Sandiaqo Bivini: Şuşa inanılmaz dərəcədə gözəl şəhərdir
Şuşa inanılmaz dərəcədə gözəl şəhərdir.
ARANTV.AZ xəbər verir ki, bunu Trend-ə TÜRKSOY-a üzv dövlətlərin YUNESKO üzrə Milli Komissiyalarının 9-cu iclasının bağlanış mərasimi çərçivəsində YUNESKO ilə əməkdaşlıq üzrə Ekvatorial Qvineya Milli Komissiyasının baş katibi Sandiaqo Bivini deyib.
“Bu, mənim Şuşaya ilk səfərimdir. Şəhər inanılmaz dərəcədə gözəldir. Səfərin cəmi bir gün davam etməsinə baxmayaraq, biz artıq çox şeyləri görə bilmişik. Deməliyəm ki, müasir infrastruktur və tarixi abidələrin birləşməsi çox valehedicidir. Şuşa şəhərinin gözəlliyini görəndə Azərbaycanın 30 illik erməni işğalı zamanı nələrdən məhrum olduğunu anladım. Hazırda Şuşada gedən quruculuq işləri mənə belə qənaətə gəlməyə imkan verir ki, şəhərin böyük gələcəyi var”, – deyə o bildirib.
S.Bivini Azərbaycanın milli musiqisinə valeh olduğunu da vurğulayıb.
Xatırladaq ki, aprelin 8-də Türk dünyasının 2023-cü il paytaxtı – Şuşa şəhərində TÜRKSOY-a üzv ölkələrin YUNESKO üzrə Milli Komissiyalarının 9-cu iclasının bağlanış mərasimi keçirilib.
Bu tədbir çərçivəsində görüş iştirakçılarına Şuşa şəhərinin görməli yerlərindən biri – Cıdır düzü və qala divarları, eləcə də xalq artistlərinin və əməkdar artistlərin iştirakı ilə muğam konserti təqdim olunub.
