Azərbaycan qalib dövlət kimi yeni inkişaf mərhələsində – Zəngilandan dünyaya verilən MESAJ
Azərbaycan Respublikasının Prezidenti İlham Əliyevin Zəngilan şəhərində ilk yaşayış kompleksinə köçən ailələrlə görüşü və həmin tədbirdə səsləndirdiyi fikirlər Azərbaycanın keçdiyi tarixi yolun, qazandığı böyük Zəfərin və postmüharibə dövründə həyata keçirilən quruculuq siyasətinin növbəti mühüm təqdimatı oldu.
Milli Məclisin deputatı Ceyhun Məmmədov APA-ya açıqlamasında bildirib ki, Prezident İlham Əliyevin çıxışı təkcə Zəngilan sakinlərinə deyil, bütövlükdə Azərbaycan və beynəlxalq ictimaiyyətə ünvanlanmış çox ciddi siyasi mesajlarla zəngin idi.
Heydər Əliyevin xilaskarlıq missiyası Azərbaycanın gələcəyini müəyyənləşdirib
Deputat qeyd edib ki, Prezident İlham Əliyevin çıxışında Ulu Öndər Heydər Əliyevin fəaliyyətinə xüsusi yer ayrılması tamamilə təbiidir:
“Çünki bu gün əldə olunan bütün uğurların əsasında məhz Ulu Öndər Heydər Əliyevin xilaskarlıq missiyası dayanır. 1993-cü ildə Azərbaycan faktiki olaraq parçalanmaq təhlükəsi ilə üz-üzə idi. AXC-Müsavat hakimiyyətinin səriştəsiz fəaliyyəti nəticəsində ölkədə dərin xaos, anarxiya və özbaşınalıq hökm sürürdü. Şuşa, Laçın və Kəlbəcərin işğalı, ordudakı hərc-mərclik, vətəndaş müharibəsi təhlükəsi Azərbaycanın gələcəyini sual altına qoymuşdu”.
Deputatın sözlərinə görə, həmin dövrdə heç bir biliyi, bacarığı və dövlət idarəçiliyi təcrübəsi olmayan şəxslər ən yüksək vəzifələri tutmuşdu:
“Prezident İlham Əliyevin də qeyd etdiyi kimi, küçədən keçən adamlar ölkənin taleyini həll edən vəzifələrə gətirilmişdi. Ordumuz faktiki olaraq qeyri-peşəkar və xəyanətkar qüvvələrin nəzarətində idi. Rəhim Qaziyev kimi şəxslər böyük vədlər versələr də, nəticədə torpaqlarımızın işğalına şərait yaratdılar. Azərbaycanı bu fəlakətdən xilas edən yeganə siyasi lider Heydər Əliyev oldu. O, xalqın tələbi ilə hakimiyyətə qayıdaraq ölkədə sabitlik yaratdı, dövlət institutlarını formalaşdırdı və ordu quruculuğunun əsasını qoydu”.
Xalq-iqtidar birliyi Zəfərin əsasını təşkil edib
Ceyhun Məmmədov bildirib ki, Prezident İlham Əliyevin çıxışında xüsusi vurğulanan əsas məqamlardan biri xalq-iqtidar birliyi idi:
“1993-cü ildə olduğu kimi, 44 günlük Vətən müharibəsində də xalq öz liderinin ətrafında sıx birləşdi. Prezident İlham Əliyevin qətiyyəti, siyasi iradəsi və prinsipial mövqeyi xalqın tam dəstəyi ilə birləşərək tarixi Zəfəri təmin etdi. Dövlət başçısının söylədiyi kimi, Azərbaycan xalqı bir yumruq kimi birləşmişdi və bu birlik düşmənin, eləcə də Azərbaycana təzyiq göstərən xarici qüvvələrin bütün planlarını alt-üst etdi”.
Deputat vurğulayıb ki, ATƏT-in Minsk qrupu illərlə münaqişənin həllini uzatmağa çalışıb:
“Minsk qrupu faktiki olaraq işğalın davam etməsinə xidmət edirdi. Həmsədr ölkələrin hər biri müxtəlif səbəblərdən Azərbaycanı dayandırmağa çalışırdı. 44 günlük müharibə dövründə ölkəmizə çox ciddi təzyiqlər edildi. Ancaq Prezident İlham Əliyev böyük diplomatik məharət, siyasi iradə və prinsipiallıq nümayiş etdirərək bütün maneələri dəf etdi. Nəticədə Azərbaycan öz ərazi bütövlüyünü bərpa etdi”.
Antiterror əməliyyatı tam suverenliyi təmin edib
Ceyhun Məmmədov qeyd edib ki, 2023-cü ilin sentyabrında həyata keçirilən antiterror tədbirləri Azərbaycan dövlətinin gücünü bir daha nümayiş etdirdi:
“Prezident İlham Əliyevin də vurğuladığı kimi, həmin əməliyyat bir neçə saat ərzində uğurla başa çatdı. Bu isə illərlə aparılan düzgün strategiyanın, peşəkar hazırlığın və taktiki addımların nəticəsi idi. Ermənistan ordusu ikinci dəfə kapitulyasiya etdi və Azərbaycan öz tam suverenliyini təmin etdi. Azərbaycan bütün proseslərdə həm hərbi, həm də siyasi müstəvidə yüksək peşəkarlıq və ləyaqət nümayiş etdirib. Ermənistan şəhərlərimizi ‘İsgəndər-M’, ‘Skad’ və digər ballistik raketlərlə vururdu. Buna baxmayaraq Azərbaycan bir dənə də olsun mülki erməni obyektini hədəfə almadı. Bu, Azərbaycanın humanitar hüquqa və beynəlxalq normalara sadiqliyinin göstəricisidir”.
