Bu gün, mayın 14-də Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə Respublika Perinatal Mərkəzi PHŞ-də baş vermiş yanğınla bağlı cinayət işi üzrə proses davam etdiriləcək.
Musavat.com-un məlumatına görə, hazırda iclasda müttəhimlərin vəkillərinin çıxış mərhələsidir. Ötən iclasda dövlət ittihamçısı çıxış edərək hər üç təqsirləndirilən şəxsə 3 il müddətinə dövlət və yerli özünüidarə orqanlarında rəhbər vəzifə tutmaq hüququndan məhrumetmə cəzası, eləcə də azadlıqdan məhrumetmə cəzalarının tətbiqini təklif edib.
Prokurorun təklifinə əsasən, mərkəzin direktoru Mehriban Abasquliyeva 8 il, Anesteziologiya, reanimasiya və intensiv terapiya şöbəsinin müdiri Hamlet Mustafayev və Dəstək xidmətləri şöbəsinin müdiri Elnur Əhmədli isə 7 il müddətinə azadlıqdan məhrum edilə bilər. Həmçinin onların məhkəmə zalından həbs olunması da təklif edilib. Cinayət işi üzrə Respublika Perinatal Mərkəzi və bir sıra şəxslər zərərçəkmiş qismində tanınıb.
Əvvəlki iclasda çıxış edən mərkəzin direktoru Mehriban Abasquliyeva müəssisədə mövcud olmuş texniki və infrastruktur problemlərdən danışıb. O, Fövqəladə Hallar Nazirliyi tərəfindən yanğın təhlükəsizliyi ilə bağlı maarifləndirici tədbirlər keçirildiyini, lakin mövcud avadanlıqların təhlükəsizliyin tam təmin olunması üçün kifayət etmədiyini bildirib. Mehriban Abasquliyevanın sözlərinə görə, o mərkəzə rəhbər təyin olunmazdan əvvəl müəssisədə qazanxana, havalandırma sistemi, generator və digər texniki avadanlıqların yararsız vəziyyətdə olub, bəzi təmir işlərinin isə şəxsi vəsaiti hesabına həyata keçirib. Direktor əlavə edib ki, yanğın siqnalizasiya sisteminin yenilənməsi üçün 60 min manat, ümumi təhlükəsizlik tədbirləri üçün təxminən 200 min manat, tam təhlükəsizlik sisteminin qurulması üçün isə 2 milyon 705 min manat vəsait tələb olunub. Bu barədə aidiyyəti qurumlara rəsmi müraciət edilsə də, tələb olunan maliyyənin ayrılmadığı bildirilib. Hadisə 9 yanvar 2024-cü ildə Respublika Perinatal Mərkəzinin inzibati binasında baş verib. Yanğın nəticəsində Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsində 7 yenidoğulmuş körpə həyatını itirib, 4 nəfər isə xəsarət alıb. Ümumilikdə müəssisəyə 361 min manat maddi ziyan dəydiyi qeyd olunur. Baş Prokurorluğun istintaqı nəticəsində, mərkəzdə xəstə qəbulunun artmasının elektrik təsərrüfatına əlavə yük yaratdığı və bunun yanğının baş verməsində ehtimal olunan amillərdən biri olduğu bildirilir. Eyni zamanda FHN yoxlamaları zamanı yanğın siqnalizasiya sistemində və digər təhlükəsizlik elementlərində ciddi nöqsanlar aşkar edilib. Təqsirləndirilən şəxslər – Mehriban Abasquliyeva Cinayət Məcəlləsinin 308.2 və 225.3-cü, Hamlet Mustafayev və Elnur Əhmədli isə 225.3-cü maddəsi ilə ittiham olunurlar.
E.Məmmədəliyev,
Musavat.com
