Salatdan kütləvi ZƏHƏRLƏNMƏ – 1 yaşlı uşağa da…
Quba rayonunda səkkiz nəfər qidadan zəhərlənib.
Rayonun Xucbala kəndində qonaqlıq zamanı – 1953-cü il təvəllüdlü N.Şabutov, 1953-cü il təvəllüdlü H.Şabutova, 1986-ci il təvəllüdlü A.Şabutova, 2003-cü il təvəllüdlü A.Şabutova, 2003-cü il N.Şabutova, 2010-cu il D.Şabutov, 2025-ci il təvəllüdlü G.Şabutova və 1978-ci il təvəllüdlü D.Məmmədova qida zəhərlənməsi diaqnozu ilə Qusar Rayon Mərkəzi Xəstəxanasına aparılıblar. Onların paytaxt salatından zəhərləndikləri ehtimal olunur. Faktla bağlı araşdırma aparılır.
Qida təhlükəsizliyi hərəkatının rəhbəri, sağlam qidalanma mütəxəssisi Məhsəti Hüseynova Musavat.com-a açıqlamasında bildirib ki, dünyanın digər ölkələrində də, Azərbaycanda da qida zəhərlənmələrinin əksər hissəsini məişət zəminində hazırlanan qidalar təşkil edir.
Onun sözlərinə görə, bu məsələdə qidalar hazırlanarkən sanitar-gigiyena qaydalarına əməl olunmaması daha çox rol oynayır:
“Bir çox halda qidalar hazırlanarkən əllərin yuyulmaması, eləcə də doğrama üçün vasitələrin təmizlənməməsi ən önəmli faktorlardan biridir. Bəzən keyfiyyətli xammal olsa belə, gigiyena qaydalarına əməl etmədikdə çarpaz çirklənmə baş verir, bu zaman da qidanın tərkibində müxtəlif dəyişikliklər baş verir –mikroorqanizmlə çoxalır və s. ki, bu da qida zəhərlənməsinə səbəb olur. Xüsusilə, salatların və bir sıra digər qidaların hazırlanması zamanı çiy və bişmiş məhsulları eyni qabda saxlamaq, bıçağın həm çiy, həm də bişmiş məhsullar üçün istifadə olunması da zəhərlənməyə səbəb olan amillərdən biridir. Çiy tərəvəzlərin yaxşı yuyulmasına diqqət etmək lazımdır. Salatlarda bəzən yumurta, toyuq və digər ətlərdən istifadə olunur ki, yaxşı bişirilmədikdə yaxud yarımçıq bişəndə riskli məhsul hesab olunur”.
Ekspert qeyd edib ki. eyni zamanda, soyuq şəraitdə saxlanmalı olan məhsullar bəzən uzun müddət otaq temperaturunda saxlanır:
“Xüsusilə, mətbəxdə temperatur daha yüksək olur. Əgər məhsul uyğun olmayan temperaturda 2 saatdan çox qalırsa, qidanın tərkibi dəyişir. Eləcə də salatlar hazırlanarkən bəzi məhsulların öncədən bişirilib saxlanması da problemlərin yaranmasına gətirib çıxara bilər. Əsas diqqət olunacaq məqamlardan biri də mayonez və xamalarla bağlıdır. Bir çox halda bu məhsulların rəf ömrü uzun olsa da, ağzı açıldıqdan sonra qısa müddətdə istifadə olunmalıdır. Ancaq ev şəraitində bəzən ya müddətə diqqət edilmir, ya da ağzı açıldıqdan sonra qısa müddət deyil, mütəmadi olaraq istifadə olunur ki, bu da qida zəhərlənməsinə gətirib çıxara bilər. Onu da qeyd etmək lazımdır ki, ev şəraitində qida mütləq şəkildə istehlak olunacaq miqdarda hazırlanmalıdır və mümkün qədər sonraya saxlanmamalıdır”.
M.Hüseynova vurğulayıb ki, risk qrupuna isə daha çox azyaşlılar, yaşlılar, immun sistemi zəif olan şəxslər, xroniki xəstəliyi olanlar, hamilələr, süd verən qadınlar aiddir. Mütəxəssis həmçinin, qeyd edib ki, 1 yaşlı uşağa salat vermək risklidir:
“Salatın tərkibində duz miqdarı həddən artıq çoxdur, qaynadılıb saxlanan məhsulların da bakteriya riski yüksəkdir. Körpələrdə isə həzm sistemi tam formalaşmadığı üçün həzm prosesi zəifdir. Bu da qida zəhərlənməsindən tutmuş, ishal, qarın ağrısı, baş ağrısı, o cümlədən dad vərdişi tam formalaşmadığı üçün müəyyən problemlərə səbəb ola bilər”.
Nigar HƏSƏNLİ,
Musavat.com
