Fərid Şahbazlı ATƏT-də Ermənistanın mina terrorunu və dezinformasiya siyasətini ifşa etdi – FOTOLAR
“İslahatçı Gənclər” İctimai Birliyinin sədri Fərid Şahbazlı Avstriyanın paytaxtı Vyanada şəhərində ATƏT tərəfindən təşkil olunan “Münaqişə və humanitar böhranlar dövründə medianın rolu” mövzusunda keçirilən beynəlxalq konfransda iştirak edib. Tədbirdə ATƏT-ə üzv ölkələri təmsil edən diplomatlar, media və qht təmsilçiləri, rəsmi nümayəndə heyətləri iştirak edib. Tədbirdə çıxış edən Fərid Şahbazlı Ermənistanın dezinformasiya siyasəti və mina terroru haqqında məlumat verib.
Fərid Şahbazlının çıxışını olduğu kimi təqdim edirik:
Hörmətli konfrans iştirakçıları,
Dezinformasiya bu gün qlobal informasiya mühitinin ən təhlükəli elementlərindən biridir. Xüsusilə, münaqişə bölgələrində saxta məlumatların yayılması təkcə ictimai rəyi manipulyasiya etmir, həm də sülh və sabitliyə ciddi təhdid yaradır. Ermənistanın Qarabağ məsələsi ilə bağlı illərdir apardığı dezinformasiya siyasəti bunun ən açıq nümunələrindən biridir.
Bu kontekstdə Azərbaycanın üzləşdiyi ən ciddi problemlərdən biri Ermənistanın uzun illər boyu apardığı sistemli dezinformasiya kampaniyalarıdır. Xüsusilə, Qarabağ münaqişəsi və post-müharibə dövründə Ermənistanın beynəlxalq ictimaiyyəti çaşdırmaq üçün uydurma xəbərlər yayması, saxta humanitar böhran görüntüsü yaratması və tarixi faktları təhrif etməsi bunun açıq sübutudur.
Dezinformasiyanın əsas məqsədi reallıqları gizlətmək, beynəlxalq ictimaiyyəti yanlış yönləndirmək və informasiya məkanında haqlı tərəfi günahkar kimi göstərməkdir. Ermənistan mediası və onun dəstəklədiyi lobbi qrupları saxta görüntülər, yalan məlumatlar və manipulyativ hesabatlarla Azərbaycan əleyhinə kampaniyalar aparır. Bu cür hallar yalnız Azərbaycanı hədəf seçmir, eyni zamanda beynəlxalq ictimaiyyəti aldatmaq və ədalətdən yayınmaq məqsədi daşıyır.
Xüsusilə qeyd etmək istəyirəm ki, Ermənistanın müharibədən keçən 5 il ərzində mina xəritələrinin Azərbaycana tam və doğru təqdim etməməsi səbəbindən Qarabağda çox sayda mülki şəxs və jurnalistlər həyatını itirib. Bu dəhşət hələ də davam edir.
ATƏT və beynəlxalq təşkilatlar dezinformasiya ilə mübarizədə ədalətli yanaşma sərgiləməli, media platformalarında qərəzli və manipulyativ məlumatların yayılmasına qarşı effektiv mexanizmlər formalaşdırmalıdır. Çünki saxta informasiya təkcə dövlətlərarası münasibətlərə deyil, bütövlükdə qlobal təhlükəsizliyə və sabitliyə ciddi təhdid yaradır.
Biz həqiqəti müdafiə etməyə davam etməliyik. Çünki doğru informasiya olmadan nə demokratiya, nə sülh, nə də beynəlxalq əməkdaşlıq mümkündür.
