Protein təkcə əzələlər üçün deyil, həm də daxili orqanların düzgün işləməsi, güclü immunitet, dırnaqlar, saçlar və orqanizmin daha bir çox fəaliyyət sahəsi üçün lazımdır. Bu maddə həyati vacib elementdir, onsuz orqanizmin normal fəaliyyəti qeyri-mümkündür. Bəs yemək rasionunda bunun kifayət qədər olmadığını necə müəyyən etmək olar? Diyetoloqlar diqqət yetirməyə dəyər olan bir neçə xarakterik əlaməti vurğulayırlar.
AZƏRTAC tibb saytlarına istinadla xəbər verir ki, zülal bir çox vəzifələri yerinə yetirir: o, əzələ kütləsinin formalaşmasında iştirak edir, immuniteti qoruyur, dərinin və dırnaqların vəziyyətini yaxşılaşdırır, həmçinin toxluq hissini saxlamağa kömək edir. Lakin bu makronutrientin çatışmazlığı uzun müddət diqqətdən kənarda qala bilər.
Amerikalı diyetoloq Cessika Kordinq vurğulayır ki, insanların çoxu yemək başına təxminən 25-30 q proteinə ehtiyac duyur. Ancaq dəqiq rəqəmlər həyat tərzindən, yaşdan və sağlamlıqdan asılıdır. Əgər müntəzəm olaraq kifayət qədər protein qəbul etmirsinizsə, vücudunuz siqnallar göndərməyə başlayacaq.
Hansı simptomlar protein çatışmazlığını göstərə bilər:
Daimi aclıq hissi
Əgər bir az əvvəl yemək yemisinizsə, lakin tez bir zamanda yenidən aclıq hiss edirsinizsə, bu, protein çatışmazlığının nəticəsi ola bilər. Protein sizi karbohidratlar və ya yağlarla müqayisədə daha uzun müddət tox saxlayır.
Yaraların gec sağalması
Protein toxumaların bərpası və kollagen istehsalı üçün lazımdır. Əgər cızıqlar, sıyrıqlar və ya yaraların sağalması qeyri-adi uzun müddət çəkirsə, bədənin sadəcə lazımi “tikinti materiallarını” qəbul etmədiyi də buna səbəb ola bilər.
Məşqlərdə irəliləyişin olmaması
Siz müntəzəm məşq edirsiniz, amma əzələləriniz böyümür? Bu, zülal çatışmazlığı ilə bağlı ola bilər, çünki o, məşqdən sonra əzələ liflərinin bərpası və böyüməsi üçün lazımdır.
Saç tökülməsinin artması
Zülal çatışmazlığı ilə orqanizm “lazımsız” prosesləri, o cümlədən saç böyüməsini azaldır. Bu, saç tökülməsinin artması və saç follikullarının yavaş yenilənməsi şəklində özünü göstərə bilər.
Zəif və kövrək dırnaqlar
Dırnaqlar əsasən zülal növü olan keratindən ibarətdir. Əgər çatışmazlıq olarsa, dırnaqlar incə, kövrək olur və asanlıqla qopur. Həm də bu prosesi müşayiət edən elementlər – biotin, kalsium, C və E vitaminləri vacibdir.
Protein çatışmazlığı zamanı nə etməli?
Alimlər zülalın gün ərzində bərabər paylanmasını, onu bir yeməkdə cəmləşdirməməyi tövsiyə edirlər. Siz onun miqdarını tədricən artıra bilərsiniz: səhər yeməyinə bir porsiya kəsmik və ya qatıq əlavə edin, qəhvənizi zülal tozu ilə zənginləşdirin, menyunuza yumurta, az yağlı pendir, balıq, bitki mənşəli alternativlər qatın, həmçinin zəruri hallarda xüsusi əlavələrdən istifadə də mümkündür.
Normal zülal səviyyəsinin saxlanması enerji, gözəllik və möhkəmliyin qorunması istiqamətində mühüm addımdır.
