ayında Bakıda keçiriləcək final yarışlarında iştirak etmək hüququ qazanıblar.
