“Başlıbelin İnkişafına Dəstək” İctimai Birliyi Azərbaycan Respublikası Qeyri-Hökumət Təşkilatlarına Dəstək Agentliyinin dəstəyi ilə “113 gün düşmən arxasında mübarizə: Başlıbel qətliamının bilinməyən tərəfləri” adlı layihənin icrasına başlayıb.
Layihənin rəhbəri, “Başlıbelin İnkişafına Dəstək” İctimai Birliyinin sədri Vüqar Həşimovun Musavat.com-a verdiyi məlumata görə, sentyabrın 1-dən icrasına başlanan layihə iki ay müddətində icra ediləcək. Layihə çərçivəsində Başlıbel qətliamının şahidi olan və 113 gün mühasirə həyatı yaşayan şahidlərin 2 aydan artıq müddətdə partizan mübarizəsi apardıqları və Başlıbel kəndinin işğalından sonra heç bir çəkiliş aparılmayan “Nəbi kahası” adlanan ərazidə, həmçinin “Barıdlı kahası” adlanan ərazidə 2 hər biri 20 dəqiqəlik videosüjet çəkiləcək. Çəkilən videolarda şahidlərin Başlıbel qətliamı ilə bağlı gördükləri, ermənilərin törətdiyi insanlıq əleyhinə cinayətləri ilə bağlı şahidi olduqları hadisələr və mühasirə həyatı ilə bağlı fikirləri əks olunacaq. Həmin videolar Bashlibel.az saytında yerləşdirilərək hadisənin canlı şahidlərinin ifadələri arxivləşdiriləcək.
Layihə rəhbərinin sözlərinə görə, bundan başqa layihə çərçivəsində Bakı Mühəndislər Universiteti, Bakı Dövlət Universiteti və Azərbaycan Texniki Universitetində tələbələrin Başlıbel qətliamı ilə bağlı məlumatlandırılması tədbirləri keçiriləcək. Tələbələrlə görüş zamanı layihənin eksperti tərəfindən onlara ermənilərin Başlıbeldə törətdiyi qətliam, tarixi, mədəni abidələrə, təbiətə qarşı vandalizm hərəkətləri, doğma torpaqlarını tərk etməyən mülki insanların vətən sevgisi, düşmən arxasında 113 gün mühasirə həyatı, apardıqları partizan mübarizəsi ilə bağlı məlumat veriləcək.
Başlıbel qətliamının törədildiyi ərazidən çəkilən videosüjet vasitəsilə doğma torpaqlarını tərk etməyən mülki insanların düşmən arxasında apardıqları yaşam mübarizəsi ilə bağlı gənc nəsildə təsəvvür yaradılacaq. Başlıbel qətliamının şahidi olan və düşmənlə 113 gün mübarizə aparan şahidlər ermənilərin xalqımıza qarşı törətdiyi müharibə cinayətləri ilə bağlı tələbələrə məlumat verəcək və onların sualları cavablandırılacaq.
Musavat.com
