Payızın gəlişi ilə şəhərin küçələrini nəmli və sarı-qəhvəyi örtük bürüyüb. Bu dəyişiklik yalnız küçələrə təsir etmir – bazarlara da öz təsirini göstərir.
Musavat.com olaraq “8-ci km” bazarına baş çəkdik, qiymətləri öyrəndik və alıcı-satıcılarla söhbət apardıq.
Göründüyü kimi, payız mövsümü həm təzə məhsul bolluğunu, həm də qiymət dəyişikliklərini özü ilə gətirib.
Bazara daxil olanda ilk diqqət çəkən şey meyvələrin rəngarəngliyi oldu. Nar bir manata, üzüm isə 1–2 manat arasında satılır.
Alıcılar deyir ki, narın qiyməti sabit qalıb, amma keyfiyyət baxımından əvvəlki illərlə müqayisədə daha yaxşıdır. Satıcıların sözlərinə görə, bu il məhsul bol olub, buna görə də qiymət çox yüksəlməyib.
“Qiymət elə də dəyişməyib, amma müştəri əvvəlki illərdəki qədər çox deyil”, – deyə nar satan bildirir.
Onun sözlərinə görə, havaların tez soyuması məhsula təsir etmir, lakin alıcı sayını azaldıb.
Tərəvəz bölməsində isə vəziyyət bir az fərqlidir. Pomidorlar 1,30 manatdan başlayır, ucuz olanlar isə hətta 60 qəpiyə də satılır. Lakin görünüşü və dadı daha qəşəng olanlar 4 manat 50 qəpiyə satılır. Badımcanın qiyməti 50 qəpikdən 1 manata qədər dəyişir, bibər isə 80 qəpikdir.
Alıcılar qeyd edirlər ki, pomidorun ucuz olanlarını bazarda görmək onları sevindirir, amma keyfiyyət fərqlidir.
“Pomidorun 60 qəpiyə olanını aldım, amma baxanda keyfiyyət bir az zəifdir”, – deyə alıcı bildirib.
Lobya 1,50–2,50 manat arasında dəyişir. Xiyar 80 qəpikdən 1,50 manatadək satılır.
Tərəvəz qiymətləri keçən illə müqayisədə nisbətən sabit qalıb, amma meyvələrdə kiçik dəyişikliklər müşahidə olunur.
Payızın gəlməsi ilə bazarda qış meyvələrinin də qiymətləri diqqət çəkir. Mandarin 1–1,50 manata, alma 1 manata, armud isə 1,50 manata satılır.
“Qızıl əhmədi” alma növünü 2 manata tapmaq mümkündür.
Göbələk 3 manata satılır. Satıcı qeyd edir ki, bu qiymət kifayət qədər sərfəlidir və məhsulun keyfiyyəti ilə uyğun gəlir.
“Hələ təzə və ləzzətli göbələkdir, buna görə də qiymət normaldır”, – deyə o əlavə edir.
Alıcılar isə payızın gəlişindən şikayətçi deyillər, əksinə, məhsul bolluğunu görüb razılıq bildirirlər.
“Hava soyuyub, amma meyvə və tərəvəz bolluğu var. Qiymət də normaldır, bazarlıq etmək olar”, – deyə alıcı vurğulayır.
Payızın bazarlara təsiri həm də məhsulların rəngində, dadında və keyfiyyətində hiss olunur. Narın qırmızı və şirəli, üzümün təzə və dadlı olması, badımcanın iri və sağlam görünməsi alıcının diqqətini çəkir.
Beləliklə, payız bazarlara həm rəng, həm dad, həm də qiymət baxımından öz izini qoyub. Alıcılar həm ucuz, həm də keyfiyyətli məhsul almaq imkanı əldə edib. Satıcılar isə mövsümün gətirdiyi bol məhsuldan razıdır, lakin alıcı sayının azaldığını qeyd edirlər.
Şahanə Rəhimli
Musavat.com
