“Volqa çayından suyun istiqaməti dəyişdirilib və o, artıq tam şəkildə Xəzərə axmır. Bu, təbii proses deyil, insan müdaxiləsinin nəticəsidir. Bərpa məsələsində isə vaxt çox önəmlidir. Tələsmək lazımdır. Əgər üç il ərzində ciddi addımlar atılmasa, Xəzər çox sürətlə qurumağa başlayacaq”.
Bunu tanınmış ekstrasens Qalina Bağırova Minval Politika-ya müsahibəsində 2026-ci illə bağlı proqnozlarında deyib.
Onun sözlərinə görə, dənizin geri çəkilməsi zəlzələlərin daha tez-tez və güclü baş verməsinə səbəb ola bilər, çünki dəniz seysmik titrəmələri müəyyən qədər saxlayır. Ekstrasens haqlımı? Belə bir təhlükə varmı? Bakıya mümkün seysmoloji təsirlər hansılardır?
Yada salaq ki, 2025-ci il üçün də həm ekstrasesnslər, həm də seysmoloqlar qorxuducu proqnozlar vermişdilər. Hətta istanbul üçün dağıdıcı zəlzələnin olacağı deyilirdi. Amma görünən o oldu ki, hiss olunan zəlzələlər olsa da, dağıdıcı zəlzələlərlə bağlı proqnozlar özünü doğrultmadı.
Geologiya və Geofizika İnstitutunun şöbə müdiri, elmlər doktoru Qulam Babayev mövzu ilə bağlı fikirlərini Musavat.com-la bölüşüb:
Mən ekstrasensin dediyinə inanmıram. Amma məsələ burasındadır ki, Xəzər dənizi çox mürəkkəb bir tektonik, geodinamik quruluşa malik ərazidir. Hər hansı bir proses baş verəndə – suyun çoxalması, çəkilməsi və sair, dənizin geodinamik vəziyyətinə təsir edə bilər. Çünki bunlar bir-birilə əlaqədar olan proseslərdir. Suyun birdən-birə azalıb-çoxalması, geri çəkilməsi, mütləq şəkildə zəlzələnin baş verəcəyinə dəlalət etmir. Amma dəqiq qanunauyğunluq da yoxdur. Təsir göstərə bilər, effekt ola bilər. Amma Xəzər dənizinin suyu azalır, bu mütləq şəkildə zəlzələyə yol açır, belə bir yanaşma yoxdur. Ona görə də mən bunu yüz faiz əlaqələndirməzdim. Xəzər dənizi mürəkkəb bir geodinamik ərazidir. Burada seysmik ocaqlar zəngindir, müxtəlif geoloji qırılmalar mövcuddur”.
Afaq Mirayiq
Musavat.com
