İsrail Xarici İşlər Nazirinin müavini Şaren Haskel İranın Naxçıvan Beynəlxalq Hava Limanının ərazisinə və məktəbə dron zərbəsi endirməsinə sərt münasibət bildirib.
Musavat.com xəbər verir ki, o, ”X” hesabında Naxçıvana edilən hücumu qəti şəkildə pisləyərək, İranın bölgədə xaos yaratdığını vurğulayıb:
“Bu gün səhər Azərbaycanda İranın özünə nəzarəti itirdiyinin növbəti sübutunu gördük. Ayətullah rejimi qonşu ölkənin mülki hava limanına raketlər və pilotsuz uçuş aparatları göndərir, artıq maskalar düşür. Tehrandakı “ahtapotun başı” artıq proksi təşkilatların arxasında gizlənmir, birbaşa hücum edir və xaos yayır. İran dünya onu dayandırana qədər dayanmayacaq.”
Qeyd edək ki, İran İslam Respublikasının silahlı qüvvələri tərəfindən İran ərazisindən Naxçıvan Muxtar Respublikası istiqamətində pilotsuz uçuş aparatları ilə hücum həyata keçirilib. Dronlardan biri Naxçıvan Beynəlxalq Hava Limanının terminal binasına, digərləri isə ətraf ərazilərə düşüb. Məlumatlara görə, dronlardan biri Şəkərabad kəndində yerləşən məktəbin yaxınlığına düşüb.
Hücum nəticəsində terminal binasında ciddi ziyan dəyib, dağıntılar qeydə alınıb, dörd nəfər isə xəsarət alıb.
