Tehranda etirazlar yenidən alovlandı: İranda inqilab gedir – VİDEO
Musavat.com xəbər verir ki, hal-hazırda Tehranın əsas prospekt və meydanlarında minlərlə insanın iştirakı ilə genişmiqyaslı etirazlar davam edir. Sosial şəbəkələrdə yayılan çoxsaylı videolarda və canlı görüntülərdə paytaxtın müxtəlif hissələrində böyük izdihamın formalaşdığı, nəqliyyatın iflic olduğu, təhlükəsizlik qüvvələrinin isə vəziyyəti nəzarətdə saxlamaqda çətinlik çəkdiyi görünür.
Son günlər İranda etirazların miqyası nəzərəçarpacaq dərəcədə genişlənib. Dünən və ondan əvvəlki gün etirazların sərt şəkildə dağıdılması, minlərlə ölən və yaralananların olduğu barədə məlumatlar yayılsa da, bu, aksiyaların qarşısını ala bilməyib. Əksinə, müşahidəçilərin fikrincə, zorakılıq etirazçıların qəzəbini daha da artırıb və yeni dalğaya təkan verib.
Məlumatlara görə, etirazların yenidən güclənməsinə beynəlxalq siyasi kontekstdə səslənən çağırışlar da təsir göstərib. Bəlli olduğu kimi, ABŞ prezidenti Donald Tramp İran xalqına müraciət edərək onları açıq tekstlə ayağa qalxmağa, dövlət qurumlarını ələ keçirməyə səsləyib və rejimə qarşı mübarizədə dəstək sözü verib. Trampın sərt ritorikasının İranda ictimai-siyasi mühitə təsir göstərdiyi gözlə görünür.
Hazırkı mərhələdə paytaxt Tehranda etirazların əsas şüarı “Diktator rədd ol!”dur. Bu da İranın faktiki rəhbəri Xamneyiyə ünvanlanıb. Bəzi kənar müşahidəçilər baş verənləri artıq adi etiraz aksiyalarından kənara çıxan proses kimi qiymətləndirir və ölkənin inqilabi mərhələyə daxil olduğunu iddia edirlər.
Rəsmi Tehran isə vəziyyətlə bağlı sərt mövqeyini qoruyur. Hakimiyyətə yaxın mənbələr aksiyaların “xaricdən yönləndirildiyini” və təhlükəsizlik qüvvələrinin “ictimai asayişi qorumaq üçün” tədbirlər gördüyünü bildirir. Bununla yanaşı, internetin məhdudlaşdırılması, mobil rabitədə fasilələr və informasiya axınının nəzarətə götürülməsi ilə bağlı xəbərlər də yayılmaqdadır.
Hazırda vəziyyət gərgin olaraq qalır. Etirazların yaxın saatlarda və günlərdə hansı istiqamətdə inkişaf edəcəyi, prosesin nəzarətdən çıxıb-çıxmayacağı isə həm regionda, həm də beynəlxalq müstəvidə diqqətlə izlənilir.
