Azərbaycanda elektrik cərəyanı ilə bağlı bədbəxt hadisələr kəsilmir. Ötən 1 gün ərzində ard-arda 3 faciə baş verib.
Naftalan şəhərində yerləşən “Möcüzəli Naftalan” sanatoriyasının 1989-cu il təvəllüdlü işçisi A. Hüseynov elektrik cərəyanı vurması nəticəsində ölüb.
Ardınca Qusar rayonunun Aşağı Ləyər kəndində usta kimi fəaliyyət göstərən 1978-ci il təvəllüdlü Hacıverdi Səfərov fərdi evdə iş görərkən elektrik cərəyanına qapılaraq dünyasını dəyişib.
Ağdaşda yeniyetmə uşağı elektrik cərəyanı vuraraq öldürüb. Belə ki, 2014-cü il təvəllüdlü rayon sakini Yaqub Hacıyevi yaşadığı Ağdaş şəhərindəki evin həyətində elektrik cərəyanı vuraraq öldürüb.
Bu hadisələr sadəcə qəza deyil, həm də cəmiyyətimizdə təhlükəsizlik mədəniyyətinin zəifliyini göstərir.
Texniki təhlükəsizlik üzrə mütəxəssis Rahim Əliyev Musavat.com-a bildirib ki, Azərbaycanda elektriklə davranış qaydalarına münasibət hələ də çox səthi və laqeyddir:
“İnsanlarımız düşünür ki, elektrik sadəcə məişət rahatlığıdır. Eyni zamanda ən təhlükə mənbələrindən biri olmasını nəzərə almırlar. Təəssüf ki, nəm əllə rozetkaya toxunmaq, açıq naqillərlə işləmək, nasaz avadanlıqdan istifadə etmək kimi davranışlar normaya çevrilib. Nəticədə hər il onlarla insan həyatını itirir”.
Rahim Əliyev deyir ki, faciələrin qarşısını almaq üçün yalnız fərdi ehtiyatlılıq kifayət etmir. Dövlət qurumlarının da üzərinə böyük məsuliyyət düşür: “Ustaların fəaliyyətinə ciddi nəzarət lazımdır. Sertifikat almayan, təhlükəsizlik kursu keçməyən şəxsin elektrik işləri görməsinə icazə verilməməlidir. Digər tərəfdən, bazarda keyfiyyətsiz, Çin istehsalı ucuz naqil və cihazların satışı geniş yayılıb. Bu da faciələrin sayını artırır.
Hər kəs elementar qaydalara riayət etməklə həyatını qoruya bilər. Bunun üçün elektrik cihazlarına nəm əllə toxunmamaq; naqillərdə zədələnmə varsa, dərhal dəyişdirmək; uşaqları elektrik rozetkalarından uzaq saxlamaq, qoruyucu örtüklərdən istifadə etmək; yüksək gərginlik xətlərinə yaxınlaşmamaq; elektrik işlərini yalnız peşəkar ustalara həvalə etmək; fırtına və yağış zamanı açıq havada elektrik naqillərinə toxunmamaq; avadanlıqları istifadədən əvvəl torpaqlama sisteminin işlək olduğuna əmin olmaq vacib şərtlərdir”.
Rahim Əliyev qeyd edir ki, əslində, problem yalnız texniki deyil, həm də sosialdır: “Azərbaycanda insanlar təhlükəsizlik anlayışını gündəlik həyatın tərkib hissəsi kimi qəbul etmirlər. Məktəbdə, universitetdə bu mövzuda dərslər keçirilmir, televiziyada sosial çarxlar çox nadir hallarda yayımlanır. İnsan riskin nə qədər böyük olduğunu anlamadığı üçün ehtiyatsız davranır. Vəziyyəti dəyişmək üçün məktəblərdə “təhlükəsizlik dərsləri” keçirilməli; elektrik ustaları üçün sertifikatlaşdırma sistemi tətbiq olunmalı; keyfiyyətsiz elektrik avadanlıqlarının idxalına qadağa qoyulmalı; televiziya və sosial mediada maarifləndirmə kampaniyaları genişləndirilməli; təhlükəsizlik qaydalarını pozan şirkətlərə qarşı sərt cərimələr tətbiq edilməlidir”.
Mütəxəssis bildirir ki, 1 günün içində 3 insanın elektrik cərəyanının qurbanına çevrilməsi sadəcə şəxsi ehtiyatsızlıq deyil, həm də sistemli boşluqların nəticəsidir: “Azərbaycan vətəndaşı öz evində, işində, küçədə güvəndə olmalıdır. Bunun üçün həm dövlət, həm də cəmiyyət “heç nə olmaz” laqeydliyindən qurtulmalı, həyatın təhlükələrdən qorunmasının vacibliyini dərk etməlidir”.
E.MƏMMƏDƏLİYEV,
Musavat.com
