Yay aylarında ən çox sevilən meyvələrdən olan yemişi düzgün seçmək ən az qarpız qədər vacibdir.
Bu sahədə 40 illik təcrübəsi olan meyvə-tərəvəz satıcılarının sirri ortaya çıxıb.
ARANTV.AZ Türkiyə mətbuatına istinadla yemiş seçməyin 4 əsas üsulunu təqdim edir:
Qabığına diqqət edin
Əgər qabıq yaşıl və parlaqdırsa, bu, yemişin yetişmədiyini bildirir. Yetişmiş yemiş sarıya çalan rəngə malik olur və üzərində aydın, naxışlı xətlər görünür.
Qoxusuna diqqət edin
Yemişin sap hissəsinə burnunuzu yaxınlaşdırın. Əgər bu hissədən xoş qoxu gəlirsə, bu, meyvənin yetişdiyini və dadlı olduğunu göstərir.
Barmağınızla vurun
Yemişin yetişib-yetişmədiyini müəyyənləşdirmək üçün barmağınızla onun üzərinə yüngülcə vurun. Əgər “bum-bum” kimi səs gəlirsə, bu, meyvənin yetişmiş olduğunu göstərir. Əgər səs boğuq və zəif çıxırsa, bu, içinin boş olduğunu və ya xarab olmağa başladığını göstərə bilər.
Ağırlığına baxın
Eyni ölçüdə olan yemişlərdən daha ağır olanı seçin. Ağırlıq meyvənin içinin sulu və dolu olduğunu göstərir.
