“Son zəng”də TƏHLÜKƏLİ dəb – Bu şirkətləri hansı CƏZA gözləyir?
Bu gün – iyunun 13-də ölkə məktəblərində “Son zəng” çalınacaq. Bununla bağlı Bakı Şəhər Dövlət Yol Polisi İdarəsi (BŞDYPİ) qarşıdan gələn “Son zəng” tədbirləri ilə əlaqədar avtomobil icarəsi fəaliyyəti ilə məşğul olan hüquqi və fiziki şəxslərə müraciət edərək onları məsuliyyətli olmağa çağırıb.
BŞDYPİ-dən bildirilib ki, bəzi hallarda məzunlar və ya yetkinlik yaşına çatmayan şəxslər əyləncə məqsədilə müxtəlif nəqliyyat vasitələrini icarəyə götürməyə cəhd edirlər. Lakin nəzərə almaq lazımdır ki, sürücülük hüququ olmayan şəxslərin sükan arxasına əyləşməsi qanunvericiliyin tələblərinə zidd olmaqla yanaşı, onların və digər hərəkət iştirakçılarının həyat və sağlamlıqları baxımından olduqca təhlükəlidir.
Bununla əlaqədar avtomobil icarəsi şirkətlərindən xahiş olunur ki, nəqliyyat vasitələrinin icarəyə verilməsi zamanı sürücülük vəsiqəsinin etibarlılığına, şəxsin yaşına və nəqliyyat vasitəsini idarə etmək hüququna xüsusi diqqət yetirsinlər.
“Son zəng” tədbirləri ilə bağlı əyləncə məqsədilə məktəblilərə və ya sürücülük hüququ olmayan şəxslərə avtomobil təqdim etməsinlər. Belə hal aşkarlandığı təqdirdə həmin şəxslər barəsində qanunamüvafiq tədbirlər həyata keçiriləcək. “Bu məsələdə göstəriləcək həssas yanaşma mümkün xoşagəlməz hadisələrin qarşısının alınmasına və məzun gününün təhlükəsiz şəraitdə keçirilməsinə xidmət edəcək”, – deyə müraciətdə vurğulanıb.
Qeyd edək ki, məzunların “Son zəng”də avtomobil kirayələməsi artıq dəb halını alıb. Ancaq bəzi hallarda bu, faciə ilə nəticələnən yol-nəqliyyat hadisələrinə səbəb olur. Bəs bu çağırışa əməl olunmasa, icarədarları hansı cəza gözləyir?
Musavat.com-un əməkdaşı bir neçə avtomobil kirayəsi şirkəti ilə əlaqə saxlayıb. Saytımıza bildirilib ki, avtomobilin bir günlük kirayə haqqı 50-60 manat arasında dəyişir və avtomobili icarəyə götürən şəxsdən mütləq sürücülük vəsiqəsi tələb olunur.
Nəqliyyat eksperti Elməddin Muradlı saytımıza açıqlamasında bildirib ki, sürücülük hüququ olmayan şəxsə avtomobil verməyə görə məsuliyyət nəzərdə tutulur və buna görə 60 manat məbləğində cərimə tətbiq oluna bilər:
“Təəssüf ki, hər il bu istiqamətdə bəzi avtomobil icarəsi şirkətləri elə elanlar paylaşırlar ki, hətta sürücülük vəsiqəsi olmasa belə avtomobili icarəyə verdiklərini, kömək etdiklərini və sair açıq şəkildə bildirirlər. Bu, birbaşa qanuna zidd davranışdır və insanları qayda pozmağa təşviq edən hərəkətlərdir. Ona görə düşünürəm ki, belə elanlar paylaşan hər bir şirkət aidiyyəti qurumlar tərəfindən nəzarətə götürülməlidir və onlarla bağlı ilk növbədə araşdırma aparılmalıdır. Əgər bu hərəkətləri davam etdirərlərsə, həmin hallara görə müvafiq cəzalar da tətbiq edilməlidir. Hətta fiziki şəxs bu hərəkətləri edirsə, onun məsuliyyəti daha ağır ola bilər.
Amma avtomobilin bir şəxsin adına rəsmiləşdirilib başqa bir şəxs tərəfindən idarə olunması halında həmin icarə şirkətinin heç bir məsuliyyəti yoxdurmu? O şəxsin dedikləri doğrudurmu ki, buna görə insan hər şeyini riskə atmaz? Yetkinlik yaşına çatmayan şəxsə avtomobil vermək olarmı? Düzdür, mənim bildiyimə görə, onlar elanlarda belə təşviqedici ifadələr işlətsələr də, praktikada avtomobili əldə etmək üçün müraciət ediləndə mütləq tələb qoyurlar ki, sürücülük vəsiqəsi olan bir nəfər gəlsin və avtomobil onun adına rəsmiləşdirilsin. Bunu da özlərini sığortalamaq üçün edirlər. İstənilən halda burada qanun pozuntusu əlamətləri var və bu, cinayət xarakterli hərəkətlərin başlanğıcı hesab oluna bilər.
Sabah azyaşlı və ya sürücülük hüququ olmayan şəxs avtomobili idarə edib qəza törətsə, kimisə vurub öldürsə və ya özünün başına hər hansı hadisə gəlsə, həmin şirkət məhkəmə və hüquq-mühafizə orqanları qarşısında cavab verməli olacaq”.
