Ağdam klubunun bu addımı ölkə ictimaiyyəti tərəfindən alqışlanır; Azərbaycanda uşaq futbolunun inkişafı yenidən gündəmdə
Azərbaycan futbolunda ilk dəfə olaraq bir klub digər komandanın bütün futbolçu və məşqçi heyətini öz strukturuna qatıb. Söhbət “Qarabağ” futbol klubundan gedir.
Musavat.com-un əldə etdiyi məlumata görə, “Qarabağ” klubu “Səbail”in U-12 aşağı yaş qrupunun komandasını tam heyətlə – bütün oyunçular və məşqçilər daxil olmaqla – öz akademiyasına transfer edib. Artıq hər iki klub arasında rəsmi müqavilə də imzalanıb. Bu addım Azərbaycanın futbol tarixində nadir və önəmli hadisə kimi qiymətləndirilir.
Transferə dair rəsmi müqavilənin imzalanacağı bildirilir. Qeyd olunur ki, bu addım həm istedadlı futbolçular üçün yeni imkanlar yaradacaq, həm də “Qarabağ”ın aşağı yaş qrupu siyasətində yeni mərhələnin başlanğıcı olacaq. Bu hadisə, gənc futbolçuların peşəkar arenaya keçidində vahid sistemin formalaşdırılmasının mümkünlüyünü də ortaya qoyur.
Belə bir yenilik Azərbaycanda uşaq futbolunun, yekunda milli futbolun inkişafını nə dərəcədə stimullaşdıra bilər? Ümumiyyətlə, ölkədə uşaq futbolunun inkişafı üçün hansı əngəllər var?
Əhəd Məmmədli
Futbolla yaxından maraqlanan, AĞ Partiya başqanının I müavini Əhəd Məmmədli “Yeni Müsavat”a açıqlamasında bir çox maraqlı məqamlara toxundu: “Ümumiyyətlə, “Qarabağ” futbol klubunun uğuru həm də doğru idarəçiliklə bağlıdır. 2007-ci ildən başlayaraq Azərbaycan futboluna çoxlu pul gəldi. Hər oliqarx bir klub qurdu. Yadınızdadır yəqin, “İnter”, “Bakı”, “Xəzər Lənkəran” kimi klublar quruldu. Amma uğurlu və davamlı olmadılar. Çünki bir çox yeni qurulan klubların idarəetməsi yanlış idi. Böyük yeyintilər var idi. Pullar hara xərclənir, bilinmirdi. Üstəlik, klub rəhbərlikləri qohumbazlıq, tayfabazlıq prinsipi üzərində formalaşmışdı. Klublar qeyri-peşəkarcasına idarə olunurdu. “Qarabağ” isə əksinə peşəkarlıq, təcrübə üstündə quruldu, inkişaf etdi. Maliyyə şəffaflığı var idi. Qohumbazlıq, yerlibazlıq yox idi. Odur ki, nəticə də oldu. İndi “Qarabağ” futbol klubu daha bir yeniliyə Azərbaycan futbolunda imza atdı. Uşaq futboluna “stavka” etdilər. Həm də yeniyetmə futbolçularımıza sahib çıxdılar. Dünyada o klublar güclüdür ki, bünövrələri, yaxşı futbol akademiyaları var. Misal olaraq “Barselona”, “Ayaks” kimi futbol klublarını göstərmək olar. “Qarabağ”ın bu qərarını doğru və yerində verilmiş qərar hesab edirəm. Ümid edirəm ki, bu cür qərarlar təkcə “Qarabağ” futbol klubunun deyil, həm də Azərbaycan futbolunun inkişafı üçün təkan verəcək”.
Natiq Muxtarlı
Tanınmış idman yazarı Natiq Muxtarlı hesab edir ki, “Qarabağ”ın “Səbail”in U-12 komandasını akademiyasına transfer etməsi bir qrup uşağın gələcəyi baxımından müsbət addımdırsa, həm də Azərbaycan futbolunun faciəvi durumunun bariz göstəricisidir: “”Səbail” elitanı tərk etməklə, uşaq komandaları baxımsız qalıb. Bu nəyin göstəricisidr? Bu o deməkdir ki, “Səbail” sabun köpüyü, süni yaradılmış komandadır. Azərbaycan Premyer Liqasında çıxış edən klubların əksəriyyəti bu durumdadır. Onların infrastrukturu, gələcək üçün planları yoxdur. Dövlət pul ayırıb, bir qrup “istedadlı dələduz” o vəsaiti mənimsəyib. İndi komanda elitanı tərk edir və məlum olur ki, uşaq komandalarını saxlamaq mümkün olmayacaq. Kimə lazımdır belə klublar? AFFA-nın əvvəlki rəhbərliyi çirkli vəsaiti bir mənbədən yumaq üçün belə süni klubları yaratmışdı.
