Prezidentdən mühüm MESAJLAR – Öz ata-baba yurdlarına qayıdacaqlar!
Prezident İlham Əliyev “Mədəni irs və qayıdış hüququ: Ermənistandan didərgin salınmış azərbaycanlıların mədəni irsinin bərpası – ədalətə, barışığa və sülhə aparan yol kimi” mövzusunda III beynəlxalq konfransın iştirakçılarına müraciətində bildirib ki, Ermənistandakı Azərbaycan mədəni irsinin bərpası və qorunması Azərbaycan xalqının legitim tələbi olmaqla, ümumbəşəri dəyərlərə hörmət, düşmənçilik səhifəsinin qapanması, xalqlar arasında qarşılıqlı anlaşma üçün zəruridir.
“İnanırıq ki, Qərbi Azərbaycan İcmasının sülhsevər üzvləri öz ata-baba yurdlarına qayıdacaq və xalqlarımız arasında mehriban qonşuluq münasibətləri yaranacaq”, – dövlət başçısı qeyd edib.
Milli Məclisin deputatı Elman Nəsirov Musavat.com-a bildirib ki, Prezident İlham Əliyevin bu müraciəti Azərbaycanın Ermənistanla sülh müqaviləsi imzalamaqda olduqca maraqlı olduğunun, bu istiqamətdə konkret təşəbbüslərə malik olduğunun təsdiqidir:
“Eyni zamanda dövlət başçımızın müraciətində qeyd olunduğu kimi, sülhə gedən yol xüsusilə də Ermənistanda azərbaycanlıların mədəni irsinin bərpası və qorunması ilə bağlı qarşı tərəfin atacağı addımlarla da şərtlənir. Biz legitim haqqımızı tələb edirik və bu, ümumbəşəri dəyərlərə hörmətin ifadəsidir. Yəni Ermənistan dövləti doğrudan da Azərbaycanla münasibətlərin bərpasında maraqlıdırsa, deməli, ölkəsindəki azərbaycanlılara məxsus mədəni irsi qorumalı, ona hörmətlə yanaşmalıdır. Yol bundan keçir.
Dövlətimizin başçısı o məqama da xüsusi diqqət yetirib ki, Qərbi Azərbaycana qayıdan soydaşlarımız orada öz fəaliyyətləri ilə nəticə etibarilə iki dövlət və iki xalq arasında mehriban qonşuluq münasibətlərinin yaranmasına da töhfə verəcəklər. Azərbaycan xalqı sülhpərvər xalqdır və biz istər sərhədlərimiz daxilində, istərsə də sərhədlərimiz xaricində həmişə sülhün, sabitliyin tərəfdarı olmuşuq. Azərbaycan daim sülh təşəbbüskarı olub.
Cənab Prezidentin müraciəti bir həqiqəti də ortaya qoydu ki, biz mütləq Qərbi Azərbaycana qayıdacağıq. Bu qayıdışın mahiyyəti dəfələrlə dövlətimizin başçısının çıxışlarında ifadə olunub ki, biz tankla deyil, avtomobillə qayıdacağıq və qayıdışımız sülhə xidmət edəcək”.
Deputat onu da deyib ki, Azərbaycan Ermənistanla əbədi düşmən olmaq mövqeyində deyil:
“Ermənistanla münasibətlərdə yeni bir səhifənin açılmasında maraqlıyıq. Amma eyni zamanda ermənilərin xalqımıza qarşı törətdiyi soyqırımı cinayətlərini, hərbi cinayətləri unutmamaq şərti ilə. Unutqanlıq bağışlanmazdır.
Cənab Prezidentin müraciətində ana xətt onu təşkil edir ki, sülhə gedən yol qarşılıqlı əməkdaşlıqdan, qarşılıqlı etimaddan keçir. Qarşılıqlı etimadın formalaşması üçün Ermənistanda azərbaycanlılara məxsus mədəni irsin qorunması işinə Ermənistan dövləti töhfə verməlidir”.
Etibar Seyidağa,
Musavat.com