İşğalın ağır nəticələri və Ermənistanın ekoloji terroru
Ceyhun Məmmədov vurğulayıb ki, Prezident İlham Əliyevin çıxışında Ermənistanın törətdiyi ekoloji terror məsələsinə xüsusi diqqət ayrılması mühüm əhəmiyyət daşıyır:
“İşğal dövründə Ermənistan təkcə şəhər və kəndlərimizi dağıtmayıb, eyni zamanda ekosid siyasəti həyata keçirib. Prezident İlham Əliyevin də qeyd etdiyi kimi, Azərbaycanın 60 min hektar meşə fondu məhv edilib. Bəsitçay qoruğunda yüzillik çinar ağacları kəsilib, yandırılıb və talan olunub. Bu, beynəlxalq hüquqa zidd vandalizmdir”.
Deputat mina probleminin də ciddi təhlükə olaraq qaldığını bildirib:
“Azad olunmuş ərazilərdə Ermənistanın basdırdığı minalar bu gün də insanların həyatına təhlükə yaradır. Azərbaycan dövləti genişmiqyaslı minatəmizləmə işləri həyata keçirir. Bu istiqamətdə beynəlxalq dəstəyin artırılması vacibdir”.
Azərbaycan sülhün müəllifidir
Ceyhun Məmmədov bildirib ki, Prezident İlham Əliyevin çıxışı Azərbaycanın bölgədə sülh istəyən tərəf olduğunu bir daha nümayiş etdirdi:
“Azərbaycan müharibəni bitirib və regionda davamlı sülhün tərəfdarıdır. Dövlət başçısının dediyi kimi, əgər Azərbaycan istəməsəydi, bölgədə sülhdən danışmaq mümkün olmazdı. Bu gün bəzi xarici dairələr, xüsusilə Fransa Prezidenti Emmanuel Makron populist bəyanatlarla Ermənistanı müdafiə etməyə çalışır. Halbuki 2020-ci ildə Ermənistan ağır məğlubiyyətə uğrayanda həmin dairələr heç nə edə bilmədilər. Bu gün sərhəddə yerləşdirilən dırnaqarası Avropa müşahidəçiləri də vəziyyəti sabitləşdirmək yox, əksinə, gərginliyi artırmaq məqsədi daşıyır. “Binokl diplomatiyası” qəbuledilməzdir. Ermənistan və onun havadarları anlamalıdırlar ki, Azərbaycana qarşı istənilən təxribat çox sərt şəkildə cavablandırılacaq”.
Zəngilan yeni beynəlxalq nəqliyyat mərkəzinə çevrilir
Ceyhun Məmmədov qeyd edib ki, Prezident İlham Əliyevin Zəngilanla bağlı açıqladığı planlar regionun gələcək inkişaf perspektivlərini aydın göstərir:
“Bu gün Zəngilan tamamilə yeni sima qazanır. Şəhərdə yaşayış kompleksləri, məktəblər, yollar, körpülər, elektrik stansiyaları tikilir. Zəngilan hava limanı, konqres mərkəzi, ‘Dost Aqropark’, yeni məscid və digər layihələr bölgənin inkişafının göstəricisidir. Zəngəzur dəhlizinin açılması Zəngilanın strateji əhəmiyyətini daha da artıracaq. Zəngilan gələcəkdə Azərbaycanın yeganə rayonu olacaq ki, iki qonşu ölkə ilə sərhəd-keçid məntəqəsinə malik olacaq. Bu isə həm iqtisadi, həm logistika, həm də geosiyasi baxımdan böyük üstünlükdür. Zəngəzur dəhlizi həm Şərq-Qərb, həm də Şimal-Cənub nəqliyyat marşrutlarının əsas hissəsinə çevriləcək. Bu yol Naxçıvanı Azərbaycanla birləşdirəcək, eyni zamanda Türkiyə, Avropa, İran və Fars körfəzinə çıxışı təmin edəcək”.
Azərbaycanın verdiyi bütün vədlər reallaşır
Deputat nəzərə çatdırıb ki, Prezident İlham Əliyevin fəaliyyətində ən mühüm xüsusiyyətlərdən biri verdiyi bütün vədləri yerinə yetirməsidir:
“Dövlət başçısı illər əvvəl məcburi köçkünlərlə görüşlərdə onların doğma torpaqlarına qayıdacağını demişdi. Bu gün həmin vədlər reallığa çevrilib. Böyük Qayıdış proqramı uğurla icra olunur. Zəngilan, Şuşa, Laçın, Füzuli və digər azad olunmuş ərazilərdə genişmiqyaslı quruculuq işləri aparılır. Azərbaycan qalib dövlət kimi öz torpaqlarında yeni həyat qurur və bu proses artıq bütün dünyanın diqqət mərkəzindədir”.
