Prezidentin kadr siyasətinin prioritetləri: Peşəkarlıq, vətənpərvərlik və milli dəyərlər
Bu gün Prezident İlham Əliyevin dövlət idarəetmə sistemində həyata keçirdiyi struktur islahatları nəticəsində yenilikçi, müasir düşüncəli kadrlar ölkədə mühüm vəzifələrə təyin edilir. Ölkəmizin başçısı birmənalı olaraq bildirir ki, kadr siyasətində şəxsi tanışlıq, rəğbət, dostluq əlaqələri yox, peşəkarlıq, vətənpərvərlik və milli dəyərlər əsas götürülməlidir.
Prezident İlham Əliyevin uğurla davam etdirdiyi bu siyasətin nəticəsidir ki, artıq ölkədə bütün sahələrdə peşəkar kadr potensialı formalaşdırılıb. Xüsusilə yeni dövlət idarəçiliyinin tələblərinə cavab verən islahatlarla bağlı qətiyyətli mövqe ortaya qoyan Prezidentin kadr siyasətinin əsas məqsədi idarəetmədə çevikliyi və səmərəliliyi artırmaq, cəmiyyətdə formalaşan yeni çağırışlara adekvat uyğunlaşmanı təmin etməkdir.
Məhz Prezident İlham Əliyevin kadr siyasətinin dövlət idarəçiliyində mühüm faktor olduğunu sentyabrın 14-də Rafiq Cəlilovu Cəlilabad Rayon İcra Hakimiyyətinin başçısı və Rəşad Tağıyevi Şəmkir Rayon İcra Hakimiyyətinin başçısı təyin olunmaları ilə əlaqədar videoformatda qəbul edərkən onun dilindən bir daha eşitdik. Prezident onları qəbul edərkən kadr məsələlərinə toxunaraq onlara öz məsləhətlərini verdi, əvvəlcədən xəbərdarlığını etdi. Eyni zamanda, bütün dövlət məmurlarını vəzifəyə təyin edərkən səsləndirdiyi tövsiyələri bir daha diqqətə çatdırdı: «Heç kim qanundan yuxarı dayana bilməz və burada hər kəs qanun qarşısında bərabərdir. Heç kimdə immunitet yoxdur və ola bilməz. Əgər siz bu məsuliyyətin altına girirsinizsə, onda, bax, dediyim kimi, qanun çərçivəsində işləməlisiniz və bu yüksək etimadı doğrultmalısınız. Elə işləməlisiniz ki, vətəndaşlar sizdən razı olsunlar».
Prezidentin səsləndirdiyi fikir və tələblər bir daha təsdiq edir ki, dövlət korrupsiya və rüşvətxorluqla mübarizə prosesində, o cümlədən islahatların davamlılığında qətiyyətli mövqeyini bu gün daha kəskin şəkildə davam etdirir.
Dövlət başçısı yeni kadrlardan gözləntilərini, onların idarəçilikdə daha çox hansı proseslərə üstünlük verməli olduqlarını da xüsusi vurğulamışdır: ilk növbədə rəhbər işçilər vətənpərvərliyi və şəffaflığı ilə nümunə olmalıdırlar. Eyni zamanda, vətəndaşlarla bir yerdə olmaq, daim xalqın qayğıları ilə yaşamaq, rüşvətxorluğa, korrupsiyaya qarşı ciddi mübarizə aparmaq, rayonların sosial-iqtisadi inkişafına töhfə vermək, vətəndaş məmnunluğunu, həmçinin rayonların inkişafı üçün daxili və xarici investisiyaların cəlb edilməsini təmin etmək dövlət məmurlarının prioritet vəzifəsinə çevrilməlidir.
Prezident İlham Əliyevin bildirdiyi kimi, artıq hər kəs başa düşüb ki, yerlərdə insanların rifahı, rahat yaşayışı məmurun fəaliyyətindən asılıdır. Yəni, Prezidentin yerlərdəki nümayəndəsi insanların arasında olmalı, qayğıları ilə yaşamalı və imkan daxilində onlara kömək etməlidir.
Əgər Prezidentin tapşırıqları layiqincə yerinə yetirilərsə, həm dövlətimiz, həm də ölkə vətəndaşları onların fəaliyyətindən razı qalacaqdır. Yox, əgər bu etimad doğrulmasa, ilk növbədə, cəmiyyətdə məyusluq yaranacaq, vətəndaşın dövlətinə və gələcəyinə inamsızlığı başlayacaq. Bu isə hər bir ölkənin hərtərəfli zəifləməsi deməkdir.
Prezident yeni çağırışların tələbinə uyğun olaraq müasir təfəkkürlü, inkişafa meyilli kadrları, xüsusilə əməli işi ilə bunu göstərən şəxsləri vəzifəyə təyin edir. Həqiqətən də dünya miqyasında uğurlar əldə etmiş ölkələrin təcrübəsinə nəzər salsaq görərik ki, bu nailiyyətlər məhz kadr islahalarındakı tərəqqi hesabına əldə edilib.
Bəli, bu, bir reallıqdır ki, Azərbaycanı tarixinin ən qüdrətli dövlətinə çevirən cənab İlham Əliyev bu gün kadr və struktur islahatları ilə daha çevik, operativ idarəçilik mexanizmi formalaşdırır. Təbii ki, bu səmərəli mexanizmin daha da inkişaf etdirilməsi daha qüdrətli Azərbaycan deməkdir.
Bütün islahatlar zamanı Prezident İlham Əliyev ilk növbədə xalqın və dövlətin maraqlarını, milli mənafeyi nəzərə alır. Xüsusilə cəmiyyətin islahatlara münasibətinə yüksək önəm verir və vətəndaşların proseslərlə bağlı nə düşünməsi, hansı sahələrdə nədən razı və ya narazı olması diqqətdə saxlanılır. Ona görədir ki, ölkə ictimaiyyəti Prezidentin bütün yenilik və dəyişikliklərini nəinki müsbət dəyərləndirir, həm də Onunla həmrəy olduqlarını ifadə edir.
