Strateji hədəflər Azərbaycanın müstəqil, güclü və nüfuzlu dövlət olaraq inkişafına yeni təkan verəcək
2025-ci il Azərbaycan Respublikasının Prezidenti İlham Əliyevin Sərəncamı ilə ölkəmizdə “Konstitusiya və Suverenlik İli” elan edilib. Bu qərar Azərbaycanın hüquqi və demokratik inkişaf yolunda mühüm mərhələ olmaqla yanaşı, dövlətimizin suverenliyinin tam bərpa olunduğu bir dövrdə mühüm əhəmiyyət kəsb edir. İlin konsepsiyası çərçivəsində həyata keçirilən tədbirlər Azərbaycanın milli müstəqillik yolunda qazandığı nailiyyətlərin daha geniş təbliğini və gələcək inkişaf hədəflərinin müəyyənləşdirilməsini hədəfləyir.
Bu çərçivədə Yeni Azərbaycan Partiyası (YAP) da bir sıra əhəmiyyətli tədbirlərə imza atmaqdadır. “Bəsirətin Zəfəri” adlı tədbir Azərbaycanın müstəqillik tarixinin, zəfər yolunun və gələcək hədəflərinin müzakirəsinə həsr olunub. Müzakirələrdə vurğulanan əsas məqamlardan biri Prezident İlham Əliyevin rəhbərliyi ilə ölkəmizin qazandığı qələbələr və geosiyasi mövqeyinin güclənməsi olub. 2020-ci ildə baş vermiş 44 günlük Vətən müharibəsi Azərbaycanın ərazi bütövlüyünü bərpa etməsi ilə nəticələndi. 2023-cü ilin sentyabrında isə birgünlük lokal antiterror tədbirləri Azərbaycanın Qarabağ üzərində tam suverenliyini təmin etdi. Bu tarixi hadisələr ölkəmizi yeni inkişaf mərhələsinə çıxardı və regionda siyasi-iqtisadi dinamikanı dəyişdirdi. Siyasi sabitlik, milli birlik və iqtisadi inkişaf hazırda Azərbaycanın əsas prioritetlərindəndir. Azərbaycanın müasir konstitusiya quruluşunun təməli Ümummilli Lider Heydər Əliyev tərəfindən qoyulmuşdur. 1995-ci il noyabrın 12-də qəbul edilən Konstitusiya müstəqil dövlətçiliyimizin əsas qanunvericilik bazası kimi ölkəmizin siyasi, hüquqi və iqtisadi inkişafına istiqamət vermişdir. Prezident İlham Əliyevin liderliyi ilə bu xətt daha da inkişaf etdirilərək milli maraqlara əsaslanan, hüquqi və demokratik dəyərlərə söykənən idarəçilik modeli formalaşdırılmışdır.
Son illərdə keçirilmiş prezident, parlament və bələdiyyə seçkiləri də Azərbaycan xalqının bu siyasətə olan inam və dəstəyinin bariz nümunəsi olmuşdur. Prezident İlham Əliyevin apardığı müstəqil və praqmatik siyasət nəticəsində ölkəmiz təkcə Cənubi Qafqazda deyil, daha geniş coğrafiyada nüfuzunu artırmaqda davam edir. Azərbaycanın Şərq-Qərb və Şimal-Cənub nəqliyyat dəhlizlərində əsas tranzit mərkəzlərindən biri olması, regional və beynəlxalq əməkdaşlıq üçün yeni imkanlar yaradır. Zəngəzur dəhlizinin açılması və Orta dəhlizin inkişafı isə Türk dünyasında iqtisadi əlaqələri gücləndirərək yeni çoxtərəfli əməkdaşlıq platformalarına təkan verəcəkdir. Yeni Azərbaycan Partiyası ölkəmizin siyasi sisteminin inkişafına mühüm töhfələr verməyə davam edir. 750 minə yaxın üzvü olan partiya, konstruktiv dialoq və əməkdaşlıq yolu ilə dövlətin suverenliyini, konstitusiya quruluşunu və milli maraqlarını qorumaqda mühüm rol oynayır.
Partiya beynəlxalq əlaqələrini genişləndirərək bir çox ölkələrin aparıcı siyasi partiyaları ilə əməkdaşlıq sazişləri imzalamış və beynəlxalq platformalarda fəal iştirakını təmin etmişdir. Partiya diplomatiyası, dövlətlərarası münasibətlərin möhkəmlənməsi və Azərbaycanın yeni reallıqlarının dünya ictimaiyyətinə çatdırılması baxımından əhəmiyyətlidir. Milli Məclisin deputatı Samir Vəliyevin müəllifi olduğu “Bəsirətin Zəfəri” kitabı, Azərbaycanın müstəqillik dövründə keçdiyi yolu və gələcək hədəflərini araşdıran mühüm elmi-tədqiqat əsəridir. Kitabda Azərbaycanın dövlətçilik ənənələri, siyasi və iqtisadi inkişafı, konstitusiya quruluşu və beynəlxalq arenadakı rolu təhlil edilir. “Konstitusiya və Suverenlik İli” çərçivəsində görülən işlər və müəyyən olunan strateji hədəflər Azərbaycanın müstəqil, güclü və nüfuzlu dövlət olaraq inkişafına yeni təkan verəcəkdir. Prezident İlham Əliyevin liderliyi ilə həyata keçirilən siyasət, milli maraqlara əsaslanan strateji addımlar və beynəlxalq əlaqələrin gücləndirilməsi Azərbaycanı yeni qlobal çağırışlara hazır bir dövlət kimi formalaşdırır.
Bu il ərzində həyata keçirilən tədbirlər, o cümlədən “Bəsirətin Zəfəri” kimi təşəbbüslər, Azərbaycanın demokratik inkişaf yolunu, suverenliyinin möhkəmlənməsini və dövlətçilik maraqlarının qorunmasını daha da gücləndirəcəkdir. Azərbaycan öz Konstitusiyasına, müstəqilliyinə və suverenliyinə əsaslanaraq qətiyyətlə irəliləyir və bu yol daha böyük uğurların müjdəsidir.
Səbinə Kazımova, “İki sahil”
