Diş çürüməsinin qarşısını almağın təbii yolları
Diş çürüməsi müalicə edilmədikdə ağrı, infeksiya və hətta diş itkisinə səbəb ola biləcək ümumi bir problemdir. Müntəzəm olaraq fırçalamaq, diş sapından istifadə etmək və diş həkiminə baş çəkmək vacib olsa da, bəzi alimlər təbii vasitələrin dişləri qorumağa və çürümənin qarşısını almağa kömək edə biləcəyini söyləyirlər.
AZƏRTAC xəbər verir ki, bu barədə “knowridge.com” saytında dərc edilən məqalədə bəhs olunur. Qeyd edilib ki, təbii vasitələr zərərli bakteriyaları azaldaraq dişlərin sağlam qalmasına kömək edə bilər.
Ağızdakı bakteriyalar diş minasını, onun qoruyucu xarici təbəqəsini aşındıran turşular istehsal etdikdə diş çürüməsi baş verir. Bu prosesə şəkərli qidaların müntəzəm qəbulu və düzgün olmayan ağız gigiyenası səbəb olur.
“Journal of Contemporary Dental Practice” nəşrində dərc edilmiş araşdırmaya əsasən müəyyən edilib ki, kokos yağının dişlərə çəkilməsi diş ətinin sağlamlığını yaxşılaşdırır. Bildirilib ki, dişlərə yağ sürtülməsi fırçalama və diş sapından istifadəni əvəz etməsə də, dişlərin qorunmasına faydalı bir əlavə ola bilər.
Digər təsirli təbii vasitə isə yaşıl çaydır. Yaşıl çay antioksidantlarla zəngindir və onun tərkibində katexinlər, antimikrobiyal xüsusiyyətlərə malik birləşmələr var. “Caries Research”də aparılan araşdırma müntəzəm olaraq yaşıl çay içən insanlarda dişdə yaranan bakteriyaların daha aşağı səviyyədə olduğunu müəyyənləşdirib. Gündəlik şəkərsiz yaşıl çay içmək və ya onunla ağız yaxalamaq dişləri qorumaq üçün sadə bir yol ola bilər.
Mixək yağı də uzun müddətdir ki, ənənəvi tibdə diş problemləri üçün istifadə olunur və müasir tədqiqatlar onun faydalarını dəstəkləyir. Onun tərkibində ağrıkəsici və antibakterial xüsusiyyətlərə malik təbii birləşmə olan eugenol var.
Nəzərə alınmalı digər təbii vasitə bəzi saqqızların tərkibindəki şəkər əvəzedicisi olan ksilitoldur. Adi şəkərdən fərqli olaraq, ksilitol ağızda zərərli bakteriyaları qidalandırmır, onların sayını azaltmağa kömək edir və hətta faydalı bakteriyaların böyüməsi üçün mühit formalaşdıra bilər.
“Clinical, Cosmetic, and Investigational Dentistry” jurnalında dərc edilmiş araşdırmada da ksilitol məhsullarının ağız sağlamlığını yaxşılaşdırdığı müəyyənləşdirilib. Yeməkdən sonra belə tərkibdə saqqız çeynəmək dişləri qorumaq üçün əlverişli bir yol ola bilər.
Nəhayət, pəhriz diş çürüməsinin qarşısının alınmasında əsas rol oynayır. Alma və kök yemək dişləri təmizləməyə kömək edə bilər. Pendir və qatıq kimi kalsiumla zəngin qidalar dişləri turşu zədələnməsinə qarşı daha davamlı edir.
Beləliklə, gündəlik vərdişlərə kokos yağı, yaşıl çay və ksilitol kimi təbii vasitələr əlavə etməklə, təbəssümü illər sağlam və parlaq saxlamaq olar.
