Qələbə Azərbaycan xalqının zəfər salnaməsinə əbədi yazılıb
Dağlıq Qarabağ münaqişəsinin həlli üçün siyasi, diplomatik müstəvidə, döyüş meydanında üstün mövqeyə malik Azərbaycan güclü ordusuna inanır və arxalanır
«Bizim üçün bir nömrəli milli məsələ – Ermənistan-Azərbaycan Dağlıq Qarabağ münaqişəsinin həllidir. Mən bu məsələ ilə bağlı öz fikirlərimi dəfələrlə demişəm – beynəlxalq təşkilatlarda, beynəlxalq kürsülərdən, ölkə daxilində. Çox da təkrarlamaq istəmirəm, amma bir şeyi istəyirəm Azərbaycan xalqı bilsin ki, bu, milli məsələdir. Biz bu məsələni elə həll etməliyik ki, bu həll Azərbaycan xalqını tam təmin etsin. Hər hansı bir yarımçıq həll bizə lazım deyil» sözləri ilə Prezident , Ali Baş Komandan kimi Dağlıq Qarabağ münaqişəsi ilə bağlı siyasətini açıqlayan dövlət başçımız İlham Əliyev 2016-cı il Aprel döyüşlərinin, 2018-ci il uğurlu Naxçıvan əməliyyatının davamı olan İyul hadisələrini Milli Ordumuzun rəşadət səhifələri adlandırır. Həmin döyüşlərdə Ağdərə, Füzuli, Cəbrayıl rayonlarının bir hissəsini, strateji yüksəklikləri azad edən Milli Ordumuz Ermənistanın bir neçə yaşayış məntəqəsinə, Ermənistandan Dağlıq Qarabağa gedən Gorus- Laçın-Xankəndi avtomobil yoluna nəzarət edir.
Sələflərindən fərqli addım atmağa çalışan, cəbhə xəttini Ermənistan- Azərbaycan dövlət sərhədinin Tovuz istiqamətinə «yönəldən», əslində isə boyundan hündürə tullanmaqla həyatının ən böyük qələtini edən Paşinyan Azərbaycan əsgərinin onun başına endirdiyi zərbələrdən hələ də özünə gəlməyib.
Bu ilin iyul ayında işğalçının Ermənistan- Azərbaycan dövlət sərhədində törətdiyi təxribat da həmişəki kimi Ermənistanın məğlubiyyəti ilə nəticələndi. «Qarabağ Azərbaycandır-nida işarəsi» söyləyən Prezident, Ali Baş Komandan İlham Əliyevin əmrini yerinə yetirən Milli Ordumuzun əsgərləri baş nazirin ağzından vurdular. Aprel döyüşlərində olduğu kimi, düşmənə ağır zərbə endirilərək şəhidlərimizin qisası alındı. Baş verən toqquşmalar və qanlı döyüşlər Azərbaycanın müdafiə qüdrətini, Silahlı Qüvvələrimizin gücünü, xalqla iqtidar birliyini dünyaya bəyan etdi. Canlı qüvvə və texnika sarıdan xeyli itki verən Ermənistana tarixi dərs verən Azərbaycan Qarabağ uğrundakı müharibədə üstünlüyünü subut etdi. Artıq bütün dünya ictimaiyyəti də bilir ki, Ermənistanın törətdiyi təxribatların əsas səbəbi xarici havadarları, beynəlxalq fondlar tərəfindən maliyyələşən, dəstəklənən, hakimiyyətə qanunsuz yollarla gələn, ölkəni idarə edə bilməyən, daxili gərginliyi azaltmağa çalışan Nikol Paşinyanın diqqəti özündən uzaqlaşdırmaq cəhdidir. Çevriliş texnologiyalarından istifadə edərək hakimiyyətə gələn, ermənilərə « çiçəklənən Ermənistan», «demokratik ölkə» vəd edən Paşinyanın yalanlarından təngə gələn ermənilərin idarəetmə təcrübəsi olmayan iqtidar əleyhinə keçirdikləri aksiyalardan təşvişə düşən baş nazir işğal altında saxladıqları «Dağlıq Qarabağa müstəqillik veriləcəyi» bəhanəsi ilə xalqını aldadır, iqtidarlıq müddətini uzatmağa çalışır. İqtisadi böhran içərisində qalan, əhalisi miskin vəziyyətdə yaşayan Ermənistanı xarici ölkələrdən ayrılan ianələr hesabına yaşatmağın qeyri-mümkün olduğun anlayan Paşinyan ona kreslo bəxş edən havadarlarının əmrlərini yerinə yetirir, təxribatlar törədir.
Əvvəlki iqtidarın iş prinsipinə uyğun dövlət büdcəsini talan edən, korrupsiya rejimini davam etdirən Paşinyanın ailə mafiyasının yaratdığı iqtisadi bataqlıqda çabalayan Ermənistanın üzləşdiyi siyasi böhran da işğalçı dövləti asılı vəziyyətə salıb. İyul ayında təxribat törətməklə çıxılmaz vəziyyətini guya düzəltməyə çalışan Paşinyan əksinə, daha dərin bataqlığa düşdü. Məğlubiyyətinin acısını Ermənistanın diasporla iş üzrə komissarının ofisində çalışan 13 məmuru işdən çıxarmaqla bildirən Paşinyan özünə daha bir problem yaratdı. Xarici ölkələrdən gələn ianələr azaldı. Ermənilərin diaspor təşkilatlarının müxtəlif ölkələrdə yaşayan həmvətənlərimizə göstərdiyi təzyiqlər, yetirdikləri xəsarətlər daşnakların özləri haqqında formalaşdırdıqları «məzlum», «zavallı millət» məfhumunun üstündən qırmızı xətt çəkdi. Azərbaycan informasiya müharibəsində də düşməni qabaqladı.
