İyunun 11-də Azərbaycan Gənc Müəllimlər Assosiasiyasının təşkilatçılığı ilə “Gənc müəllimlərin II forumu” keçirilib. Forumda iştirak edən 300 nəfər gənc müəllim arasında Qarabağ Regional Təhsil İdarəsinin metodisti, Bərdə, Ağcəbədi, Şuşa və Ağdam rayonlarının müəllimləri də yer alıblar.
Tədbirdə həmçinin Təhsil naziri Emin Əmrullayev, nazirlik yanında İctimai Şuranın üzvləri, Azərbaycan Respublikası Təhsil İnstitutunun direktoru Rüfət Əzizov, Gənclər və İdman Nazirliyinin, eləcə də Gənclər Fondunun əməkdaşları, pedaqoji ixtisaslı ali təhsil müəssisələrinin rektorları, Region Təhsil İdarələrinin müdirləri, media nümayəndələri iştirak ediblər.
Forum Azərbaycan Respublikasının Dövlət Himninin səslənməsi və Vətən uğrunda canından keçən şəhidlərimizin, 20 təhsil işçisinin əziz xatirəsini bir dəqiqəlik sükutla yad edilməsi ilə başlayıb.
Azərbaycan Gənc Müəllimlər Assosiasiyasının sədri Rüfət Əsədzadə Assosiasiya haqqında ətraflı məlumat verib və AGMA-nın fəaliyyətinə həsr olunan videoçarx nümayiş etdirilib.
Tədbirdə çıxış edən Azərbaycan Respublikasının təhsil naziri Emin Əmrullayev son illərdə müəllim peşəsinə marağın artdığını, müəllimlərin peşəkarlıq səviyyəsinin yüksəldilməsi istiqamətində görülən işləri vurğulayıb, ölkəmizdə təhsil sahəsində həyata keçirilən mühüm təşəbbüslərdən bəhs edib.
Forum Azərbaycan Dövlət Mədəniyyət İncəsənət Universitetinin nəzdində fəaliyyət göstərən Cadenza Orkestrinin ifası və dəyərli spikerlərin müxtəlif məzmunda çıxışları ilə davam edib.
Tədbir gənc müəllimlərin çıxışları və tədris təcrübəsi ilə fərqlənən müəllimlərin təltif olunması ilə yekunlaşıb.
