İyulun 14-də Milli Məclisin növbədənkənar sessiyası çərçivəsində sonuncu iclası keçirildi və bununla da deputatlar tətilə buraxıldı. Səlahiyyəti dövründə Milli Məclis ildə iki dəfə – iyulun 15-dən avqustun 30-dək və yanvarın 1-dən 15-dək tətilə buraxılır. Bəs deputatlar yay tətilini harada keçirəcəklər?
Qeyd edək ki, Azərbaycan Milli Məclisinin deputatları konstitusiyaya əsasən, yay tətilinə çıxsalar da, onlar bu dövrdə də rəsmi olaraq vəzifədə qalırlar və aylıq maaşlarını tam şəkildə alırlar. Yəni yay tətili zamanı deputatlara əlavə “tətil pulu” verilmir, sadəcə, adi maaşlarını almaqda davam edirlər.
“Azərbaycan Respublikası Milli Məclisinin deputatının statusu haqqında” Qanuna olunan son dəyişikliyə əsasən, deputatların maaşı 43% artırılıb, onlara hər ay olmaqla aylıq maaşlarının iki mislində əlavə verilir.
Azpolitika.info yazıb ki, hazırda Milli Məclis sədrinin aylıq vəzifə maaşı 3550 manatdır. Bundan əlavə, o, hər ay maaşının iki misli qədər əlavə alır. Nəticədə spikerin aylıq rəsmi gəliri 10 650 manat təşkil edir. Milli Məclisin sədrinin birinci müavininin maaşı 3195 manat, əlavələrlə birlikdə 9585 manat olur. Sədr müavinlərinin maaşı əlavələrlə birlikdə 9052.5 manat təşkil edir. Komitə və komissiya sədrlərinin əməkhaqqı 8520 manat, komitə və komissiya sədr müavinlərinin əməkhaqqı isə 7987.5 manatdır. Sıravi deputatların maaşı isə 7455 manat təşkil edir.
Hikmət Babaoğlu
Millət vəkili Hikmət Babaoğlu “Yeni Müsavat”a açıqlamasında bildirib ki, yay istirahətinin bir hissəsini Qarabağda, işğaldan azad edilmiş torpaqlarda keçirməyi planlaşdırır: “Yay istirahətimi işğaldan azad olunmuş torpaqlarımızda keçirəcəm. Hazırda Şuşaya gedirəm. Beş gün Şuşada qalacam. Daha sonra bir gün Laçına, bir gün Kəlbəcərə, bir gün Qubadlıya, bir gün Xankəndinə, bir gün isə Ağdərəyə səfər edəcəyəm.
Bundan sonra Qars şəhərinə toy mərasiminə dəvət olunmuşam. Orada yaşayan, əslən azərbaycanlı olan qohumlarım Qarsın əslən qərbi azərbaycanlı olan bələdiyyə başqanı ilə birlikdə qərbi azərbaycanlı gəncimizin nikah mərasimində şahidlik edəcək, toyda iştirak edəcəyik. Yay tətilimin bir hissəsini də Qarsda keçirəcəyəm”.
Ceyhun Məmmədov
Millət vəkili Ceyhun Məmmədov isə yay istirahət planını bu cür açıqlayıb: “Doğrusu, hələ istirahət etmək alınmır. Ola bilər ki, qarşıdan gələn avqust ayında iki günlük Qarabağa – Cəbrayıla səfər edim. Planım rayona baş çəkmək, həm də vətəndaşların qəbulunu keçirmək və onlarla görüşməkdir. Yəni parlament məzuniyyətdə olsa da, televiziya, media görüşləri və tədbirlər davam edir. Ona görə də hələlik bu barədə danışmaq mümkün deyil. Ola bilsin ki, avqust ayında bölgələrin birində 10 günlük istirahət edim. Hələ ki plan bundan ibarətdir və ölkə xaricinə getmək məsələsi gündəmdə deyil. Əsas səbəb isə işlərin çoxluğu ilə bağlıdır. Bu formada fəaliyyətimizi quracağıq”.
Azər Badamov
Deputat Azər Badamov da mətbuata açıqlamasında tətil dövründə işğaldan azad edilmiş ərazilərə səfər etməyi planlaşdırdığını deyib: “Artıq işğaldan azad olunmuş ərazilərimizə səfərə başlamışam. Xankəndi, Şuşa, Laçın, Qubadlı və Zəngilan rayonlarına səyahət edirəm. Düzdür, Şuşada dövlət tədbirlərində iştirak etmək məqsədilə səfərdə oluruq. Amma işğaldan azad edilmiş ərazilərə fərdi şəkildə səfər etmək, görülən yenidənqurma və bərpa işləri ilə daha ətraflı tanış olmaq, öz doğma yurdlarına qayıdan keçmiş məcburi köçkünlərin öz doğma yurdlarında həyatlarına necə başladıqlarını görmək bir millət vəkili olarak mənə çox maraqlıdır. Ona görə də məzuniyyətimə Qarabağdan başlamışam. Sonra da məzuniyyətimi Qusarda keçirməyi planlaşdırıram”.
Xalidə GƏRAY,
“Yeni Müsavat”