Güclü Azərbaycan Ordusunun əsgərlərinin müqavimətinə tab gətirməyərək ilk həmlədən məğlubiyyətə uğrayan, bir neçə hərbi məntəqəsi darmadağın edilən işğalçı canlı qüvvə, hərbi texnika, silah-sursat- sarıdan xeyli itki verərək geri çəkildi.
Aldığı zərbədən hələ də özünə gələ bilməyən Ermənistanın «yeni təxribatlara hazırlıq, əlavə torpaqların işğalı, Cəncəni vurmaq, Naxçıvanı almaq» barədəki cəfəngiyyatlarına özləri belə inanmayan ermənilər havadarlarının əmrinə uyğun iddialar irəli sürsələr də, buna da əmindirlər ki, xəyalları ac toyuğun yuxuda darı görmək misalına bənzəyir. Azərbaycan əsgərinin verdiyi qulaqburmasının ağrısını hələ də yaşayan Ermənistanın qorxaq əsgərləri həmişə olduğu kimi, yenə də silah -sursatlarını ataraq döyüş bölgəsini tərk edəcəklər. Havadarlarından nə qədər silah-sursat, hərbi texnika alsalar da, döyüş əzmi olmayan ermənilər tarixən Azərbaycanın mərd oğullarının qeyrəti qarşısında tab gətirməyiblər.
Həmişə əli başqalarının cibində olan Ermənistan miskin, forpost dövlət olduğunu İyul hadisələri zamanı də göstərdi. Azərbaycan Ordusu tərəfindən layiqli cavab alandan sonra dəstək üçün üzvü olduğu Kollektiv Təhlükəsizlik Müqaviləsi Təşkilatına (KTMT) müraciət etsə də, bu istəyinə nail olmadı.
KTMT-yə müraciət etməklə qorxaqlığını biruzə verən, döyüşlərdə ölən əsgərlərinin sayını gizlədən Paşinyanın bu xəyanəti həm də riyakarlıqdır.
Xalqına da , ordusuna da sahib çıxan Prezident İlham Əliyevin «Bir daha demək istəyirəm ki, Azərbaycan Ordusu vəziyyətə tam nəzarət edir. Onu da bildirməliyəm ki, baxmayaraq, kəndlərimiz atəşə tutuldu, ağsaqqal həlak oldu, bizim kəndlərimizdə yaşayan insanlardan bir nəfər də yerindən tərpənmədi, bir nəfər də heç yerə getmədi. Amma bizdə olan operativ məlumata görə, Ermənistanda bəzi kəndlər, bəzi şəhərlər boşaldılır. İndi panika yaranıbdır. Bax, fərq budur. Azərbaycan vətəndaşı öz torpağında ləyaqətlə yaşayır. Azərbaycan dövləti və Azərbaycan Ordusu onu qoruyur və qoruyacaqdır» sözləri isə qətiyyətli Ali Baş Komandan kimi Azərbaycan xalqına əmin-amanlıq, qələbə əzmi, vədidir. Danışıqlar xatirinə danışıq aparılmayacağını bildirən Prezident İlham Əliyevin vurğuladığı kimi, Azərbaycan xalqının səbri tükənməz deyil. Azərbaycanın güclü ordusu var. Xalq-iqtidar birliyi Azərbaycanda sabitliyin əsas şərtidir. Dövlətimiz Ermənistan-Azərbaycan Dağlıq Qarabağ münaqişəsi ilə bağlı bir addım belə geri atılmayacaq. Çünki Dağlıq Qarabağ münaqişəsinin həlli üçün siyasi, diplomatik müstəvidə, döyüş meydanında üstün mövqeyə malik Azərbaycan xalqı güclü ordusuna inanır və arxalanır. Bu inamı yaradan Ali Baş Komandan İlham Əliyevin «Son dörd il ərzində üç əməliyyat keçirilmişdir, üç toqquşma olmuşdur. Üçündə də qalib gəldik. Üçündə də bayrağımızı istədiyimiz yerə sancdıq. Üçündə də düşmənə sarsıdıcı zərbələr endirdik» sözləridir.
Bu günlərdə Rusiyada keçirilən «Beynəlxalq Ordu Oyunları-2020» hərbi müsabiqəsində iştirak edən Azərbaycan tankçılarının 16 ölkə arasında 4-cü yeri qazanması da Milli Ordumuzun qüdrətini göstərir. «Dəniz kuboku» və «Tank biatlonu» müsabiqələridə ölkəmizi layinqincə təmisl edən əsgərlərimizin qazandıqları bu uğurlar da Ermənistana ciddi xəbərdarlıqdır.
Xuraman İsmayılqızı, «İki sahil»
