Vətəndaş Elnur Hüseynlinin kiberdələduzların tələsinə düşməsi, aldatma yolu ilə ondan 25 min manat almaları barədə xəbər vermişdik.
Elnur Hüseynlinin Musavat.com-a verdiyi məlumata görə, artıq polis kiderdələduzların izinə düşüb, hətta onlardan birinin kimliyini də müəyyənləşdirə bilib. Lakin həmin şəxsin kimliyi barədə vətəndaşa məlumat verilmir, həmin şəxs aylardır ki, saxlanılmır:
“Üzləşdiyim dələduzluqla bağlı aprel ayında 24-cü polis bölməsinə müraciət etmişdim. 10 gün araşdırma aparıldı və şikayətimi Nizami Rayon Polis İdarəsinə göndərdilər. İdarədə Aqil adlı müstəndiq bildirdi ki, banklara sorğular verilib. Sorğulara cavab gələndən sonra bilindi ki, mənə qarşı dələduzluq edən şəxs “Kapital Bank” kartından istifadə edib. Onun şəxsiyyəti müəyyən olundu. Müstəntiq dedi ki, həmin şəxsə çağırış göndəriblər. İdarəyə gələndən sonra mənimlə üzləşdiriləcək. Müstəntiqin sözlərindən belə başa düşdüm ki, mənə qarşı dələduzluq edən şəxsə bir neçə çağırış göndərilib, lakin həmin şəxs çağırışlara məhəl qoymayıb, polisə gəlməyib”.
Vətəndaş bildirib ki, müstəntiqdən kiberdələduzun saxlanılması üçün niyə tədbir görülmədiyini xəbər alıb. Cavabı belə olub ki, kiberdələduzluqla bağlı cinayət işi başlanmadığından əməliyyat tədbiri keçirib cinayətkarı saxlaya bilmirlər:
“Daxili işlər naziri cənab Vilayət Eyvazova məktubla müraciət edirəm. Xahiş edirəm ki, mənə qarşı kiberdələduzluq etmiş şəxsin saxlanılması üçün müvafiq göstəriş verilsin. Artıq 4-5 aydır ki, iş gedir, amma müstəntiq deyir ki, cinayət işi başlanmayıb. Daxili işlər nazirindən xahiş edirəm ki, mənə qarşı kiberdələduzluq cinayətini şəxsi nəzarətinə götürsün”.
Elnur Hüseynliyə qarşı kiberdələduzluq 9 noyabr 2023-cü ildə baş verib.
“WhatsApp” vasitəsi ilə ona bir mesaj gəlib. Mesajda “Alibaba” tacirləri ilə əməkdaşlıq etdiyimiz ED-Shop şirkətimiz populyarlığını artırmaq üçün ödəməyə hazırdır, ona görə də biz 2 tapşırığı yerinə yetirmək üçün 2 manat ödəyirik, siz gündə 350-550 manata qədər qazana bilərsiniz” qeydi olub.
Qeydiyyat üçün yaşın göstərilməsi və Telegram hesabının olmasının vacibliyi vurğulanıb. Bundan sonra ona dərhal 2 tapşırıq verilib. Tapşırıqları link olaraq göndəriblər. Linkə daxil olarkən “Alibaba” saytına keçid alaraq hansısa bir məhsul açılıb və o məhsulu bəyənib, telefonun ekran görüntüsünü alıb, qarşı tərəfə göndərməli olub. Bu iki tapşırığı yerinə yetirdikdən sonra ona tanımadığı bir nəfərin telegram səhifəsi göndərilib və onunla işləmək tapşırılıb. Elnur Hüseynli telegram səhifəsinə daxil olub, həmin şəxsə yazıb. Bundan sonra ona bir qrup səhifəsinə daxil olmaq tapşırılıb və link göndərilib. Qrupa daxil olandan sonra isə ona bildirilib ki, tapşırıqlar 10 noyabr 2023-cü ildə saat 10:20-də başlayacaq. Belə də olub – o, tapşırıqları bir-bir icra etməyə başlayıb. Hər 4-cü tapşırıqdan sonra verilən hesaba depozit kimi pul köçürüb. Daha sonra bir link göndərilib ki, o saytdan qeydiyyatdan keçsin. Sayt qarşı tərəfə məxsus olub. Qeydiyyatdan keçəndən sonra ödədiyi pulu ora yükləyiblər.
Elnur Hüseynlinin sözlərinə görə, sonra saytdan bir məhsul alıb, qarşı tərəfin qeyd etdiyi ünvanı seçib:
“Tapşırıqları icra edəndən sonra depozit kimi köçürdüyüm pulu qaytarmalıydılar və üstündə də yatırdığım depozitin 25-30 faizini yerinə yetirdiyim 4 tapşırığa görə hər biri 2 manat ödəməli idilər. Köçürmələri “M10” hesaba etməliydilər. Amma dedilər ki, 4-cü tapşırıq 2 ya 3 mərhələdən ibrət olur və bu mərhələdə 101 manat da köçürməliyəm. Bu məbləği də hesablarına köçürdüm. Yenidən 980 manat köçürmə etməli olduğumu dedilər”.
Elnur Hüseynli bildirib ki, bu məbləği də ödədikdən sonra 3500 manat köçürmə etməli olduğunu deyiblər:
“Bu məbləği də 2 dəfəyə ödədim. Yenə də yazdılar ki, xətaya yol vermişəm, daha sonra 700, 700, 700, 1507.5, 1507.5, 1005, 1005 manat məbləğdə köçürmələr etdim. 11 noyabr 2023-cü ildə 4 min 422 manat köçürmə etdim. 2 gün sonra, 13 noyabr 2023-cü ildə “M10” hesablarına 3600 manat köçürmə etdim. Bu köçürməni edəndən sonra mənə vergi ödəməli olduğumu dedilər. Bundan sonra tapşırdılar ki, yenə mal seçim, pul köçürüm. “M10” hesablarına 4 min 103 manat köçürmə etdikdən sonra telegram hesabındakı bütün yazışmaları sildilər və məni blok etdilər”.
Elnur Hüseynli ümumilikdə 25 min manatdan artıq pul itirib. Hazırda onun şikayəti üzrə Nizami Rayon Polis İdarəsində araşdırma aparılır.
