Xəbər verildiyi kimi, Prezident İlham Əliyev bu gün Elxan Oqtay oğlu İbrahimovu Kürdəmir Rayon, Natiq Nuşravan oğlu Ağayevi Göyçay Rayon, Vüqar Vahid oğlu Novruzovu Naftalan Şəhər, Elvin Nazim oğlu Paşayevi Göygöl Rayon, Orxan Çingiz oğlu Mürsəlovu Gədəbəy Rayon İcra Hakimiyyətinin başçısı vəzifəsindən azad edib. Bu barədə ölkə Prezidenti sərəncamlar imzalayıb.
Prezidentin digər sərəncamları ilə Natiq Nuşravan oğlu Ağayev Balakən Rayon İcra Hakimiyyətinin başçısı, Vüqar Vahid oğlu Novruzov Göygöl Rayon İcra Hakimiyyətinin başçısı, Orxan Çingiz oğlu Mürsəlov Göyçay Rayon İcra Hakimiyyətinin başçısı, Elxan Oqtay oğlu İbrahimov Bakı şəhəri Nəsimi Rayon İcra Hakimiyyətinin başçısı təyin edilib.
Bundan başqa Prezident Elvin Nazim oğlu Paşayevi Qax Rayon İcra Hakimiyyətinin başçısı, Elşən Nazim oğlu Həsənlini Kürdəmir Rayon İcra Hakimiyyətinin başçısı təyin edib.
İcra başçılarının yerinin dəyişdirilməsi və yeni icra başçılarının təyinatı prosesi Prezidentin kadr islahatlarının tərkib hissəsi kimi dəyərləndirilir.
İcra başçıslarının yeri dəyişdi. Bu proses nə vəd edir?
Milli Məclisin deputatı Arzuxan Əlizadə Musavat.com-a bildirib ki, rayon və şəhər icra başçılarının təyinatı ölkə Prezidentinin səlahiyyətlərinə aid məsələdir:
“Təbii ki, son vaxtların prosesləri çərçivəsində müəyyən təyinatlar, qərarlar müəyyən maraq doğura bilər. Amma istənilən halda hesab edirəm ki, bugünkü sərəncamlar təbii bir prosesdir. Prezident təyin etdiyi icra başçıları və xüsusi nümayəndə ilə görüşdə onlara və bütün məmurlara bir daha qəti tapşırıq verib ki, onların qarşısında qoyulan vəzifələri yüksək şəkildə həyata keçirsinlər və ilk növbədə xalqa xidmət etsinlər, xalqla bir yerdə olsunlar. Cənab Prezidentin dedikləri hesab edirəm ki, məmurların işində öz təsirini göstərəcək”.
Deputat icra başçısı təyin olunan şəxslərin 1980-ci illərdə doğulmuş şəxslər olmasının gənc kadrlara yüksək etimad göstərilməsi, gənclərin potensialından istifadə edilməsi olduğunu deyib: “Bunun özü həm də bir islahatdır. Gənc kadrların üzərinə düşən Prezidentin dediyi kimi, yaxşı işləmək, xalqla bir yerdə olmaq, xalqa xidmət etməkdir”.
