Azərbaycandan Paşinyana “Daşnaksutyunu bağla” çağırışı
Qarabağdan könüllü köçmüş ermənilər və Daşnaksutyun Partiyası sentyabrın 2-də Ermənistanı qarışdırmağa hazırlaşırlar. Onlar bu planlarına 2 sentyabrda İrəvanda mitinq keçirməklə start vermək qərarına gəliblər. Bütün Ermənistan əhalisinə mitinqə qatılmaq çağırışı edirlər.
Bəs bu proses necə nəticələnə bilər?
Ədalət Partiyasının sədri Mütəllim Rəhimli Musavat.com-a bildirib ki, Daşnaksutyun partiyası 1988-ci ildə keçirdiyi qurultayında bir məsələni müzakirəyə çıxarıb. Bu da Ermənistanın ərazisinin genişləndirilməsi ilə bağlı olub. Qurultay iştirakçıları bu prosesi Gürcüstan, yoxsa Azərbaycandan başlanılmasını müəyyənləşdirməli idilər. Səs çoxluğu ilə qərara alındı ki, Azərbaycandan başlanılsın. Bundan sonra Ermənistandan azərbaycanlılar qovuldu, ərazilərimiz işğal olundu. Daşnaksutyun “böyük Ermənistan” ideyasını indi də davam etdirir: “Onlar qonşu ölkələrə qarşı ərazi iddialarından əl çəkməyiblər. Daşnaksutyunun mövcudluğu onun qonşulara ərazi iddialarına bağlıdır. Ona görə də bütün gücünü toplayaraq Ermənistan dövlətinin indiki siyasətinə qarşı çıxır. Zənnimcə, bu Daşnaksutyunun son çırpıntılarıdır. Çünki ermənilər də başa düşməyə başlayıblar ki, onlara verilən vədlər reallığa uyğun deyil, utopiyadır. Bu ideyanı dəstəkləmək isə onlara yalnız bədbəxtlik gətirir. Paşinyan hakimiyyətinin apardığı siyasət Daşnaksutyun partiyasının görüşləri ilə daban-dabana ziddiyyət təşkil edir. Bu isə onu deməyə əsas verir ki, bu qüvvələr arasında mübarizə ən sərt şəkildə gedəcək. Paşinyanın geri çəkilməsi onun hakimiyyətinin bitməsi ilə nəticələnə bilər. Buna görə də onun geriyə yolu yoxdur. Mütləq şəkildə Daşnaksutyunun Ermənistanda və bacarsa ölkə sərhədlərindən kənarda sütunlarının dağıdılması və məhvinə nail olmağa çalışacaq. Paşinyan Ermənistanı və bütün regionu Daşnaksütyun bəlasından qurtarmaq üçün həmin bədnam partiyanın fəaliyyətinə qadağa qoydurub onu bağlatmalıdır”.
Partiya sədrinin fikrincə Paşinyan 2 sentyabr mitinqinə icazə verəcək ki, Daşnaksutyunun sosial dayaqlarının olmadığı bu mitinqlə bir daha ortaya çıxmış olsun: “Paşinyan hesab etsə ki, 2 sentyabr mitinqinə qatılım kütləvi olacaq bu aksiyanın keçirilməsinə imkan verməyəcək və onun qarşısını zorakılıqla da olsa alacaq. Paşinyanın artıq əlində imkanlar var ki, sülh prosesinə mane olan qüvvələri təxribatçı kimi mühakimə etsin və onların məsuliyyətə cəlb edilməsini reallaşdırsın. Yəqin ki, yaxın zamanlarda bunu müşahidə edə bilərik. Azərbaycan-Ermənistan arasında sülh prosesini dayandırmaq mümkün deyil. Proses başlayıb və geri dönməz xarakter alıb. Sadəcə olaraq bəzi qüvvələr bunu müəyyən qədər yubada bilərlər. Lakin bu da müvəqqəti xarakter daşıyacaq”.
Etibar Seyidağa,
Musavat.com
