22 İyul – Azərbaycan Milli Mətbuat Günü
“Milli mətbuatımızın inkişaf mərhələləri Azərbaycan xalqının azadlıq, müstəqillik uğrunda mübarizə tarixinin tərkib hissəsidir. “Əkinçi”dən üzü bəri azadlıq, demokratiya, müstəqillik uğrunda mücadilə dərslərini biz milli mətbuatımızın səhifələrindən öyrənmişik.”
Ulu Öndər Heydər Əliyev.
Azərbaycan xalqının ictimai, siyasi və mənəvi həyatında mühüm rol oynayan bir tarix var: 22 iyul. Bu gün ölkəmizdə Milli Mətbuat Günü kimi qeyd olunur. Tarixi əhəmiyyət daşıyan bu gün 1875-ci ildə Həsən bəy Zərdabinin təşəbbüsü ilə nəşr olunan ilk milli qəzet – “Əkinçi” qəzetinin çap olunması ilə bağlıdır. “Əkinçi” qəzeti təkcə bir nəşr deyildi, o, milli mətbuatın, azərbaycançılığın, xalq maarifçiliyinin başlanğıcı idi.
Həsən bəy Zərdabi savadsızlıqla mübarizə aparmağın, xalqı maarifləndirməyin yeganə yolunu mətbuatda görürdü. Onun bu uzaqgörən və fədakar addımı nəticəsində Azərbaycanda milli mətbuat ənənəsi yaranmağa başladı. “Əkinçi” sadə dildə yazılır, kəndlinin, müəllimin, xalqın gündəlik problemlərindən bəhs edirdi. Bu, xalqla ünsiyyət qura bilən, onu anlayan və ona xidmət edən bir mətbuat nümunəsi idi.
Sonrakı illərdə bu yol davam etdirildi. “Ziya”, “Kaspi”, “Molla Nəsrəddin” və s kimi nəşrlər ictimai-siyasi fikir tariximizdə dərin iz buraxdı. Xüsusilə “Molla Nəsrəddin” satirik üslubla xalqı düşündürən, tənqid edən və maarifləndirən bir tribuna oldu.
Milli mətbuatımızın inkişafı ulu öndər Heydər Əliyevin adı ilə bağlıdır. Ulu Öndərin 1993-cü ildə xalqın təkidli tələbi ilə hakimiyyətə qayıdışı mətbuatımızın inkişaf tarixində də yeni mərhələ açdı.
1998-ci ildə ümummilli lider Heydər Əliyev tərəfindən Azərbaycan mətbuatının üzərindən dövlət senzurasının ləğv edilməsi ilə ölkəmizdə söz və mətbuat azadlığının əsası qoyuldu və bu, mətbuatın inkişafına ciddi təkan verdi.
Ulu Öndərin mətbuata və mətbuat nümayəndələrinə göstərdiyi diqqət və qayğı Ümummilli Liderin layiqli varisi ölkə Prezidenti cənab İlham Əliyev tərəfindən uğurla davam etdirilir. Ölkəmizdə söz və mətbuat azadlığı tam təmin olunub. Təsadüfi deyil ki, hazırda respublikada çoxlu sayda müxtəlif qəzet və jurnallar nəşr olunur, internet qəzetçilik inkişaf edir. Müasir dövrdə informasiya texnologiyalarının inkişafı Azərbaycan mətbuatını qlobal informasiya şəbəkəsinin bir hissəsinə çevirib. Bu gün müstəqillik yolu ilə inamla irəliləyən və hərtərəfli inkişaf edən Azərbaycanda söz və mətbuat azadlığının təmin olunması istiqamətində ciddi addımlar atılır, bu sahənin inkişafı ilə bağlı bir sıra uğurlu layihələr həyata keçirilir.
Azərbaycan Prezidenti cənab İlham Əliyevin 2009-cu ilin martında imzaladığı Sərəncamla Prezident yanında Kütləvi İnformasiya Vasitələrinə Dövlət Dəstəyi Fondu yaradıldı. Fondun yaradılmasında məqsəd Azərbaycanda fikir, söz və məlumat azadlığı şəraitini yaxşılaşdırmaq, o cümlədən buna xidmət edən kütləvi informasiya vasitələrinə dövlət dəstəyinin əyani təzahürüdür.
Müasir dövrdə media sadəcə informasiya mənbəyi deyil, eyni zamanda cəmiyyətin inkişafına təsir edən mühüm bir qüvvəyə çevrilib. Jurnalistlər ictimai nəzarət mexanizminin bir hissəsidir. Onlar cəmiyyətdə şəffaflıq, ədalət və obyektivliyin qorunmasında vacib rol oynayırlar.
Lakin informasiya axınının sürətlənməsi, sosial medianın geniş yayılması bəzi hallarda dezinformasiyanın yayılmasına da səbəb olur. Bu da peşəkar, məsuliyyətli və vicdanlı jurnalistikanın əhəmiyyətini bir daha ön plana çıxarır. Məhz bu səbəbdən mətbuat işçilərinin etik prinsiplərə, obyektivliyə, dəqiqliyə sadiq qalması vacibdir.
Mətbuat – sadəcə xəbər daşıyıcısı deyil, cəmiyyətin aynasıdır. Jurnalist – sadəcə söz adamı deyil, vicdanın, obyektivliyin və ictimai məsuliyyətin daşıyıcısıdır. Xalqla dövlət arasında körpü rolunu oynayan media nümayəndələri zaman-zaman çətinliklər, təzyiqlər, risklər qarşısında dayanaraq həqiqəti qorumağa çalışıblar. Bu peşə fədakarlıq və güclü mənəvi dayaq tələb edir.
22 iyul təkcə peşə bayramı deyil, həm də mətbuatın cəmiyyətdəki rolunun, jurnalistlərin zəhmətinin tanınması günüdür. Bu münasibətlə bütün qələm sahiblərini, media nümayəndələrini təbrik edir, onlara uğurlar arzu edirik.
Mətbuat yaşadıqca cəmiyyət danışacaq, düşünəcək və inkişaf edəcək.
Paşayev Ələddin – Livepress.media saytının redaktoru
