Beynəlxalq Qırmızı Xaç Komitəsi (BQXK) Bakı və İrəvan arasında sülh sazişi çərçivəsində itkin düşən şəxslərin axtarışı məsələsi üzrə Azərbaycanla əməkdaşlığın davam etdirilməsinə ümid edir.
Bu barədə jurnalistlərə BQXK-nın Ermənistanda nümayəndəliyinin rəhbəri Dafne Mare bildirib.
O əlavə edib ki, BQXK bütün bu illər ərzində Azərbaycan tərəfi ilə fəal işləyib, itkin düşənlər haqqında məlumatları ötürüb.
D.Marenin sözlərinə görə, Ermənistan və Azərbaycan arasında sülh müqaviləsinin mətnində itkin düşənlərin taleyinin aydınlaşdırılması üçün beynəlxalq qurumlarla işləmək zərurəti qeyd olunub: “Məhz bu kontekstdə Qırmızı Xaç ümid edir ki, onun səylərinə ehtiyac olacaq”.
O, BQXK-nın Bakıdakı ofisinin 2025-ci il sentyabrın 3-də bağlanacağını xatırladıb.
“Lakin Azərbaycan rəhbərliyi ilə iş davam etdiriləcək, hakimiyyətlə əlaqə kəsilməyəcək, bu barədə müzakirələr davam edir. Bu kontekstdə ən vacib məsələlərdən biri itkin düşən şəxslər problemidir və təbii ki, Qırmızı Xaç neytral tərəf və vasitəçi kimi bu problemin həlli prosesində iştirak etməyə ümid edir”, – D.Mare bildirib.//Report
