İran İXRACI azaltdı – Azərbaycanda bu məhsullar BAHALAŞA bilər
İran ölkədə yaranmış gərginlik fonunda bir sıra məhsulların ixracına qadağa tətbiq edib.
Ölkənin Gömrük İdarəsinin məlumatına görə, Kənd Təsərrüfatı Nazirliyi yumurta, pomidor və xurmanın ixracını dayandırıb. Qadağanın müddəti isə qeyri-müəyyən olaraq göstərilir.
İqtisadçı Natiq Cəfərli Musavat.com-a açıqlamasında bildirib ki, Azərbaycanla İran arasında ticarət dövriyyəsi təqribən 600 milyon dollar civarındadır. Onun sözlərinə görə, əsasən Azərbaycan İrandan məhsul alır:
“Hələlik İrandan gələn məhsullarla bağlı ciddi problem müşahidə etmirik, çünki gərginlik hələ ticarət münasibətlərinə təsir etməyib. Logistika işləyir, mal və xidmətlər gəlir. İrandan Azərbaycana əsasən kənd təsərrüfatı, ərzaq məhsulları, tikinti materialları və məişət kimyası məhsulları idxal olunur. Son statistikaya görə, kərə yağının Azərbaycana ixracında İran birinci yerdədir. Lakin müharibə qlobal miqyas alarsa, İrandan gələn məhsullarda da problemlər yarana bilər”.
Xatırladaq ki, İran ötən gündən etibarən kartof ixracına da qadağa qoymuşdu.
Şahanə Rəhimli,
Musavat.com