“Qarabağ”ın “Səbail”in U-12 komandasına sahib çıxmaqla uşaq futbolunun inkişaf edəcəyini iddia etmək sadəlövhlük olar. Bəs “Səbail”in digər uşaq komandalarının taleyi necə olacaq?
Azərbaycanda uşaq futbolunun inkişafı üçün heç bir infrastruktur yoxdur, nə Bakıda, nə də bölgələrdə. İstedadlı futbolçular Azərbaycanın bölgələrindədir. Amma nəinki bölgələrdə, heç Bakının özündə də futbolla məşğul olmaq üçün infrastruktur yoxdur. Təsəvvür edin ki, Bakının ətrafındakı qəsəbələrində – Yeni Günəşlidə, Əhmədlidə, Qaraçuxurda, Mərdəkanda, Buzovnada futbolla məşğul olmaq üçün heç bir şərait yoxdur.
İndi hər bir valideyn övladını futbolla məşğul olmaq üçün şəhər mərkəzinə aparmaq iqtidarında deyil. Deməli, futbol meydançaları, məktəbləri uşaqlar üçün əlçatan olmaldır. Onlar orta məktəbdən çıxıb futbol məktəblərinə özləri rahat şəkildə getməlidirlər. Futbolun kütləviliyinə belə nail olmaq mümkündür. Kütləvilik olsa, istedadları da üzə çıxarmaq asan olacaq.
Hələ ki AFFA-nın indiki rəhbərliyi də bu yöndə heç bir addım atmır. Onlar uşaq futbolu ilə bağlı infrastrukturu inkişaf etdirmək üçün araşdırma aparmır, yerlərdə vəziyyəti öyrənmirlər. Azərbaycan xalqının pulu Santuş və dəstəsinə xərclənir. AFFA rəhbərliyi də rahat kreslolarda oturub futbolumuzun faciəsindən zövq alır. Və biz də hər şeyi “Qarabağ”dan gözləyirik. Düşünürük ki, “Qarabağ” “Səbail”in küçəyə atdığı bir dəstə uşağa sahib çıxıbsa, deməli, futbolumuz inkişaf edəcək. Mümkün deyil. Belə idarəetmə ilə heç nə mümkün deyil. İndi AFFA rəhbərliyinin gecəsi-gündüzü olmamalı idi, rayon-rayon, kənd-kənd gəzməli idilər. Onlar isə nəinki bölgələrə, Bakının qəsəbələrinə getməyə də ərinirlər. Və biz Azərbaycanda futbolun inkişaf edəcəyini düşünürük. Yanılırıq, özü də möhkəm yanılırıq”.
Kənan Məstəliyev
İdman mütəxəssisi Kənan Məstəliyev “Qarabağ” klubunun uşaq futboluna xüsusi diqqət yetirməsindən söz açdı: “Maraqlı və önəmli addımdır. Bu, həm dağılmaq üzrə olan heyətə sahib çıxmaq, həm də öz komandanın heyətini genişləndirmək, rəqabəti artırmaq deməkdir. Rəqabət olan yerdə isə həmişə inkişaf var. “Qarabağ” son illərdə uşaq futboluna xüsusi diqqət yetirməyə başlayıb. Akademiya qurulub, şərait yaxşılaşdırılıb, yaxşı, tanınmış və təcrübəli məşqçilər dəvət olunub. Əminliklə demək olar ki, bu klubda uşaq futbolu yaxşı səviyyəyə gələcək. Qeyd olunan addımı da bu qəbildən hesab etmək olar. 12 yaş strateji yaşdır, futbolçuların formalaşma prosesinin vacib nöqtələrindəndir. Bu yaşda rəqabətin artırılması vacibdir. Əlavə 12-15 uşağın gəlişi həm də təcrübə mübadiləsinə kömək olacaq. “Səbail”də bir yerdə oynamış, bir-birilərini yaxşı tanıyan, oyun üslublarına bələd olan futbolçulara yeni komandada rahat olacaq. Düşünürəm ki, “Qarabağ”ın bu addımı digər komandalarımıza nümunə rolunu oynaya bilər”.
Cavanşir ABBASLI,
“Yeni Müsavat”
