Azərbaycan Qida Təhlükəsizliyi Agentliyi (AQTA) tərəfindən yaxın zamanlarda “Ana südü əvəzedilməzdir” adlı layihəyə başlanılması nəzərdə tutulub.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, layihə körpələrin ana südü ilə qidalandırılmasının əhəmiyyətini təbliğ etmək, anaları övladlarını ana südü ilə qidalandırmağa həvəsləndirmək, həmçinin ana südünün keyfiyyətinin artırılmasına və uşaqların sağlam böyüməsinə nail olmaq məqsədilə həyata keçiriləcək.
Respublikanın bütün regionlarını əhatə edəcək layihə çərçivəsində hamilə qadınlar və süd verən analar körpələrin ana südü ilə qidalandırılmasının faydaları və ana südünün keyfiyyətinin artırılması üsulları barədə məlumatlandırılacaq, onlara müvafiq tövsiyələr veriləcək.
Qeyd edək ki, son zamanlar gənc analar kütləvi şəkildə süni uşaq qidalarına üstünlük verir və bu da narahatlıq doğurur. Araşdırmalara əsasən, süni uşaq qidaları heç bir halda ana südünü əvəz edə bilməz. Çünki ana südü körpənin normal inkişafı üçün lazım olan bütün maddələri ehtiva edir. Ana südü ilə qidalanan körpələrin immuniteti, həzm və sinir sistemi daha güclü, allergiya, astma və yoluxucu xəstəliklərə tutulma riski isə aşağı olur.
Mütəxəssislər bildirirlər ki, yalnız məcburi hallarda, məsələn, körpələri ana südü ilə qidalandırmaq mümkün olmadıqda və ya tibbi səbəblər yarandıqda onlara süni qidalar verilə bilər.
“Ana südü əvəzedilməzdir” layihəsi ilə bağlı hazırlanan qısa videonu https://www.youtube.com/shorts/A6zaY6T-mns linki vasitəsilə izləmək olar.
