Ev heyvanları sağlamlıq üçün faydalıdır və bu, elm tərəfindən çoxdan sübut edilmişdir. Onların mövcudluğu, şübhəsiz ki, insanları daha xoşbəxt edir, həm də ömrünü uzadır.
Tədqiqatlar təsdiq edir ki, ev heyvanları immuniteti artırmaqdan tutmuş stresi azaltmağa qədər bir çox cəhətdən bizə kömək edir. Ev heyvanları hətta kəskin qoxu duyğularından istifadə edərək xəstəlikləri aşkar edə bilirlər. Ev heyvanlarının başqa xüsusi üstünlükləri hansılardır? Alimlərin bəzi maraqlı faktları ilə tanış olaq.
Heyvanlar stress və narahatlığı azaldır
Özünüzü stresli hiss edirsiniz? Həkimlər sizə ev heyvanı almağı məsləhət görə bilər. Heyvanlarla ünsiyyət oksitosin hormonunun səviyyəsini artırır ki, bu da stress yaradan başqa bir hormon olan kortizolun səviyyəsini azaldır.
Heyvanlarla ünsiyyət kiçik uşaqlara xüsusilə güclü təsir göstərir. Ailəsində ev heyvanı olan uşaqlar daha az stress, narahatlıq və sosial problemlər yaşayırlar ki, bu da yetkinlik dövründə psixi, emosional və davranış pozğunluqlarının qarşısını alır.
Ev heyvanları xəstəliklərimizi aşkar edə bilir
Yüksək qoxu hissi olan heyvanlar insan bədənindəki ən kiçik dəyişiklikləri aşkar edə bilirlər. İtlər və pişiklər problemi hiss edərək sahiblərini xəbərdar edirlər. Bu zaman onların davranışları kəskin şəkildə dəyişir. Heyvanların hiss edə biləcəyi ən çox yayılmış xəstəliklər xərçəng, narkolepsiya, miqren, diabetdir.
İtlər xəstəliklərə xüsusilə həssasdırlar, onları yüksək dəqiqliklə müəyyən edirlər. Məsələn, itlərin döş xərçəngini 88 faiz, ağciyər xərçəngini isə 99 faiz dəqiqliklə hiss etdiyi barədə məlum hallar var.
Heyvanlarla ünsiyyət şəfa verir
Heyvan terapiyası bir çox xəstəxanada, qocalar evində, məktəblərdə və s. istifadə olunur. Amerikanın “Promises” narkomaniya müalicə mərkəzlərində xəstələrə ev heyvanları ilə ünsiyyət qurmaq imkanı təklif olunur. Mütəxəssislər hesab edirlər ki, tüklü heyvanlar əhvalınızı qaldıraraq daha sürətli sağalmağınıza kömək edir.
Yaşlılar və veteranlar üçün post-travmatik stress pozğunluğunun müalicəsində belə xüsusi bir proqram var – onlar xidməti itləri, labradorları və qızıl retrieverləri yetişdirmək üçün hazırlanırlar.
Qan təzyiqini aşağı salır
Heyvanlar qan təzyiqini azaltmağa və ürəyi gücləndirməyə kömək edir.
Kardioloqlar itlərin qan təzyiqini aşağı sala və sahiblərinin ürək sağlamlığını yaxşılaşdıra biləcəyini təsdiqləyirlər.
Yüksək qan təzyiqi olan insanlar üzərində aparılan bir araşdırmada məlum olub ki, itləri olan iştirakçılar ev heyvanları ilə tez-tez qarşılıqlı əlaqədə olduqları üçün qan təzyiqi səviyyələrində əhəmiyyətli bir azalma baş verir. Araşdırmalar pişik sahibləri üçün də oxşar nəticələr göstərib.
Ev heyvanları bizi daha aktiv edir
Ev heyvanları olan insanlar daha çox fiziki fəaliyyət göstərirlər. Buraya gəzinti və oyunlar, çimmək, təmizlik və s. aiddir.
Statistikaya görə, it sahibləri digər insanlardan 54 faiz daha çox tövsiyə olunan fiziki məşqləri yerinə yetirirlər.
Heyvanlar xəstəlik riskini azaldır
Bir it və ya pişik sahibi olmaq xərçəng, allergiya və ya ürək xəstəliyi kimi xəstəliklərin inkişaf riskini azalda bilər. Kaliforniya, San Fransisko və Stenford universitetlərinin alimləri müəyyən ediblər ki, ev heyvanları immuniteti gücləndirir, insanları xərçəngin bəzi formalarından qoruyur.
Ev heyvanları bəzən allergiyanın qarşısını almağa da kömək edə bilər. Amerikalı baytarlıq məsləhətçisi Marti Beker izah edir: “Heyvanlarla əhatə olunmuş fermalarda böyüyən uşaqlarda allergiya olmur. “Heyvan tükləri onlar üçün təbii immunoterapiyaya çevrilir”.
Ev heyvanları sosiallaşmanı asanlaşdırır
Ev heyvanları sizə yeni insanlarla ünsiyyət qurmaq imkanı verir. Məsələn: itinizlə parkda otursanız, yeni insanlar sizə yaxınlaşaraq onu oynatmağa başlayacaq və ya mağaza sahibi ilə ən yaxşı pişik qidası haqqında söhbət etsəniz sosiallaşmış olacaqsınız.
Atlantadakı Emori Universitetinin psixiatriya professoru Nadine Kaslou hesab edir ki, ev heyvanları sosial təcrid və həddindən artıq utancaqlıq kimi psixi sağlamlıq problemləri ilə mübarizədə faydalı ola bilər.
Nubar Süleymanova, “İki sahil”
