Şəhid Təbriz Həsənovun cənnətdə ilk doğum günü.Ruhun şad olsun, Şəhidim!
Azərbaycanın minlərlə qəhrəman oğullarından biri Şəhid Təbriz Həsənov 1994-cü il avqust ayının 25-ində Bərdə rayonunun Qaradəmirçi kəndində dünyaya göz açıb.Böyüyüb, boya-başa çatan Təbriz həmişə qan yaddaşında vətənin işğalçılardan azad olunmasını canlandırıb. Ölkəmizin istiqlalı, torpaqlarımızın yağı düşməndən azad edilməsini daim arzusunda yaşadırdı. Onu bu yola sövq edən, müqəddəs ideallara doğru irəliləməsinə səbəb heç şübhəsiz ki, vətənpərvər ailədə doğulması, Azərbaycan idealını amalları sırasında sevən Rəşid atanın övladı olmaq idi. Təbriz adının seçilməsi də bu vətənpərvərliyin nümunəsidir. Övladına Təbriz adının verilməsi də məhz atanın istəyi ilə olub. Böyük Azərbaycanın o tayındakı ən böyük şəhərimizin adını vətən sevdalılarımız həmişə belə bir məhəbbətlə yaşatmalı olublar.Təbrizin adı bu tayda doğulan övladlara verilib. İndi Təbrizin adı böyük vətənimizin rəmzidir, desək, yanılmarıq. Avqustun 25-də Həsənovlar ailəsinə yaxın olanlar Təbrizin doğum gününü qeyd etmək üçün bir yerə toplaşıb. Təbriz Həsənovun doğulub , böyüdüyü ocağa çoxlu sayda ziyarətə gələnlər var. Təbrizin cənnətdəki ilk mövlud günündə Kənd qəbiristanlığına üz tutanlar hamılıqla şəhid Təbrizin hüzurunda sayğı duruşuna dayanıb. Bərdə Rayon İcra Hakimiyyətindən, Səfərbərlik və Hərbi Xidmətə Çağırış Dövlət Xidmətinin Bərdə rayon şöbəsindən, Veteranlar Birliyinin Bərdə rayon şöbəsindən və şəhidin hərbçi döyüş yoldaşları, kənd camaatı tər qərənfillərini Təbrizin sinədaşına düzürək məzar üstündə şəhidin xatirəsini dərin ehtiramla yad ediblər. Şəhid Təbriz Həsənov haqqında dərin məzmunlu fikirlər söyləyiblər. Şəhid Təbriz Həsənovun evində yaradılmış guşədə hərbçinin həyatına dair şəkillər, fəxri fərmanlar, hərbi geyim və üzərindəki medallar görənləri duyğulandırır. Təbrizin atası Rəşid Həsənov bildirir ki, Təbrizin uşaqlıqdan hərbi sənətinə böyük marağı olub. 2013-cü ildə həqiqi hərbi xidmətini başa vurandan sonra ordu sıralarında qalıb,işləməyə qərar verib. Hər il hamılıqla bir yerdə bu gün qeyd olunsa da indi ailə üzvləri Təbrizin mövludunu ondan ayrı dünyada qeyd etməli olub. Təbriz cənnətdə dünyanın o üzündə,ailə üzvləri, ata,ana,qardaşları, həyat yoldaşı və iki ciyərparası- Cəsarət,Cəsur dünyanın bu üzündədir. Üzü dönmüş ayrılığın yaratdığı kədər Təbrizin əzizlərinin qəlbini sızlatsa da təsəlliləri də var. Onlar Şəhid Təbrizin cənnətdə olmağına əminliklə inanırlar.
