Şəhid Sərvan Şükürovun doğum günü qeyd olundu
Avqustun 26-da ölkəmizin ərazi bütövlüyü uğrunda canından keçmiş, Azərbaycan Ordusunun Vətən müharibəsində şəhid olmuş hərbi qulluqçusu Şükürov Sərvan Sərxan oğlunun doğum günü doğulub boya-başa çatdığı Bərdə rayonunun Kələntərli kəndində qeyd olunub. Şəhidin 23-cü doğum günü münasibətilə keçirilən tədbirə şəhidin ailə üzvləri, yaxınları,Bərdə Rayon İcra Hakimiyyətinin nümayəndələri, Səfərbərlik və Hərbi Xidmətə Çağırış Dövlət Xidmətinin Bərdə rayon şöbəsinin əməkdaşları, Veteranlar Birliyinin Bərdə rayon şöbəsinin sədirləri və şəhidin hərbiçi döyüş yoldaşları, kənd sakinləri qatılıblar. Əvvəlcə şəhid Şükürov Sərvan Sərxan oğlunun Kələntərli kənd qəbiristanlığındakı məzarı ziyarət olunub.Şəhidin xatirəsi anılmış, onun qəhrəmanlığından və vətənpərvərliyindən söz açılmışdır. Bildirilmişdir ki, Sərvan Şükürov Vətən müharibəsinin ilk günlərində bir sıra uğurlu əməliyyatlarda fəal iştirak edib. Qeyd edək ki, Sərvan Şükürov 1998-ci il avqustun 26-da Bərdə rayon Kələntərli kəndində anadan olub.Bir bacının yeganə qardaşı olan Sərvan 2004-cü ildə Bərdə rayon İlqar Abbasov adına tam orta məktəbin 1-ci sinfində təhsil alnağa başlayıb. 2015-ci ildə məktəbi bitirəndən sonra 2018-ci ildə həqiqi hərbi xidmətini başa vuraraq, ordu sıralarında işləməyə qərar verib. 2020-ci ilin sentyabrın 27-dən başlayan Vətən müharibəsində , savaşa qatılan Sərvan Şükürov da misilsiz qəhrəmanlıqlar nümayiş etdirib. O, Azərbaycan torpaqlarının düşmən işğalından azad olunması uğrunda gedən döyüşlərdə fəal iştirak edib. Ağdərə istiqamətində həyata keçirilən döyüşlərə igidlik və fədakarlıq göstərən Sərvan Şükürov oktyabrın 3-də qəhrəmancasına döyüşərək şəhid olub. Sonda onu da əlavə edək ki, şəhid Şükürov Sərvan Sərxan oğlu Prezident İlham Əliyevin sərəncamları ilə ölümündən sonra “Vətən uğrunda”, “ Suqovuşanın azad olmasına görə” medalları ilə təltif olunub.
