ARANTV.AZ xəbər verir ki, Azərbaycanın beynəlxalq qurumlarda nüfuzu və rolu getdikcə artır. Hazırda Qara Dəniz İqtisadi Əməkdaşlıq Təşkilatına ev sahibliyi edən Azərbaycan gələn il daha bir neçə təsisata, o cümlədən Qoşulmama Hərəkatına sədrliyi qəbul edəcək.
Azərbaycanın 2019-2022-ci illərdə Qoşulmama Hərəkatına sədrliyinə və təsisatın 18-ci zirvə toplantısının ölkəmizdə keçirilməsinə hazırlıq gedir. Bunun üçün Azərbayan hazırda Qoşulmama Hərəkatında üçlük adlanan mexanizmə daxil olub. Azərbaycanın təsisata sədliyi və növbəti zirvə toplantısının Bakıda keçirilməsi məsələsi Venesuelada keçirilən 17-ci sessiyada üzv dövlətlər tərəfindən yekdilliklə qəbul olunub.
Azərbaycan BMT-nin Baş Assambleyası, Təhlükəsizlik Şurası ilə yanaşı ixtisaslaşmış qurumları ilə də ardıcıl və sistematik iş aparır. Üzv dövlətlərin dəstəyi və etimadı ilə ölkəmiz BMT-nin İqtisadi və Sosial Şurasının daimi komitəsində də üzvlüyünü davam etdirir. 2018-2019-cu illərdə Azərbaycan bu şuranın üzvü kimi qurum vasitəsi ilə beynəlxalq humanitar, o cümlədən ehtiyacı olan dövlətlərə yardım kimi məsələlərin əlaqələndirilməsində inkişaf təcrübəsini bölüşür. Azərbaycanın uğurlu əmkdaşlıq qurduğu təşkilatlardan bir də YUNESKO-dur. Bu əməkdaşlığın nəticəsi olaraq ölkəmiz təsisatın sonuncu iclasında dövlətlərin mütləq dəstəyi ilə qurumun Maddi İrs Komitəsinə ikinci dəfə üzv seçilib. Azərbaycan 2022-ci il də daxil olmaqla komitədə üzvlyünü və sədrliyini davam etdirəcək. Hikmət Hacıyev bildirdi ki, bu ölkəmizin dünya maddi-mədəni irs prosesinə böyük töhfəsidir. Bu prosesin davamı olaraq ölkəmiz Bəhreyində keçirilən sonuncu iclasda Dünya İrs Komitəsinə sədr seçilib. Bunun nəticəsi olaraq gələn il komitənin 43-cü sessiyasına Azərbaycan ev sahibliyi edəcək. Ümumdünya İrs Komitəsinin sessiyası dünya mədəni irsinə töhfə verən ən nüfuzlu tədbirlərindən biri hesab olunur. Sessiyada 3 mindən çox nümayəndənin iştirakı gözlənilir.
