Rusiyada bağ evi və torpaq sahəsi olan vətəndaşları iyunun 11-dən ciddi yeniliklər gözləyir.
Yeni tənzimləmələrə əsasən, artıq şəhərətrafı torpaqların sahibləri yalnız tikinti və abadlıq planlarına uyğun davranmalı deyil, həm də istənilən texniki işlər üçün qonşuların yazılı razılığını təqdim etməlidirlər.
Qonşuların yazılı icazəsi olmadan qazıntı işləri aparmaq və ya açıq tualet quraşdırmaq, hətta sadə xəndək qazmaq belə qəti şəkildə qadağan olunacaq. Əvvəllər sahiblər torpaq sahələrində xəndək qaza, drenaj sistemi qura və su boruları çəkə bilirdilər. İndi isə bu işlər yalnız qonşulara heç bir zərər verməmək şərti ilə və onların yazılı razılığı ilə həyata keçirilə bilər. Əks halda, qanun pozuntusuna görə 300 rubldan 125 min rubla qədər cərimə nəzərdə tutulur.
Yeni qaydalara əsasən, qonşu sahələrlə sərhəddə yerləşən hasarlar yalnız şəffaf və zəncirvari tor materiallardan olmalıdır. Bu hasarların hündürlüyü 1,2 metrdən 1,8 metrə qədər olmalı, kölgə yaratmamalı və qonşu sahələrin işıqlandırılmasına mane olmamalıdır.
Əgər hasar kölgə salırsa və qonşunun əmlakından istifadəyə maneə yaradırsa, məhkəmə hasarın sökülməsi və zərərin ödənilməsi ilə bağlı qərar çıxara bilər. Təsdiq olunmadan sərhədlərin dəyişdirilməsi isə 5000 rubla qədər və ya torpaq sahəsinin kadastr dəyərinin 1,5%-i həcmində cəriməyə səbəb ola bilər.//News24.az
