Qaydalara əməl edək, sağlamlığımızı qoruyaq…
Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli növbəti hospitalın istifadəyə verilməsi ilə Azərbaycanda COVID-19-a qarşı mübarizə üçün imkanlar artırıldı
Hospitalın açılışı münasibətilə tibb müəssisəsinin kollektivi ilə videoformatda görüşən Prezident İlham Əliyev koronaviruslu xəstələrin müalicəsi üçün nəzərdə tutulan, ən müasir standartlara cavab verən hospitalda yaradılan şəraiti yüksək dəyərləndirdi. Bu il iyulun 7-də açılan 800 çarpayılıq hospitalın artıq 2277 çarpayılıq tibb müəssisəsinə çevrilməsi, hər bir çarpayının oksigen xəttinə birləşmiş cihazlarla təmin olunması təqdirəlayiqdir. Ümumilikdə 267 reanimasiya çarpayısı olan,
laboratoriyalarında müxtəlif müayinələri dəqiqliklə və operativ şəkildə aparmaq üçün bütün şərait yaradılan hospitaldakı məlumatların idarəetmə sistemi sayəsində mərkəzi qərargahda müalicə prosesinə aid bütün məlumatların eyni mənbədən qəbul edilib, idarə olunması isə yenilikdir.
Ümumiyyətlə, pandemiya dövründə ölkəmizdə yeni tibb müəssisələrinin tikintisi üçün xeyli vəsaitin ayrılması, mövcud çarpayı fondunun artırılmasına imkan yaradan 600 yerlik «Yeni Klinika»nın, 4100 çarpayıya malik modul tipli 11 xəstəxananın inşa edilməsi, ehtiyat variant kimi iki Olimpiya Kompleksinin səhiyyə ocağı kimi modernləşdirilməsi COVID ilə mübarizədə Azərbaycan təcrübəsinin uğurlarındandır.
«COVID ilə mübarizədə bizim səhiyyə sistemimizin maddi-texniki bazası xüsusi rol oynayır. Bununla bərabər, laboratoriyaların sayını böyük dərəcədə – bir neçə dəfə artırmışıq. Pandemiya başlayanda bizim cəmi 6 laboratoriyamız var idi. Bu gün biz o laboratoriyaların sayını 45-ə çatdırırıq. Ölkəmizdə 900 mindən çox test keçirilibdir. Adambaşına düşən testlərin sayına görə Azərbaycan dünya miqyasında qabaqcıl yerlərdədir» söyləyən Prezident İlham Əliyev vurğulayır ki, əsas məqsədimiz və vəzifəmiz insanlara yüksək səviyyəli tibbi xidmət göstərməkdir.
Pandemiya dövründə həyatlarını təhlükə altında qoyaraq xəstələrin müalicəsi ilə məşğul olan həkimlərin əməyini yüksək qiymətləndirən Prezident İlham Əliyevin «Səhiyyə sistemində çalışan insanlar prinsip etibarilə daim dövlət tərəfindən qayğı ilə əhatə olunur. Tikilmiş xəstəxanalar həkimlərin iş yeridir. Həkimlərin həm iş yerlərinin müasirləşdirilməsi, eyni zamanda, onların maliyyə vəziyyətinin yaxşılaşdırılması daim diqqət mərkəzində olub. Pandemiya dövründə bu diqqət daha da genişmiqyaslı olub. Təkcə onu demək kifayətdir ki, COVID xəstələrinə xidmət edən həkimlərin əməkhaqqı 3-5 misli artırılıb» sözlərində ölkə vətəndaşlarının da sağlamlıq keşikçilərinə minnətdarlıqları ifadə olunur. Türkiyədən, Rusiyadan, Çindən, İtaliyadan, Kubadan dəvət olunmuş həkim briqadaları ilə birgə fəaliyyət göstərən tibb işçilərimizin dünya səhiyyə sistemində tətbiq olunan yeniliklər barədə mükəmməl təcrübə qazanmaları səhiyyəmizin gələcək inkişafı üçün də etibarlı zəmindir. Pandemiya dövründə COVID-lə mübarizəni nəzarətdə saxlayan tolerant ölkə kimi tanınan Azərbaycanın Ümumdünya Səhiyyə Təşkilatına (ÜST), 30-dan çox ölkəyə humanitar yardım göstərməsi də beynəlxalq səviyyəli birlik və həmrəyliyin təzahürüdür.
