Xaçmaz gəncləri üçün “Gender bərabərliyini qoruyaq və təşviq edək!” gənclər üçün Forum Teatr layihəsinin seminarlarına başlanılmışdır
“Qadın və Gənc Ailələrin Sosial İnkişafı” İctimai Birliyi və Azərbaycan Respublikası Gənclər və İdman Nazirliyinin maliyyə dəstəyi ilə həyata keçirdiyi “Gender bərabərliyini qoruyaq və təşviq edək!” gənclər üçün Forum Teatr layihəsinin icrasına başlanılmışdır.
Layihənin əsas məqsədi Azərbaycan cəmiyyətində mühüm yeri tutan gənclərə gender bərabərliyini təşviq etmək və gender bərabərsizliyi məişət zorakılığının bir qolu kimi maarifləndirici seminarlar keçmək və gender problemlərini Forum Teatr vasitəsilə cəmiyyətə çatdırmaqdır. Problemin həlli üçün gənclər gender bərabərliyi ilə bağlı seminarlar vasitəsilə və Forum Teatr vasitəsilə maarifləndiriləcəklər.
Layihənin rəhbəri Tünzalə Cavadovanın verdiyi məlumata əsasən, layihə üç ay müddətində Lənkəran və Xaçmaz rayonlarında həyata keçiriləcəkdir. Layihənin iki seminarı Lənkəran şəhərində keçirildikdən sonra Xaçmaz rayonunda layihə davam edir. Belə ki, Xaçmaz rayon 6 saylı tam orta məktəbdə seminar keçirildi. Seminarda 45 nəfər gənc iştirak edirdi. Rayon ağsaqqallar şurasının sədri Məhərrəm Abbasov və Təlimçi Lalə Rəhmətullayeva çıxış edərək ailə dəyərlərimizin çox dərin köklərindən, azərbaycan ailəsinin bu gününü əks etdirən məsələlər barədə danışdılar.Sonda gənclərin sualları cavablandırıldı.
Layihənin davamlılığını təmin etmək məqsədilə, təşkilat təlim iştirakçıları və layihənin ekspert qrupundan ibarət şəbəkə yaradacaq və bu şəbəkədə maarifləndirmə işləri davam etdiriləcəkdir.
Qeyd edək ki, bu layihə Azərbaycan Respublikası Gənclər və İdman Nazirliyi tərəfindən dəstəklənir.
