Bərdə məktəbində şəhid Milli Qəhrəman Mübariz İbrahimovun 31 yaşı qeyd edilib.Fotolar
Bərdə məktəbində şəhid Milli Qəhrəman Mübariz İbrahimovun 31 yaşı qeyd edilib
Bərdə şəhər 1 saylı tam orta məktəbdə Azərbaycanın Milli Qəhrəmanı Mübariz İbrahimovun doğum günü ilə bağlı tədbir keçirilib. Milli Qəhrəmanın xatirə yığıncağında Şəhid ailələri, müharibə əlilləri və veteranları ilə birgə Bərdə Təhsil Şöbəsininin müdiri Rzaqulu Şərifov, Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyinin Bərdə filialının sədri Etibar xanım Hüseynova , Qafqaz Müsəlmanları İdarəsinin qazisi, Bərdə Cümə məscidinin axundu Ramazan Hüseyinov iştirak ediblər.
Tədbiri Bərdə şəhər 1 saylı tam orta məktəbin direktoru Qamboy Məmmədov açaraq Mübariz İbrahimovun doğulduğu ailədən,onun vətənə xidmətindən, hərbi hissədən düşmənin arxa cinahına keçməyi və göstərdiyi misilsiz şücaətindən, düşmənə vurduğu sarsıdıcı zərbədən danışıb. Milli Qəhrəman haqqında geniş və əhatəli məlumatdan sonra ədəbi bədii kompozisiya nümayiş olunub.
Ədəbi- bədii kompozisiyadan sonra söz qonaqlara verilib.
Bərdə Rayon Təhsil Şöbəsinin müdiri Rzaqulu Şərifov şəhid ailələrini salamlayaraq şəhidliyin ən uca zirvə olduğunu bildirib. Təqdim edilən ədəbi – bədii kompozisiyanı yüksək qiymətləndirib. Bədii hissənin hazırlanmasında tərtib və təşkilatçılığa görə Tamella Hüseyinovaya dərindən təşəkkür edib.
Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyinin Bərdə filialının sədri Etibar xanım Hüseynova rəhbərlik etdiyi təşkilatın sıralarında təmsil olunan veteranların hər an döyüşə hazır olduğunu bildirib. Tədbirdə iştirak edən aprel şəhidlərinin valideyinlərinə, aprel döyüşünün iştirakçısına , digər veteran və əlillərə dərin minnətdarlığını ifadə edib.Etibar xanım Hüseyinova gənc nəslin vətənpərvərlik ruhunda tərbiyyə olunmasında Bərdə rayon Təhsil Şöbəsinin rolunu yüksək qiymətləndirib. Eyni zamanda müharibənin ağır illərində Bərdə Cümə məscidinin axundu Ramazan Hüseyinovun misilsiz xidmətlərindən danışıb. Azərbaycan Respublikasının Prezidenti İlham Əliyevin iki fevral gənclər günü ilə əlaqədar çıxışını vətənpərvərlik tərbiyyəsinin gücləndirilməsi üçün böyük önəm kəsb etdiyini vurğulayıb.
Öz növbəsində çıxış edən Bərdə Cümə Məscidinin axundu Ramazan Hüseyinov Bərdədə şəhidlərin xatirəsinə həsr olunmuş tədbirlərin vaxtaşırı keçirilməsinə görə rayon rəhbərliyinə, Bərdə rayon Təhsil şöbəsinə təşəkkür edib. Orta məktəblərdə vətənpərvərlik ruhunda keçirilən tədbirləri alqışlayıb . Milli qəhrəman Mübariz İbrahimovun ad gününü Azərbaycan üçün bayram adlandırıb.
Daha sonra aprel şəhidləri Səbuhi Musayev və Ziya Həsənovun valideyinlərinə, veteran və əlillərə,Bərdə rayon Hərbi Komissarlığının əməkdaşına, eləcədə ictimaiyyət nümayəndələrinə söz verilib.
Sonda ictimai fəal , karate idman federasiyasının Qarabağ üzrə nümayəndəsi Baxşeyiş Məmmədov təmsil etdiyi təşkilat adından tədbirin keçirilməsinə şərait yaratdığına görə Bərdə şəhər 1 saylı məktəbin direktoru Qamboy Məmmədova, bədii hissənin tərtibatına və təşkilatçılığına görə Tamilla Hüseyinovaya, aktyor oyununa görə məktəbin şagirdi Nigar Hüseyinovaya fəxri fərmanlar təqdim edib.