Koronavirusa qarşı mübarizənin ilk günlərindən ölkədə insan amilinə qayğını dövlətin sosial-iqtisadi siyasətinin əsas prioriteti kimi diqqətdə saxlayan Prezident İlham Əliyevin tövsiyə və təkliflərinə əsasən əhalinin sosial müdafiəsinin qorunması istiqamətində mühüm layihə və islahatlar həyata keçirildi. Pandemiya dövründə inkişaf etmiş ölkələrdə iqtisadi tənəzzül 10, 15, 20, 25 faiz səviyyəsində olsa da, ölkəmizdə görülmüş tədbirlər nəticəsində 7 ayda iqtisadiyyat cəmi 2,8 faiz aşağı düşüb.
Görülən işlərlə kifayətlənməməyi, gözlənilən təhlükələrə qarşı hər zaman hazır olmağı tövsiyə edən dövlət başçımız ÜST –ın tövsiyələrinə əməl edilməsini, koronavirusa qarşı peyvəndlərin tapılması üzərində aparılan tədqiqat işləri ilə maraqlanmağı, COVID qarşı peyvəndin ölkəmizə gətirilməsi ilə əlaqədar fəal iş aparılmasını tapşırır. «Mən ümid edirəm ki, Azərbaycan bu sahədə də peyvəndi əldə edən birinci ölkələr sırasında olacaqdır» söyləyən Prezident İlham Əliyev onu da bildirir ki, beynəlxalq sertifikatlaşdırma aparılandan sonra daha çox ümidverici vaksin ölkəmizə gətiriləcək.
Bu sadalananlar dövlətin ölkə vətəndaşlarına göstərdiyi diqqət və qayğının gündəlik mənzərəsidir. Amma koronavirusa qarşı mübarizədə əsas məsələ vətəndaşların dövlətin qarşıya qoyduğu tələblərə ciddi riayət etməsidir. Aylardan bəri davam edən karantin rejiminin bəzi sahələr üzrə yumşaldılması, xəstəliyə yoluxanlarla sağalanlar arasında müsbət tendensiyanın davam etməsi heç kimdə arxayınlıq yaratmamalıdır. Nazirlər Kabineti yanında Operativ Qərargahın gündəlik açıqlamasında da bildirilir ki, əgər müsbət dinamika davam edərsə və xəstələnmə hallarında artım olmazsa, yumşalma tədbirləri digər sahələrə də şamil olunacaq.
Belə ki, vəziyyətin tam nəzarət altında saxlanılması dövlət kimi, hər bir vətəndaşın da borcudur. Ölkədə yoluxma hallarının minimuma endirilməsi üçün mövcud resurslardan səmərəli istifadə edən dövlətimizin müəyyənləşdirdiyi qaydalara riayət etməklə istənilən nəticəyə nail olmaq mümkündür.
Müşahidələr göstərir ki, sərhədləri açan, turist qəbuluna «yaşıl işıq» yandıran Avropa ölkələrində pandemiyanın yeni dalğası başlandı, koronavirusa yoluxanların sayı artdı. «Əlbəttə ki, bəzi Avropa ölkələrində xəstələrin sayında kəskin artım bizi düşündürür və daha ehtiyatlı addımların atılmasına sövq edir. Çünki bir daha demək istəyirəm ki, birinci dərəcəli məsələ insanların sağlamlığıdır. Əgər vətəndaşlarımız bundan sonra da məsuliyyətli olarlarsa, – mən qeyd etməliyəm ki, son müddət ərzində biz bu məsuliyyəti doğrudan da görürük, hiss edirik, bu, real nəticələrdə öz əksini tapır, – hesab edirəm ki, qısa müddət ərzində biz normal, adi həyata qayıda bilərik. Amma buna nail olmaq üçün əlbəttə ki, vətəndaşların məsuliyyəti hazırda birinci dərəcəli məsələdir» söyləyən dövlət başçımızın tələbi də bəllidir: Karantin rejiminin yumşaldılacağı sahələrdə gözlənilən təhlükələr, risklər nəzərə alınmalı, vətəndaşlar tövsiyə olunan gigiyenik qaydalara ciddi yanaşmalı, maskalardan, qoruyucu dezinfeksiya vasitələrindən mütəmadi istifadə olunmalıdır: «Birmənalı şəkildə deyə bilərəm ki, Azərbaycanda tətbiq olunan qaydalar, vəziyyətə uyğun şəkildə atılan addımlar və karantin rejimi öz səmərəsini verir. Bunun nəticəsində artıq bir çox şəhərlərdə bütün karantin məhdudiyyətləri aradan qaldırılıb. Ancaq böyük şəhərlərdə bu qalıbdır və bizim hamımızdan asılıdır ki, daha da inamla və daha da qısa müddət ərzində əlavə yumşalma addımları ataq.»
Xuraman İsmayılqızı, «İki sahil»
