Amerikanın gələcək POTENSİAL prezidenti – Vens Bakıdan nə ilə getdi?
Azərbaycanda səfərdə olan Amerika Birləşmiş Ştatlarının Vitse-prezidenti Ceyms Devid Vens və xanımı Uşa Vens fevralın 11-də Şəhidlər xiyabanı ziyarət ediblər. Vitse-prezident Azərbaycanın azadlığı və müstəqilliyi uğrunda mübarizədə canlarını qurban vermiş qəhrəman Vətən övladlarının əziz xatirəsini ehtiramla anıb, “Əbədi məşəl” abidəsinin önünə əklil qoyub.
Musavat.com xəbər verir ki, ABŞ-nin vitse-prezidentinin Güney Qafqaza ilk səfəri bu gün başa çatır.
Dik Çeynidən (2008) sonra bununla ikinci dəfə idi ki, Birləşmiş Ştatların vitse-prezidenti Bakıda olurdu. Bəllidir ki, vitse-prezident ABŞ-ın növbəti prezidenti olmağa şanslı namizədlərdən sayılır. Bu səfər iki ölkə arasında Strateji Tərəfdaşlıq haqqında Xartiya imzalanması ilə yadda qaldı. Sənəd geniş müddəalardan ibarətdir. Məsələn, onlardan biri odur ki, Azərbaycan Respublikası və Amerika Birləşmiş Ştatları mülki nüvə əməkdaşlığını dərinləşdirmək niyyətindədirlər. Bundan başqa, humanitar minatəmizlənmə sahəsində potensialın artırılmasında əməkdaşlıq etmək niyyətindədirlər.
Qeyd edək ki, oxşar sənəd Çinlə, qardaş Türkiyə və bir neçə digər dövlətlə də imzalananıb.
Bəs Vensin bölgə səfəri ilə bağlı əsas hansı nəticələrin altını cızmaq olar? Səfərdən sonra konkret olaraq Azərbaycanın təhlükəsizliyinin daha da möhkəmləndiyini söyləmək mümkündürmü, yoxsa bir qədər gözləmək lazım gələcək?
Keçmiş xarici işlər naziri Tofiq Zülfüqarov Bakı ilə Vaşinqton arasında Strateji Tərəfdaşlıq Xartiyasının imzalanması ilə bağlı şərh verərək bunu Azərbaycanın qlobal siyasətin mərkəzindəki rolunun təsdiqi adlandırıb.
Musavat.com bildirir ki, sabiq nazir bu haqda özünün sosial media hesabında yazıb.
“Etiraf etməlisiniz ki, xarici siyasəti sayəsində qlobal standartlara görə kiçik bir ölkə olan Azərbaycanın öz müsbət gündəliyi ilə qarışıq qlobal proseslərin mərkəzində qalması inanılmazdır. Bir çox rəqibimizə baxmayaraq, suverenliyimizi və ərazi bütövlüyümüzü bərpa etdik və sülh prosesinə başladıq”, – deyə o, qeyd edib.
ReAl Partiyasının sədri Natiq Cəfərlinin sözlərinə görə, bu sənəd məmləkət üçün inanılmaz fürsətlər açır, xarici siyasətdə növbəti uğurlu addımdır.
Sənədin bəndlərindən biri Azərbaycan Respublikası və Amerika Birləşmiş Ştatları AI tərəfdaşlıqlarının inkişaf etdirilməsi üzrə əməkdaşlığı genişləndirmək və müvafiq hallarda, kosmik sənaye sahəsində əməkdaşlığı və Azərbaycan Respublikasında özəl sektorla əməkdaşlıq ilə AI data mərkəzlərinin inkişafı da daxil olmaqla, rəqəmsal infrastruktura sərmayə qoyuluşunu təşviq etmək niyyətindədirlər: “İlk addım və imzalar atıldı, qaldı əməli iş, hökumət bu fürsəti qaçırmamalıdır, indiki idarəetmə fəlsəfəsi və yanaşması ilə bu işin öhdəsindən gəlmək çətin olacaq. Buna görə də, sistem islahatları mütləqdir, vacibdir, artıq ertələnə bilməz”.
Siyasi şərhçi Aqşin Kərimovun sözlərinə görə, Azərbaycanla ABŞ arasında imzalanan Strateji Tərəfdaşlıq haqqında Xartiyada 3 vacib xətt nəzərə çarpır:
“Azərbaycan Respublikası və Amerika Birləşmiş Ştatlarının mülki nüvə əməkdaşlığını dərinləşdirmək niyyəti, Azərbaycan Respublikası və Amerika Birləşmiş Ştatları kritik mineralların Orta Dəhliz vasitəsilə qlobal bazarlara tranzitini asanlaşdırmaqla bağlı əməkdaşlıq etməyi prioritetləşdirməsi, təhlükəsizlik və müdafiə sənayesi sahəsində əməkdaşlığın yeni səviyyəsinin elan edilməsi. ABŞ-nin mülki nüvə sahəsindəki fəallığını Cənubi Qafqazda, o cümlədən Ermənistan və Azərbaycanda nümayiş etdirməsi onun perspektiv üçün mövqelərini əlverişli edə bilər. Bunun Azərbaycan və Türkiyə üçün də xüsusi əhəmiyyəti var. TRIPP dəhlizini irəli aparmaq və onun nüvəsini gücləndirmək baxımından həmin əməkdaşlıq diqqətəlayiqdir. Azərbaycan ABŞ və Çinin rəqabət rejimini Orta Dəhlizin bir komponenti olacaq TRIPP marşrutunda yumşaldaraq regionda güclərarası reytinqi balanslaşdırır. Azərbaycanla ABŞ-nin sərhəd təhlükəsizliyi, antiterror əməliyyatları sferasındakı, dəniz təhlükəsizliyin qorunmasındakı prioritetləri yenilənir”.
Emil Salamoğlu
Musavat.com
