Təhsil Nazirliyinin təşkil etdiyi Təhsildə İnkişaf və İnnovasiyalar üzrə lV qrant müsabiqəsində qalib gəlmiş layihələrdən biri də “Uşaq kimi düşün” layihəsidir.
Müsahibimiz qrant müsabiqəsinin qalibi olmuş, layihə rəhbəri Tərtər şəhər İsmayıl Məmmədov adına 2 saylı məktəb-liseyin ibtidai sinif müəlliməsi Hüseynzadə Nigar Elçin qızıdır.
Layihə barədə məlumat verə bilərsinizmi?
Tərtər rayonu üzrə bu müsabiqədə ilk qalib layihədir. Müasir dövrdə elm və texnologiyanın inkişafı həyatımızda olan bir çox prosesləri sürətləndirməklə yanaşı ünsiyyəti zəiflədir.Bilirik ki,insan psixologiyası ətraf mühitin təsiri ilə formalaşır, odur ki, övladlarımızın düzgün psixoloji inkişafını təmin etmək üçün onlara düzgün inkişafetdirici mühit yaratmalıyıq. Bəzən məktəblilər arasında davraniş pozuntuları, aqressiya, özünüifadədə zəiflik,iradəsizlik və s. hallarla rastlaşırıq.Bunları doğuran müxtəlif səbəblər var.
Hansı səbəblərdi?
Bunlardan ən vacibi ünsiyyətsizlikdir.Belə ki, uşaq valideynləri, digər yaxınları və ya müəlliminə hansısa problemi haqqında danışa bilmir.Bunu necə edəcəyini,necə söhbətə başlayacağını bilmir və qarşı tərəfin verəcəyi reaksiyadan çəkinir. Bunun nəticəsində uşaq özünə qapanır,hiss və düşüncələrini içində boğur, basdırır. Bu basdırılmış hisslər və emosiyalar gələcəkdə stresə, davranış pozuntularına və s. mənfi hallara gətirib çıxarır. Bu məsələlərin həllində “Uşaq kimi düşün” layihəsi müəllim və valideynlərə dəstək oldu.
Layihənin qarşıya qoyduğu məqsədlər nədən ibarətdir?
Layihənin əsas məqsədi təhsilalanlarla ünsiyyətin və onlara psixoloji dəstəyin düzgün göstərilməsi üçün müəllim və valideynlərə dəstək olmaqdır.
Şagirdlərdə olan aqressiya, özünüifadə çətinliyi, şəxsiyyət kimi formalaşa bilməmə və s. neqativ halların azaldılmasıdır.
Bunun üçün məktəb daxilində bullinqin müəyyənləşdirməsi və aradan qaldırılması yollarını tapmaq lazımdır.
Layihə çərçivəsində qarşıya hansı vəzifələr qoyulub?
Layihənin icra planına uyğun müəllimlər və psixoloqun, valideynlər və psixoloqun iştirakı ilə təlimlər təşkil edilməli,təlimlər vasitəsi ilə layihənin məqsədi və prioritetləri olan məsələlərin həllində səmərələlik artırılmalıdır.
Hazırda pandemiya şəraiti olduğuna görə canlı ünsiyyət məhdudlaşdırılıb. Buna görə hansı vasitələrdən istifadə edirsiniz?
Layihə hazırkı vəziyyətlə əlaqədar olaraq onlayn şəkildə həyata keçirilib. Layihədə müəllim və valideynlər üçün təlimlərin təşkili nəzərdə tutulmuş və təlimlər uğurla başa çatmışdır. Təlimlərdə layihə rəhbəri Hüseynzadə Nigar Elçin qızı və psixoloq Ələsgərova Şirin, müəllimlər və psixoloqlar, valideynlər iştirak etmişdirlər. Ümumilikdə təlimlərdə 60-dan çox müəllim, 4 məktəb psixoloqu və 100-dən çox valideyn iştirak etmişdir.
Psixoloq düzgün yanaşma şəklini,müxtəlif situasiyalarda düzgün davranış və reaksiyanın əhəmiyyəti haqqında məlumat verərək, yeni metodlar və tövsiyyələr vermişdir.
İştirak edənlər təlimlərdə xüsusi fəallıq göstərmiş, təkliflər irəli sürmüşlər,təlimlərdən əldə olunacaq nəticələr müzakirə edilmişdir. Təlimlərdə məktəb psixoloqlarının inkişafı davamlılığı təmin edir.
Layihə üzrə dəvətnamələr və broşürlər çap edilərək paylanmış, məlumatlandırıcı lövhə və facebook səhifəsi yaradılmışdır. https://www.facebook.com/Uşaq-kimi-düşün-112539067270519/
Layihə nəticəsində iştirakçıkar öyrəndiklərini tətbiq etməyə,uşaqlarla ünsiyyətdə fəal olmağa, onlar üçün daha səmərəli mühit yaratmağa çalışmışlar.
Yekun olaraq fikirlərinizə hansısa əlavələriniz varmı?
Bildiyimiz kimi təhsilin səmərəliliyini təmin etmək üçün şagird,müəllim və valideyn münasibətləri düzgün şəkildə qurulmalıdır.Lakin bunu da unutmamaq lazımdır ki məktəb sadəcə təhsil,təlim ocağı deyil həm də tərbiyə ocağıdır. Tərbiyənin kökü isə ailəyə dayanır. Bu səbəbdən cəmiyyətə yararlı şəxsiyyətlər yetişdirmək üçün müəllimlər və valideynlər birlikdə fəaliyyət göstərməlidir. Təəssüf ki, bəzən bizim fərqində olmadan müxtəlif səbəblərlə etdiyimiz şeylər, bəzən “əşi uşaqdır”, “O nə bilir?”, “Onun üçün yaxşısını mən bilirəm” deyə düşündüyümüz ən xırda hadisələr belə onlarda ağır travmalara yol açır. Bu isə özünü istər ailədə istər məktəbdə istərsə də cəmiyyətdə olan münasibətlərində mənfi şəkildə göstərir. Məsələn, məktəbdə, ailədə, cəmiyyətdə bullinq, təhsildən yayınma halları, kobud davranışlar, aqressiya və özünəqapanma kimi özünü büruzə verir. Müasir dövrdə bu kimi halların qarşısını almaq üçün uşaqları anlamaq, hər bir məsələyə, ümumilikdə həyata və dünyaya onlar kimi baxmağı bacarmaq lazımdır, onlarla ünsiyyətdə onlara psixoloji cəhətdən düzgün yanaşmalıyıq. Gəlin, “uşaq kimi düşün”məyə çalışıb onları anlayaq.
Təhsil Nazirliyinə, layihədə iştirak edən və əziyyət çəkən hər kəsə təşəkkür edirik.
Müsahibəni apardı: Musa Muradlı
