Prezident İlham Əliyevin 2026-cı il üçün “Zayed İnsan Qardaşlığı Mükafatı”na layiq görülməsi Azərbaycan dövlət başçısının beynəlxalq müstəvidə formalaşmış siyasi nüfuzunun və etibarlı lider imicinin növbəti təsdiqidir.
Bu mükafat Cənubi Qafqazda uzun illər davam etmiş münaqişənin sülh yolu ilə həllinə, regional sabitliyin möhkəmləndirilməsinə və dialoq əsaslı siyasətin irəli aparılmasına verilən yüksək beynəlxalq qiymət kimi dəyərləndirilə bilər. Eyni zamanda, bu təltif Azərbaycanın humanitar dəyərlərə söykənən, praqmatik və məsuliyyətli dövlət siyasətinin qlobal miqyasda qəbul olunduğunu göstərir.
Milli Məclisin deputatı Elçin Mirzəbəyli Musavat.com bildirdi ki, Prezident İlham Əliyevin 2026-cı il üçün “Zayed İnsan Qardaşlığı Mükafatı”na layiq görülməsi sıradan bir beynəlxalq təltif deyil: “Bu hadisə həm Azərbaycanın dövlət başçısına göstərilən yüksək beynəlxalq etimadın, həm də ölkəmizin son illərdə nümayiş etdirdiyi prinsipial sülh siyasətinin qlobal miqyasda qəbul olunmasının parlaq təcəssümüdür. Bu mükafat bütövlükdə Azərbaycanın yürütdüyü siyasi kursun, diplomatik xəttin və humanitar dəyərlərə söykənən dövlət fəlsəfəsinin beynəlxalq miqyasda rəsmən tanınması deməkdir. “Zayed İnsan Qardaşlığı Mükafatı” Birləşmiş Ərəb Əmirliklərinin banisi Şeyx Zayed bin Sultan Al Nəhyanın şərəfinə təsis edilmiş, Papa Fransisk və Əl-Əzhər Böyük İmamı tərəfindən dəstəklənən, dünyada sülh, tolerantlıq, dini və mədəni harmoniyanın təşviqinə xidmət edən ən nüfuzlu humanitar mükafatlardan biridir. Bu mükafatın fəlsəfəsində əsas ideya insan qardaşlığı, sivilizasiyalararası dialoq, münaqişələrin zor deyil, məhz diplomatiya və qarşılıqlı hörmət əsasında həllinə çağırışdır. Prezident İlham Əliyevin bu mükafata layiq görülməsi təsadüfi deyil, bu, onun rəhbərliyi ilə Azərbaycanın uzun illərdir ardıcıl şəkildə nümayiş etdirdiyi real siyasətin nəticəsidir.
Dünya ictimaiyyəti çox yaxşı görür ki, Azərbaycan 35 il davam etmiş münaqişəni hərbi mərhələdən sonra məhz siyasi mərhələyə daşıyaraq bölgədə davamlı sülhün bərqərar olunması üçün sistemli, ardıcıl və prinsipial addımlar atır. Qarabağ münaqişəsinin tarixi reallıqları, beynəlxalq hüququn kobud şəkildə pozulması, işğal faktı və etnik təmizləmə siyasəti fonunda Azərbaycanın əldə etdiyi Qələbə yalnız hərbi-siyasi uğur kimi deyil, həm də sülhün təmin edilməsi üçün yaradılmış tarixi imkan kimi qiymətləndirilməlidir. Prezident İlham Əliyev məhz bu mərhələdə qalib ölkənin lideri kimi revanşizmə deyil, sülh gündəliyinə üstünlük verərək Cənubi Qafqazı əməkdaşlıq məkanına çevirmək kimi olduqca çətin bir missiyanı məharətlə həyata keçirdi. Məhz bu yanaşma beynəlxalq ictimaiyyət tərəfindən yüksək qiymətləndirilir.
“Zayed İnsan Qardaşlığı Mükafatı”nın Prezident İlham Əliyevə verilməsi, onun 35 illik münaqişəni siyasi-diplomatik mərhələdə sülhə doğru yönəltmək, regionda sabitliyi təmin etmək və yeni təhlükəsizlik arxitekturasının əsasını qoymaq səylərinə verilən beynəlxalq qiymətdir. Bu mükafat Prezidentin liderlik keyfiyyətlərinin, diplomatik məharətinin, strateji baxışının və ən əsası sülhə nail olmaq üçün göstərdiyi qətiyyətin dünya miqyasında tanınması deməkdir. Azərbaycan artıq uzun müddətdir ki, müxtəlif mədəniyyətlərin, dinlərin və sivilizasiyaların qovuşduğu məkan kimi qlobal humanitar dialoqun mühüm platformasına çevrilib. Bakı Beynəlxalq Humanitar Forumları, Dünya Dini Liderlərinin Zirvə görüşləri, Mədəniyyətlərarası Dialoq Forumları və digər təşəbbüslər Azərbaycanın humanitar diplomatiyasının real təzahürləridir. Prezident İlham Əliyevin təşəbbüsləri ilə həyata keçirilən bu siyasət təkcə region üçün deyil, qlobal miqyasda sülh və anlaşma modelinin təqdimatıdır. “Zayed İnsan Qardaşlığı Mükafatı” məhz bu modelin beynəlxalq təsdiqi kimi dəyərləndirilməlidir”.
Deputat hesab edir ki, bu təltif Azərbaycanın sülhə sadiq, dialoqa açıq və humanitar dəyərlərə bağlı dövlət kimi imicini daha da möhkəmləndirir: “Eyni zamanda, Prezident İlham Əliyevin qlobal liderlik mövqeyini gücləndirən mühüm hadisə kimi tarixə düşür. Bu mükafat göstərir ki, Azərbaycan artıq yalnız regional güc deyil, həm də sülh gündəliyini formalaşdıran, beynəlxalq münasibətlərdə yeni yanaşmalar təklif edən məsuliyyətli aktordur. Lakin bütün bunlarla yanaşı, həqiqət ondan ibarətdir ki, Prezident İlham Əliyev üçün ən böyük və əvəzolunmaz mükafat Azərbaycan xalqının özüdür. Xalqın ona göstərdiyi etimad, dəstək və inam heç bir beynəlxalq təltiflə müqayisə oluna bilməz. Prezident İlham Əliyev Xilaskar, Qalib Sərkərdə və Müzəffər Ali Baş Komandan kimi xalqımızın və dövlətimizin qarşısında duran ən mühüm tarixi məsələlərin həllinə nail olmuş Liderdir. O, Azərbaycanın ərazi bütövlüyünü və suverenliyini bərpa etmiş, dövlətimizi qətiyyətlə gələcəyə doğru aparan, ən yüksək zirvələri fəth etmiş böyük şəxsiyyətdir.
“Zayed İnsan Qardaşlığı Mükafatı” isə bu böyük yolun, bu tarixi missiyanın və bu liderlik nümunəsinin beynəlxalq aləmdə etirafı, təsdiqi və dəyərləndirilməsi kimi xüsusi əhəmiyyət daşıyır. Bu mükafat Prezident İlham Əliyevin timsalında Azərbaycanın sülh fəlsəfəsinin, humanitar dəyərlərinin və qlobal məsuliyyətinin dünyada qəbul olunmasının simvoludur”.
Cavanşir ABBASLI
Musavat.com
