Rusiya dövlət təbliğat maşını Azərbaycanı hədəfə alan yeni bir informasiya hücumu mərhələsinə keçib. Bu dəfə Moskva açıq şəkildə Azərbaycan diasporunu Ukrayna kəşfiyyatının hərbi-sabotaj əməliyyatlarına cəlb etməkdə ittiham edir.
Rusiyanın ultra-millətçi və Kreml nəzarətində olan “Tsargrad TV” kanalı vasitəsilə yayımlanan süjetlərdə iddia olunur ki, Ukraynanın “Pautina” (“Hörümçək toru”) adlı əməliyyatı – Rusiya ərazisində yerləşən strateji bombardmançı təyyarə bazalarına qarşı həyata keçirilmiş diversiya – guya Azərbaycan diasporunun köməyi və maliyyə dəstəyi ilə baş tutub.
Bu iddialar ilk baxışdan absurddur, lakin məqsəd aydındır: Rusiyada yaşayan milyonlarla azərbaycanlını, xüsusilə ictimai fəallıq göstərən diaspora liderlərini ləkələmək, hədəfə qoymaq və hüquqi və ya fiziki təzyiqlərlə üz-üzə buraxmaq. Daha əvvəl də Rusiya hüquq-mühafizə orqanları azərbaycanlı aktivistləri saxlayıb, evlərində axtarışlar aparıb, bəzi hallarda isə hətta qətllər baş verib. Yekaterinburq hadisələri hələ də yaddaşlardadır. Eləcə də bir neçə gün öncə Moskva vilayətində Azərbaycan diasporunun rəhbərlərindən biri olmuş Elşən İbrahimovun deportasiyası bu qəbildəndir.
Lakin ilk dəfədir ki, Kreml təbliğatçıları bu qədər irəli gedərək Azərbaycanı birbaşa Ukrayna kəşfiyyat əməliyyatına ortaq kimi təqdim edirlər.
Akif Nağı: “Rusiya Azərbaycana qarşı aqressiv münasibət sərgiləməyi vərdiş halına salıb”
Azad Vətən Partiyasının sədri Akif Nağı Musavat.com-a açıqlamasında bildirib ki, Rusiyanın bu davranışlarının bir neçə səbəbi var:
“Ən əsas səbəb Rusiyanın regionda təsir imkanlarının azalması və Zəngəzur dəhlizi ilə bağlı danışıqlardan kənarda qalmasıdır. Hətta Rusiyanın Ermənistandakı təsir imkanları da xeyli məhdudlaşıb. Rusiya Azərbaycanda illər əvvəlki nüfuzunu bərpa etməyə çalışır, lakin dövlətimiz buna müqavimət göstərir. Buna görə də Rusiyada ölkəmiz əleyhinə süjetlər hazırlanır, təbliğat aparılır”.
Akif Nağının sözlərinə görə, Rusiyada Azərbaycan haqqında süni təəssürat yaradılaraq, guya ölkənin çökməkdə olduğu və yalnız Rusiyanın onu “xilas edə biləcəyi” iddia olunur. İdxal statistikası manipulyasiya edilərək təqdim edilir, azərbaycanlıların çalışdığı bazarların bağlanacağı ilə bağlı hədələr səsləndirilir, diaspor nümayəndələri kriminal əlaqələrdə ittiham edilir.
“Azərbaycan diasporasının Ukrayna kəşfiyyatı ilə əlaqəsi iddiası əsassızdır”
Partiya sədri Azərbaycan diasporasının Ukrayna kəşfiyyatı ilə iş birliyində ittiham edilməsini tamamilə əsassız sayır:
“Minlərlə azərbaycanlı Rusiya ordusunda xidmət edir və bir çoxu müharibədə həlak olub. Belə ittihamlarla onların ruhu təhqir olunur. Azərbaycan diasporası heç vaxt Ukrayna kəşfiyyatı ilə ittifaq qurmaz”.
O əlavə edib ki, Rusiyadakı diaspora təşkilatları ilə sıx əlaqələri var və son olaylar, xüsusilə Elşən İbrahimovun deportasiyası bu təzyiqlərin bariz nümunəsidir:
“Elşən İbrahimov Moskva ətrafındakı diaspora təşkilatlarının lideri idi. Onun vətəndaşlığını əlindən alıb, deportasiya etdilər. Onunla şəxsən görüşdüm, hələ də nə baş verdiyini bilmir. Uraldakı Azərbaycan diasporunun rəhbəri Şahin Şıxlinski də çox nüfuzlu şəxsdir, Rusiyada xeyriyyə işləri ilə məşğuldur və heç vaxt qanun pozuntusuna yol verməyib”.
Akif Nağı bildirib ki, Rusiyanın məqsədi Azərbaycana siyasi təzyiqlər göstərməkdir:
“Ötən gün dövlət başçısı İlham Əliyev də Xankəndidə keçirilən forumda çıxışı zamanı bildirdi ki, təyyarənin vurulması ilə bağlı Rusiya cavab verməlidir. Azərbaycanın Rusiyadan asılılığı yoxdur, istəyərsə, başqa iqtisadi bazarlar da tapar. Çinlə, Avropa ilə əlaqələrimiz mövcuddur. Azərbaycan hələ ki səbirli davranır. Görək, daha nə qədər sarsaqlayacaqlar”.
Şahanə Rəhimli
Musavat.com
