Ermənistanın törətdiyi cinayətlərə beynəlxalq hüquqi qiymətin verilməsi üçün iş aparılır – VİDEO

Ermənistan Azərbaycana qarşı törətdiyi müharibə cinayətlərinə görə cavab verəcək və bu istiqamətdə işlər aparılır.

ARANTV.AZ-ın məlumatına görə, 44 günlük Vətən müharibəsi başa çatıb, işğal altında olan torpaqlar azad edilib. İndi qarşıda duran əsas işlərdən biri Ermənistanın ölkəmizə və xalqımıza qarşı törətdiyi cinayətlər və vurduğu maddi-mədəni ziyanın ödənilməsi məsələsidir.

Azərbaycan Respublikası Vəkillər Kollegiyasının üzvü, hüquq məsələləri üzrə ekspert Xəyal Bəşirov “Xəzər Xəbər“ə bildirib ki, müvafiq dövlət qurumları tərəfindən bu istiqamətdə işlərə başlanıb və bütün bu cinayətlər və maddi-mənəvi ziyan hesablandıqdan sonra aidiyyəti beynəlxalq təşkilatlara göndəriləcək. Təkcə Vəkillər Kollegiyası sözügedən məsələ ilə bağlı beynəlxalq təşkilatlara 200-dən çox müraciət ünvanlayıb.

Xəyal Bəşirov bildirib ki, Ermənistan istənilən halda törətdiyi cinayətlərə görə müttəhim kürsüsünə çıxarılacaq və Azərbaycana dəyən ziyan beynəlxalq hüquq çərçivəsində ödəniləcək. Çünki artıq dünya təcrübəsində belə bir hala rast gəlinib.

Xəyal Bəşirov qeyd edib ki, hələ döyüşlər davam edən vaxt bir sıra beynəlxalq təşklatlar Azərbaycana dəvət olunaraq ermənilərin müharibə cinayətləri ilə yerindəcə tanış olublar. Bu proses bundan sonra da davam etdiriləcək və Azərbaycan dövləti əsas hədəfinə çatana qədər yolundan çəkilməyəcək.

Ekspertin fikrincə, indiyə qədər beynəlxalq təşkilatlar Ermənistanın müharibə cinayətlərinə göz yumsalar da, artıq bölgədə yaranan yeni reallıq Azərbaycanın haqq işinə yarıyacaq və tezliklə ermənilərin ölkəmizə qarşı törətdiyi əməllərə hüquqi qiymət veriləcək.