Dərman qəbul edərkən hansı meyvə şirəsini içmək olmaz? – Faydasını heç edir
Qreypfrut, portağal və nar kimi sitrus meyvələri bəzi dərmanlarla qarşılıqlı təsir göstərə bilər. Xüsusilə qreypfrut şirəsi dərmanların metabolizmini ləngidərək onların təsirini gücləndirə bilər. Bu, dərmanların bədəndə daha uzun müddət qalmasına və toksiklik riskinin artmasına səbəb olur.
Sitrus meyvələrinin tərkibindəki furanokumarinlər qaraciyərdəki sitokrom fermentini bloklayaraq dərmanların parçalanmasını çətinləşdirir. Bu təsir nəticəsində bəzi dərmanların dozası orqanizmdə qeyri-adi dərəcədə yüksələ bilər. Xüsusilə xolesterol əleyhinə dərmanlar, qan durulaşdırıcılar və immunosupressiv preparatlar üçün bu təsir təhlükəlidir.
Təkcə təzə meyvələr deyil, qreypfrut mürəbbəsi və marmeladları da eyni riski daşıyır. Hətta bir stəkan qreypfrut suyu belə bu təsirləri yarada bilər və təsiri saatlarla, hətta günlərlə davam edə bilər. Nar və portağal şirəsi də müəyyən dərmanlarla oxşar qarşılıqlı təsir göstərə bilər.
Bu qarşılıqlı təsirlər ürək ritminin pozulması, qaraciyər və böyrək problemləri kimi ciddi fəsadlara səbəb ola bilər. Yaş artdıqca bu risklər daha da yüksəlir. Sitrus ətirli çaylar və içkilər də müəyyən dərəcədə təhlükə yarada bilər.
Mütəxəssislər dərmanları yalnız su ilə qəbul etməyi tövsiyə edirlər. Su, dərmanların təsirini dəyişdirmədən təhlükəsiz qəbulunu təmin edən ən uyğun vasitədir.//E-saglam.az
