Ürəklərdə əbədi yaşayan Lider
12 dekabr – Azərbaycan xalqı üçün təkcə bir anım günü deyil, eyni zamanda böyük qürur və dərin minnətdarlıq duyğuları ilə dolu bir tarixdir. Bu gün biz müasir Azərbaycanın qurucusu, dahi şəxsiyyət Heydər Əliyevi ehtiramla yad edirik. O yalnız siyasət meydanında deyil, xalqın hər bir nümayəndəsinin həyatında silinməz izlər buraxan əzəmətli bir lider idi.
Ulu Öndər Heydər Əliyev hər zaman xalqı ilə yaxın olub, cəmiyyətin hər təbəqəsinə diqqət və qayğı göstərib. O yalnız mədəniyyət və sənət adamları ilə deyil, eyni zamanda alimlər, mühəndislər, müəllimlər, həkimlər, iş adamları və sadə zəhmətkeşlərlə görüşlər keçirər, onların işinə yüksək dəyər verərdi. Hər bir görüşündə insanların problemlərini dinləyər, onların uğurlarını xüsusi qeyd edərək daha böyük nailiyyətlərə ruhlandırardı.
Ulu Öndər Heydər Əliyevin diqqətini çəkən təkcə böyük uğurlar deyildi; o ən kiçik nailiyyəti belə yüksək qiymətləndirirdi. Hər bir insanın gördüyü işi fərdi yanaşma ilə təhlil edər, onların fəaliyyətini xalqın ümumi rifahı ilə əlaqələndirərdi. Onun üçün mühüm olan insanların gördüyü işin ölkəyə gətirdiyi fayda və bu işə sərf olunan zəhmət idi.
Təsadüfi deyil ki, Ümummilli Lider Heydər Əliyev tez-tez müxtəlif sahələrin nümayəndələrini iş yerində qəbul edərdi. O yalnız onların işini təqdir etməklə kifayətlənməz, həm də onlarla səmimi söhbətlər edərdi. Bu görüşlərdə Heydər Əliyevin yumor hissi də öz sözünü deyirdi. O, məzəli söhbətləri ilə insanların üzündə təbəssüm yaradar, çətin anlarda belə onlara ruh yüksəkliyi bəxş edərdi. Bu onun insanpərvərliyinin və sadəliyinin ən parlaq təzahürlərindən biri idi.
Ulu Öndər Heydər Əliyev üçün hər bir sahə xüsusi önəm daşıyırdı. Elm və təhsilin inkişafı onun siyasətinin prioritet istiqamətlərindən idi. Azərbaycan gənclərinin yüksək səviyyəli təhsil alması üçün əlindən gələni etmiş, onları ölkənin gələcəyini formalaşdıracaq ən güclü təməllərdən biri hesab etmişdir. Tibb sahəsində çalışanların fəaliyyətinə xüsusi diqqət göstərir, səhiyyənin inkişafını xalqın rifahı ilə birbaşa əlaqələndirirdi.
Kənd təsərrüfatından sənayeyə qədər hər bir sahə onun rəhbərliyi altında çiçəklənmişdir. Hər bir kənd sakini onun dəstəyini hiss edir, hər bir sənaye işçisi onun qayğısından güc alırdı. O, iqtisadi inkişafın yalnız böyük şəhərlərlə məhdudlaşmamasını, ölkənin ən ucqar bölgələrinə də çatmasını təmin etməyə çalışırdı.
Ulu Öndər Heydər Əliyevin qeyri-adi yaddaşı və dərin analitik düşüncə qabiliyyəti hər kəsi heyran edirdi. Kimlə harada nə barədə danışdığını dəqiqliklə xatırlayır və həmin anları elə təsvir edirdi ki, sanki o hər bir insanın həyatının bir parçası idi. Bu yaddaş və diqqət onun bir lider kimi böyüklüyünün əsas elementlərindən biri idi.
O yalnız xalqa xidmət etməklə kifayətlənməyib ölkədəki korrupsiya və ədalətsizliyə qarşı da mübarizə aparmışdır. Xalqın üzərində təzyiq yaradan və onlara qarşı ədalətsiz davranan məmurları heç zaman bağışlamazdı. Heydər Əliyev xalqı incidən, onların hüquqlarını pozan məmurları cəzalandırmaqla bütün cəmiyyətə ədalətin təmin olunduğunu göstərmişdir. Bu onun xalqının haqqını qorumağa olan sadiqliyini və hər zaman insanları müdafiə etməyə olan əzmkar mövqeyini ortaya qoyurdu.
Bu yanaşma həm də o demək idi ki, Ulu Öndər Heydər Əliyev xalqın yanında olduğuna hər zaman dəqiq işarələr verirdi. O, məmurların vəzifələrini pisniyyətlə yerinə yetirənləri xalqın içində cəzalandıraraq cəmiyyətə göstərirdi ki, heç kim, heç bir vəzifə xalqın rifahına zərər verə bilməz. Bu mövqe yalnız xalqın deyil, həm də dövlətin əhəmiyyətli inkişafını təmin etmişdir.
Bu gün biz Ulu Öndər Heydər Əliyevi yalnız xatırlamırıq, onun qoyduğu irsi yaşadırıq. Onun həyat və fəaliyyəti bizə yalnız bir liderin yox, həm də insani dəyərləri ilə bütün dünyaya nümunə olmuş bir şəxsiyyətin necə olması gərəkdiyini göstərir.
Ruhunuz şad olsun, Ulu Öndər! Sizin ideyalarınız və gördüyünüz böyük işlər xalqımızın yolunu daim işıqlandıracaq!
Tural Qoca
